Enschede

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Gemeinte Enschede
Provincie	Euverijssel
Hoofplaats	Enschede
Börgemeister (lies)	Roelof Bleker
Opperflaakde – daovan water	142,75 km² 1,80 km²
Inwoeners – deechde:	157.999 (1-4-2016) 1.121/km²

Enschede (Nedersaksisch: Eanske) is 'n stad in 't ooste vaan Euveriesel, in de streek Twente. De gemeinte Enschede had op 1 april 2016 157.999 inwoeners, boemèt de stad de ierste vaan Euverijssel is. Ander kerne zien Boekelo, Glanerbrug, Lonneker en Usselo.

Stadsfuncties

Enschede is verzörgingscentrum vaan Twente en 't aonpaolend Duits gebeed. Mèt Hengelo, Borne en 't Duitse Gronau vörmp de stad 'n agglomeratie mèt bekans 400.000 inwoeners. Enschede zie beteikenis es industriestad is aofgenome nao 't verdwijne vaan de textielindustrie. Allewijl is dao 'n technische universiteit gevesteg, zoewie e conservatorium en 'n hoegesjaol. Bij Enschede ligk ouch de Vleegbasis Twente, die allewijl geslote is.

Stadsgeziech

Enschede heet e modern stadsbeeld, mèt naome door de brand vaan 1862 dee zoe good wie alle bebouwing in d'n as lègkde. De meiste febrikke zien gesloop en vervaange door woeninge of bedriefsgebouwe. De väöl aw arbeiderswieke geve de stad e typisch Interbellum-aonziech.

Historie

Enschede moot roontelum 'n donjon oontstande zien. Roond 1300 kraog 't stadsrechte, die in 1325 door de bisjop vaan Utrei bekrachteg woorte. De stad bleef oonbelangriek tot eind achtiende iew de textielindustrie opkaom; wie 't industrieel dommenant Bèlsj ziech in 1830 aofsjeide kós 't oetgreuje tot textielcentrum vaan Nederland. In 1862 góng door 'ne groete brand al bebouwing verlore.

In de jaore zesteg en zeventeg góng de textielindustrie verlore door concurrentie oet lieg-loenlen, boenao intensief revitaliseringsprojekte nudeg waore, vergliekbaar met die in Heerle. In de jaore negeteg zaoge planne veur 'n fusie mèt Hengelo en Borne tot Twentestad 't leech, die evels in 2000 aofgebloze woorte wegens teväöl oonwèl bij de bevölking. In datzelfde jaor explodeerde in de wiek Roombeek e vuurwerkfebrik, boebij 23 doeje vele.

Bekinde Enschedeërs

• Harry Bannink, componis
• Willem Brakman, sjriever
• Jan Cremer, sjriever
• Sharon Dijksma, politica
• Gert-Jan Dröge, presenteur
• Femke Halsema, politica
• Sander Kleinenberg, dj
• Youri Mulder, vootballer
• Hans op de Coul, chef cultuur en radio-presentator L1
• Winnie Sorgdrager, ex-minister

Externe link

• Site vaan de gemeinte Enschede