Lingua franca nova
- Per plu articles sur Elefen, vade a la categoria per elefen.
Lingua franca nova, Elefen (Лингуа франка нова) | |||
---|---|---|---|
Creada par: | C. George Boeree | ||
Anio: | 1998 (publica en interrede) | ||
Tota parlores: | 970 en Facebook (2017) | ||
Familia: | Linguas construida lingua aidante internasional | ||
Fonte: | Franses, italian, portuges, espaniol e catalan | ||
State ofisial
| |||
Regulada par: | La Asosia per LFN | ||
Sifras
| |||
ISO 639-1: | [1] | ||
ISO 639-2: | [2] | ||
ISO 639-3: | lfn | ||
SIL: | [3] | ||
Mapa
| |||
![]() Bandera de Lingua Franca Nova.
| |||
Vide ance: Lingua – Lista de linguas |
Lingua franca nova (cortida a lfn, cual es comun speleda elefen) es un lingua aidante internasional creada par Dr C. George Boeree e perfetida par multe suportores de la lingua. La vocabulo de elefen es fundida en franses, italian, portuges, espaniol e catalan. La gramatica es multe reduida e simil a la creoles romanica. La lingua es fonetical speleda, con 22 leteras de la alfabeta latina o la alfabeta cirilica.
La prinsipes gidante:
- Un cuantia limitada de fonemes;
- Un spele cual refleta clar la pronunsia;
- Un gramatica simple e coerente;
- Un grupo limitada de afisas produosa;
- Un ordina de parolas bon definida;
- Un vocabulo prendeda de la linguas romanica moderna;
- Un capasia per aseta parolas tecnical internasional;
- Un aspeta natural, bela e espresosa.
Istoria e comunia
- Article xef: Istoria de lingua franca nova
George Boeree ia comensa labora a lfn en 1965, con la gol de crea un lingua simple. El ia es inspirada par leje sur lingua franca, un pijin usada en la mar Mediteranean en sentenios pasada.
- Lfn ia es prima presentada a la interede en 1998.
- Un grupo ia es formida en 2002 par Bjorn Madsen a Yahoo!, e lo ave plu ca 200 membros oji. Membros ia contribui multe a la developa de la lingua.
- Stefan Fisahn ia crea un vici autonom e un disionario xercable per la lingua en 2005.
- En 2008, lfn ia reseta un identifia ISO 639-3 de "lfn" par SIL.
- En 2008, Simon Davies ia renovi la disionario xercable (lfn-engles/engles-lfn). La disionario ave plu ca 15,000 parolas e espresas en lfn.
- La vici ia move a Wikia en 2009. Lo ia ave plu ca 2800 pajes, e inclui multe articles, naras, e poesias.
- La libro prima en lfn - La Aventuras de Alisia en la pais de mervelias[1] traduida par Simon Davies - ia es primida en 2012.
- La demanda par Vicente Costalago per un vicipedia en lingua franca nova ia es aprobada en 22 desembre 2017, e ia es moveda a sua adirije ueb final - lfn.wikipedia.org - en 18 april 2018.
- En 2018, la Disionario de Lingua Franca Nova: Elefen-Engles Engles-Elefen[2] es publicida par Simon Davies e George Boeree.
- En 2018, George Boeree e Simon Davies ia crea un loca de ueb a http://elefen.org, per conteni introduis e otra articles spesial sur e en lfn.
- Incluida a acel loca es un vici spesial a http://elefen.org/vici/, construida par Simon Davies en 2019, cual conteni multe traduis e obras orijinal en lfn, como poesias, cantas, naras, presentas teatral, e an novelas completa como La aventuras de Alisia.
- Suportores de elefen continua produi articles, traduis, e obras orijinal per la vicipedia e la vici elefen. Per favore, partisipa!
Spele e pronunsia
La article xef per spele e pronunsia es a fonolojia de elefen
Vocales en elefen (a, e, i, o, e u) es pronunsiada como en espaniol. Car efelen ave sola sinco vocales, varias en pronunsia no causa multe problemes. La diftongos es ai [ai], au [au], eu [eu], e oi [oi]
La plu de la consonantes es pronunsiada como en engles, franses, deutx, espaniol, etc, con alga esetas:
- c e g es sempre "dur" ([k] e [g]),
- j es pronunsiada como en franses ([ʒ]),
- x es pronunsiada como engles sh o franses ch ([ʃ]).
- La letera n ante c e g es pronunsiada [ŋ]; -ng a la fini de un parola es ance pronunsiada [ŋ].
- La letera u es pronunsiada [w] entre du vocales e a la comensa de un parola ante un otra vocal; cu e gu ante un vocal es pronunsiada [kw] e [gw].
- La letera i es pronunsiada [j] entre du vocales e a la comensa de un parole ante un otra vocal.
La leteras k, q, w, e y pote es usada per nomes propre de otra linguas, e es pronunsiada [k], [k], [u, w], e [i, j], en ordina.
Asentua
Asentua no es multe importante en elefen e pote es iniorada; an tal, on ave alga sujestes asi:
Natural, la monosilabas ave un asentua trivial:
- te
Si la parola fini en un consonante o un diftongo, la asentua senta sur la silaba ultima:
- abeon
- cacau
En la plu de otra casos, la asentua es sur la silaba ultima min un:
- casa
- maio
- sangui
- idea
- tio
Si un parola (de plu ca du silabas) fini con ia, ie, io, ua, ue, o uo, la asentua es sur la silaba ultima min du:
- varia
- rituo
La plural con -s o -es no altera la asentua orijinal de la parola: casas
- tios
- ideas
Posible esetas inclui la pone de la asentua sur la silaba ultima en alga parolas cual fini con -u, e alga parolas peti como asi e ala.
Alfabeta
A su es la alfabeta de elefen en sua forma latina e cirilica, e con sua formas major en AFI:
Latina a b c d e f g h i j l m n o p r s t u v x z Cirilica а б к д е ф г х и ж л м н о п р с т у в ш з Afi [a] [b] [k] [d] [e] [f] [ɡ] [h] [i] [ʒ] [l] [m] [n] [o] [p] [r] [s] [t] [u] [v] [ʃ] [z] Nomes a be ce de e ef ge hax i je el em en o pe er es te u ve ex ze
Gramatica
Article spesial: Gramatica de lingua franca nova
Vista jeneral
Lfn segue la ordina de parolas "svo" (sujeto-verbo-ojeto). Parolas, sintagmas, e proposas alterante segue jeneral lo cual los altera.
Nomes es tipal presededa par articles (la, un) e otra determinantes. Esetante la plural (-s o -es), nomes no varia. La rol de un nom en un frase es determinada par la ordina de parolas e par preposadas.
La pronomes personal es nonvariante: me, tu, nos, vos e pronomes de person tre: el, lo, on, los. La pronomes de refleta es la mesma, estra la person tre, singular e plural, cual usa se. La determinantes de posese es: mea, tua, sua, nosa, vosa, e sua. La pronomes es la mesma, presededa par la (pd, la mea, la tua, la sua, etc)
Verbos no varia. La tempo e la moda es indicada par paroletas presedente: ia per la pasada, va per la futur, e ta per la moda dependente (elejable!). La partisipio ativa fini con -nte e la partisipio pasiva fini con -da. Estas pote es usada per crea la aspeta continuante e la vose pasiva, en ordina. La infinitiva es la mesma como la verbo simple, o on pote usa la nom verbal par presede lo con la o otra determinante (con de ante un ojeto).
Ajetivos no varia, e averbos no es distinguida de ajetivos. La espresas per compara es formida con plu o min, e la espresas superlativa es formida con la plu o la min.
Gramaticas completa per lfn es disponable en engles, espaniol, franses, rusce, esperanto, e lfn, de esta menu.
Ordina de parolas
Frases en lfn ave un ordina restrinjeda de parolas. La ordina jeneral es:
- sintagma nomin de sujeto – sintagma verbal (– sintagma nomin de ojeto)
- Joan core
- Maria oia Joan
Un sintagma nomin ave esta ordina:
- (determinantes –) nom (– ajetivos)
- La tre omes grande...
- La multe femes peti...
Un sintagma verbal ave esta ordinas:
- (tempo –) verbo (– averbo)
- (tempo –) verbo un – verbo du (- averbo)
- ...ia come rapida
- ...va debe come lente
Un sintagma preposadal jeneral segue la parolas cual lo altera, e ave esta ordina:
- preposada – sintagma nomin
- ...en la cosina
- ...pos medianote
Nomes
La roles de nomes en un frase es indicada par preposadas e la ordina de parolas. On no ave casos gramatical.
La plural de nomes es creada par ajunta -s a nomes cual fini con vocales, o -es a nomes cual fini con consonantes. Esta no cambia la asentua:
- casa > casas
- fem > femes
La seso de nomes no es normal indicada. Si nesesada, nomes pote es segueda par mas o fema:
- un cavalo mas
- un cavalo fema
Un cuantia peti de roles tradisional ave un forma fema en -esa. Per esemplo:
- prinse / prinsesa
- conte / contesa
Un cuantia peti de parolas per membros de un familia ave un forma mas en -o e un forma fema en -a:
- tio / tia
- fio / fia
- sposo / sposa
- xico / xica
E un cuantia multe peti ave du formas diferente:
- madre / padre
- sore / frate
- fem / om
La aposa de un nom con un otra es, per la plu parte, limitada a nomes e titulos:
- san Josef
- la rio Amazon
- Los ia nomi el Joan
Determinantes
Determinantes en lfn presede la nom cual los altera. On ave du articles: la e un. On no ave un forma nondefinida per nomes plural, ma on pote usa alga si desirada:
- la om, un fem, e enfantes
- me come alga pan e ceso
Lfn ave du "predeterminantes", cual presede tota otras:
- tota
- ambos
Lo ave du determinantes de mostra:
- esta
- acel
Lo ave du determinantes de demanda:
- cual
- cuanto
E lo ave sinco determinantes de eleje e esclui:
- cada
- cualce
- alga
- no
- sola
La determinantes de posese es mea, tua, nosa, vosa e sua poneda ante la nom poseseda. Sua es la determinante de posese per la person tre singular e plural.
- Tua gato es ala.
- No, acel es sua gato.
- Tu es la ojeto de mea desira.
Lfn ave esta paroletas de cuantia:
- multe
- poca
- plu
- min
Numeros es ance usada per indica cuantia:
- tre gatos
- sento balones
E lo ave cuatro paroletas de similia e difere:
- tal
- otra
- mesma
- propre
La determinantes ave un ordina cuando plu ca un es usada:
- Tota o ambos vade prima;
- Un de la, esta, acel, cual, cuanto, cada, cualce, alga, no, sola o la determinantes de posese segue;
- Un o plu de un, multe, poca, plu, min, tal, otra, mesma, propre, e la numeros vade tre.
Per esemplo:
- tota mea tre fias
- la multe otra cosas
Final, la ajetivos bon e mal pote es poneda ante la nom, ma pos tota determinantes.
Pronomes
Pronomes en lfn no varia:
singular plural person 1 me nos person 2 tu vos person 3 el / lo los
El refere a persones e animales major. On pote estende como un metafor la usa per otra animales, robotes, tempestas, la luna, etc. Lo refere a cosas, animales peti, plantas, ideas, etc. La linia entre la du parolas es multe sujetal. Per esemplo, en naras per enfantes, animales, plantas, e an cosas es a veses indicada par el. Los es usada per la plural de ambos.
Lfn no ave distinguis de "seso" per el o los. Si nesesada, on pote usa parolas como la fem, la om, la xica, la xico, la fema o la mas. Simil, on pote usa la vea, la joven, la grande, la peti, etc, o un nom propre. Alga parlores usa elo/ela cuando los vole indica la seso, ma esta no es ofisial.
Lfn no ave un contrasta entre formas cortes e noncortes de la person du: tu es sempre usada per la singular, e vos es sempre usada per la plural. Un eseta aveni en leteratur de edas pasada, cuando on ia dise vos a la re, e el ia dise nos cuando el refere a se mesma.
La pronom refletante per la person tre, singular e plural, es se. On pote asentua lo (e otra pronomes) par usa se mesma:
- El ia vide se.
- La bebe pote vesti se mesma.
Pronomes de posese es la mesma como la determinantes de posese, ma presededa par la. O on pote repete la nom:
- La mea es plu grande ca la tua.
- Mea padre es plu grande ca tua padre.
Lfn ave un pronom nondefinida per persones, on, cual es usada como "man" en deutx o "on" en franses:
- On debe segue la regulas.
Esta determinantes pote es usada sin sua nomes (pd en la modo de pronomes) si no confusa resulta:
- tota
- ambos
- esta
- acel
- cada
- cualce
- alga
- multe
- poca
- plu
- min
- la plu
- la min
Alga otra pronomes e espresas pronomal es derivada de determinantes:
- estas
- aceles
- cadun (= cada person)
- cada cosa
- cualcun (= cualce person)
- cualce cosa
- algun (= alga person)
- alga cosa
- nun (= no person)
- no cosa
- la otra
- un otra
- otras
- la mesma
- lunlotra (= la un e la otra)
- con lunlotra (= la un con la otra)
- sur lunlotra (= la un sur la otra)
- etc
Verbos
Lfn no ave conjugas de verbos e la forma no varia per indica persones, pluralia, tempo, modo, aspeta, etc. La tempo e modo es indicada par parolas nomida "preverbos":
preverbo presente - pasada ia futur va ipotesal ta
La tempo presente usa la verbo simple. Lo es ance usada per indica atas e states abitual, fatos de natur, e como un "tempo istorial", usada en naras cual es clar en la pasada. Lo pote es ance usada per avenis en la pasada o futur prosima, spesial si un averbo indica la tempo:
- El come
- La sol leva en la este
- Me labora a la universia
- El vade pronto
La tempo pasada es indicada par la paroleta ia:
- El ia come
- La clima ia es plu fria en la edas glasial
La tempo futur es indicada par la paroleta va:
- El va come
- La clima va es plu calda en la futur
Lfn ave ance un paroleta elejable, ta, cual indica nonrealia e pote es usada do otra linguas ta usa un modo dependente o sujuntiva:
- Me ia duta ce el ta vade
- Me ta es felis si la sol ta brilia
Per indica la dependente pasada, cuando no otra indica de la pasada es evidente, on pote usa ia ta:
- Me ia ta es un bon re
Ta es ance usada en la espresa ta ce, cual espresa un desira de la parlor:
- Ta ce la re vive longa!
- Ta ce nos vade!
Alga averbos, verbos presedente, e preposadas pote es usada per espresa plu esata la tempo intendeda:
- Me ia come ante aora
- Me ia come plu temprana
- Me ia fini leje la libro
- Me ia comensa leje la libro
- Me come aora
- Me va come pos alora
- Me va come plu tarda
- Me va come pronto
On ave ance du espresas idiomal:
- Me veni de come
- Me vade a come
La averbo ja pote es usada per espresa lo cual en otra linguas es la aspeta completida (perfeta):
- Me ia come ja
La nega es indicada par ajunta no ante la paroleta de tempo o (en la tempo presente) la verbo. Un nega plu forte es indicada par la averbo nunca pos la verbo. Negas duple no es permeteda:
- El no ia pensa ce algun es asi
- Me no parti
- Me va parti nunca de tu
Alga verbos nontransitiva pote es cambiada a verbos transitiva e causal par move la sujeto a la loca de la ojeto e ajunta un sujeto nova. Per esta razona, los es nomida "verbos ergativa" en lfn.
- La acua ia boli
- Me ia boli la acua
Simil, on pote fa ce verbos transitiva deveni refletante par ajunta se, me, etc:
- Me lava me
- El ama se
Comandas es indicada par cade la sujeto:
- Vade!
- Boli la acua!
Verbos cual no ave sujetos clar, como verbos de clima, nesesa un "pronom pupetin", como lo o on:
- Lo neva
- Lo va pluve
- Lo es tro calda en esta sala (= Esta sala es tro calda)
- Lo pare ce tu es coreta (= Tu pare es coreta)
- On no ave pexes en esta lago (= Esta lago no ave pexes)
- On ave multe persones asi oji (= Multe persones es asi oji)
Verbos pote es cambiada a ajetivos: La partisipio ativa es formida par ajunta -nte a la verbo. Per esemplo, come deveni comente. Esta debe es nunca usada como un nom astrata, como en engles e otra linguas.
La partisipio ativa pote segue la verbo es e es usada per espresa acel cual en otra linguas es la aspeta continuante (nonperfetida), cual asentua la idea ce la sujeto es en la media de un ata o prosede:
- Nos ia es comente cuando la tempesta ia comensa
La partisipio pasiva es formida par ajunta -da a la verbo. Per esemplo, come deveni comeda. Esta debe es nunca confusada con la tempo pasada, como en engles e en otra linguas.
La partisipio pasiva pote ance segue la verbo es e es usada per espresa la vose pasiva:
- Si los no es cauta, los va es comeda par selacos
Nota ce on ave otra modos per espresa la continuante e la pasiva:
- Nos continua come selaco
- Me trema ancora par la pluve fria
- Algun va come nos
- On pote cambia verbos a ajetivos
Verbos pote es usada como nomes sin cambia par ajunta un determinante. Un ojeto pote es indicada par de, e la sujeto par par. Sin la determinante, la parola servi como un infinitiva, e un ojeto pote segue lo sin un preposada:
- Los dansa.
- Do es la dansa?
- La samba es un dansa.
- Los gusta dansa la samba.
- Me gusta vide la dansa de la samba par Luis e Luisa.
- Me ia es creada per dansa!
En lfn, verbos vade frecuente en duples. La verbos debe ave la mesma sujeto, e verbo du es la ojeto de la verbo prima. La verbo du no ave un tempo separada, ma pote ave un ojeto. La verbo prima es tipal un verbo de disposa. Comun esemplos de verbos de disposa es:
- atenta
- debe
- esita
- espera
- espeta
- finje
- menasa
- nesesa
- osa
- pare
- pote
- prefere
- sabe
- teme
- vade
- vole
La verbo seguente es en sua forma la plu simple:
- Me va atenta vola doman.
- On debe brosi la dentes a cada dia.
Ajetivos e averbos
Ajetivos segue la nom cual los altera, con du esetas: Bon e mal pote vade ante la nom, car los es frecuente usada. Ajetivos en lfn no acorda con sua nomes, e no ave formas diferente per seso o pluralia.
Per comparas, on usa plu o min. Per indica la superioria e la inferioria, usa la plu e la min:
- Jan es plu bon ca Jo.
- Ma Jil es la plu bon.
Egalia es indicada par tan... como:
- Marco es tan grande como Mona.
Ajetivos pote es usada como nomes. Per esemplo, bela es un ajetivo, ma un bela es un nom, e un corti per un bela person o simil. Esta opera ance con partisipios. Per esemplo, un person ci studia es un studiante, e la cosa studiada es la studiada.
Un ajetivo pote es cambiada a un nom astrata par ajunta -ia. Esta sufisa pote ance es usada per nomes:
- bela > belia
- madre > madria
Lfn no ave un modo per marca averbos. En loca, cualce ajetivo pote es usada como un averbo par pone lo pos un verbo o a la comensa de la frase. Los pote ance es poneda pos la ojeto de la verbo o an a la fini de la frase, si no confusa resulta. Averbos cual altera ajetivos presede la ajetivo. On ave ance averbos cual no es derivada de ajetivos. Asi es esemplos de averbos comun:
- ala
- alora
- an
- ance
- ancora
- aora
- apena
- asi
- bon
- doman
- donce
- ier
- ja
- lenta
- mal
- no
- nunca
- oji
- pronto
- rapida
- sempre
- tarda
- tempora
- temprana
- tro
- vera
Preposadas
Preposadas es poneda ante la nom o sintagma de nom, e la sintagma de preposada es poneda pos la nom alterada o, si la sintagma preposada es usada como un averbo, pos la verbo o a la comensa de la frase. On pote cade "la" o otra determinante pos un preposada, si la sinifia resta clar.
On ave 22 preposadas simple en lfn:
- a
- ante
- asta
- ca
- como
- con
- contra
- de
- en
- entre
- estra
- longo
- par
- per
- pos
- sin
- sirca
- su
- supra
- sur
- tra
- ultra
Alga partisipios pote ance es usada como preposadas:
- beneficante (= per)
- consernante (= sur)
- ensircante (= sirca)
- escluinte (= sin)
- esetante (= estra)
- incluinte (= con)
- seguente (= pos)
- traversante (= tra)
- usante (= con)
Multe preposadas pote es usada como averbos par ajunta a o de ante los. Per esemplo:
- a su
- de supra
- a estra
- a en
- a pos
- de ante
Conjuntas
Lfn ave alga conjuntas simple:
- e
- o
- ma
- e... e...
- o... o...
- no... no...
Per esemplo:
- Luis e me vole vade, ma Maria vole resta asi.
- No Luis no Maria vole vade, donce me no vole vade ance.
Demandas
Lfn ave alga parolas e espresas cual es usada per introdui demandas:
- cual
- ci (cual person)
- de ci
- como (en cual modo)
- cuanto (de cual cuantia)
- cuando (a cual tempo)
- do (a cual loca)
- perce (per cual razona, par cual causa)
(La plu de estas es ance usada per pronomes e averbos de relata e sujuntas, discuteda a su.)
Per esemplo:
- De ci es esta libro?
- Cuanto on paia per lete asi?
- Cual auto tu gusta la plu?
- Perce tu no gusta esta?
- Cuando tu espeta ce el ariva?
On pote pone la parola de demanda a la comensa de la frase, o en la loca do la responde ta es:
- Do vos ia dansa? = Vos ia dansa do?
- Cual tu ia dise? = Tu ia dise cual?
Demandas pote inclui un de esta parolas, o pote es sola indicada par un tono asendente en la parola final de la frase. On pote ance espresa demandas par comensa la frase con la paroleta de demanda esce, o par ajunta si o no a la fini de la frase, pos un virgula. En scrive, los es sempre segueda par la marca de demandas (?):
- Como on construi un casa per avias?
- Tu vole dansa?
- Esce tu parla Deutx?
- Tu parla Italian, no?
- Tu gusta cafe, si?
Proposas ajetivin
On ave du pronomes de relata, cual introdui proposas ajetivin:
- cual (per cosas)
- ci (per persones)
La proposas ajetivin segue la nom o sintagma de nom cual los altera:
- La fem ci me ama veni de Frans.
- La robot cual me ia construi no opera.
A alga veses, la nom ante "cual" o "ci" no es indicada. En esta casos, lo es plu bon ce on introdui "lo", "el", o "los" ala:
- Me vide lo cual me gusta.
- Tu vide el ci fura tua mone?
Pronomes de relata pote es presededa par preposadas:
- La cosa per cual me espera la plu es un bisicle nova.
- La fem de ci nos parla labora a me ofisia.
- La xico de ci nos ia salva sua can ia es multe grasiosa.
Do e cuando es ance usada per introdui proposas ajetivin:
- Esta es la site do me vole abita.
- Me ia vade ala en la anio cuando me ia fini mea studias.
Proposas averbin
Esta sujuntas introdui proposas averbin:
- si
- afin
- car
Proposas averbin segue normal sua proposa xef:
- Me ta pote vade si me ia ave un auto.
- Me no teme la can car el es multe peti.
- Me core afin la rinoseros no catura me.
Alga averbos es ance usada como sujuntas:
- como
- do
- cuando
- cuanto
Per esemplo:
- La lupos cria cuando los vide la luna
- Me vole abita do la clima es bon
- Me vive como me vole vive.
- E me come cuanto me gusta.
Do e cuando pote es presededa par preposadas:
- pos cuando
- ante cuando
- asta cuando
- de cuando
- en cuando
- a do
- de do
Per esemplo:
- El ia pote sci ante cuando el ia pote pasea.
- Me gusta escuta la radio en cuando me labora.
Proposas nomin
Ce es usada como un sujunta per introdui un proposa nomin, cual segue plu comun pos la verbo como la ojeto de esta verbo:
- Me pensa ce el es bela.
- El ia dise ce tua auto es fea.
- La gato entra la sala sin ce algun vide el.
Construis alternativa permete asentuas de sinifia diferente:
- El senti ce la bebe cria.
- El senti la bebe criante.
- El senti la cria par la bebe.
Ci e cual es ance usada per introdui proposas nomin:
- Me no pote recorda ci me es.
- El sabe cual me desira per natal.
On ave ance averbos cual pote introdui proposas nomin:
- Me no sabe cuando me va parti.
- Me sabe de do tu veni.
- Me no gusta como el parla.
- Me comprende perce tu odia el.
- Me no recorda cuanto me ia come.
- Me demanda a me esce el ama me.
Numeros
- 0 – zero
- 1 – un
- 2 – du
- 3 – tre
- 4 – cuatro
- 5 – sinco
- 6 – ses
- 7 – sete
- 8 – oto
- 9 – nove
- 10 – des
Numeros plu grande es construida como esta:
- 11 – des-un
- 20 – dudes
- 100 – sento
- 101 – sento-un
- 321 – tresento-dudes-un
- 1000 – mil
- 45 678 – cuatrodes-sinco mil sesento-setedes-oto
- 1 000 000 – milion
- 1 000 000 000 – mil milion (o bilion, si spesifada)
Numeros cual espresa la ordina de cosas es la mesma, ma los segue la nom, per esemplo la om tre en loca de la tre omes. Per usa numeros ordinal en comparas, lfn usa construis como lo es la stela tre en brilia o lo es la stela tre la plu briliante.
Fratos es construida con -i, per esemplo dui, tri, cuatri,... desi, senti, mili, etc. Multiples e grupos pote es indicada par usa -uple, como duple, etc.
Leteratur
- Article xef: Leteratur de lingua franca nova
De sua crea, lingua franca nova ave leteratur con testos orijinal e traduida.
Multe testos ia es traduida a lingua franca nova:
- Colinas como elefantes blanca, par Ernest Hemingway; Traduida par Daniel Alegrett, 1999
- La cade de la Casa de Usor, par Edgar Allan Poe; Traduida par Simon Davies, 2008
- Jigante egoiste, par Oscar Wilde; Traduida par Simon Davies, 2008
- La prinse peti, par Antoine de Saint Exupéry; Traduida par Simon Davies, 2009
- Alisia en la pais de mervelias, par Lewis Carroll; Traduida par Simon Davies, 2010
- Un canta de natal, par Charles Dickens; Traduida par Simon Davies, 2010
- Leteras de la tera, par Mark Twain; Traduida par George Boeree, 2010.
- Re Lear, par William Shakespeare; Traduida par George Boeree, 2014/2016.
- Eneida, par Vergilio; traduida par Simon Davies.
La aventuras de Alisia en la pais de mervelias es la publica prima de un nara tota en lfn.
Referes
- ↑ La aventuras de Alisia en la pais de mervelias
- ↑ Disionario de Lingua Franca Nova: Elefen-Engles Engles-Elefen
Bibliografia
- Fisahn, Stefan (2005) Plansprache: Lingua Franca Nova. Contraste, 244, p. 12.
- Harrison, Richard H. (2008) Lingua Franca Nova. Invented Languages, 1, pp. 30 –33.
Lias esterna
Linguas construida (lista) | ||
---|---|---|
Linguas aidante internasional | adjuvilo • bolak • communicationssprache • engles basal • esperanto (esperantido) • esperanto 2 • esperanto reformida • globasa • glosa • idiom neutral • ido • intal • interglossa • interlingua • kah • kosmos • kotava • langue nouvelle • latinesce • latino sine flexione • lingua franca nova • lingua franca nuova • lingwa de planeta • lingwe uniwersala • mondial • mondlango • mundeze • mundolinco • mundolingue • neo • novial • occidental • ses • solresol • sona • spokil • tavo • universalglot • uropi • volapük • yolik | |
Linguas aidante zonal | afrihili • efatese • folkspraak • frenkisch • medjusloviansce • romániço • romanid • slovianto | |
Linguas esperimental | lincos • lojban • loglan • tocipona • voksigid | |
Linguas artal | aingeljã • dothraki • klingon • láadan • nadsat • quenya |