იხილეთ წყარო გვერდისთვის თემურლენგის მეექვსე ლაშქრობა საქართველოში

'''თემურლენგის მეექვსე ლაშქრობა''' — შუააზიელი მხედართმთავრის [[თემურლენგი]]ს [[საქართველო]]ში [[თემურლენგის ლაშქრობები საქართველოში|ლაშქრობების]] ერთ–ერთი ეტაპი. ლაშქრობა მიმდინარეობდა [[1400]] წლის გაზაფხული-ზაფხულის განმავლობაში, ძირითადად [[ქართლი]]ს ტერიტორიაზე.

== წინაპირობა==
[[1399]]-[[1400]] წლის ზამთარი თემურლენგმა ყარაბაღში გაატარა. საკვების მომარაგებისა და ლაშქრის შევსების შემდეგ თემურლენგი 1400 წლის გაზაფხულზე საქართველოსკენ გამოემართა და საზღვართან დაბანაკდა. [[გიორგი VII (საქართველოს მეფე)|გიორგი მეფეს]] ([[1393]]-[[1407]]) ელჩი გამოუგზავნა და მორჩილება და ბატონიშვილ [[თაჰერი]]ს გაცემა მოსთხოვა. წინააღმდეგ შემთხვევაში საქართველოს აოხრებით იმუქრებოდა{{ციტატა|მე ვარ მეფე შენი და მოვედ ჩემდა და შემომრიგდი და მოგცემ საბოძვარსა მრავალსა და დიდად პატივ გცემ; უკეთუ არა მორჩილ მექმნები, უბრძანებ ლაშქართა ჩემთა და მოვაოჴრებ სრულიად ქუეყანასა შენსა.}} სპარსული წყაროების მიხედვით გიორგი მეფემ მოციქულს "უხეში პასუხი" გასცა. [[ქართლის ცხოვრება|ქართლის ცხოვრების]] გაგრძელების მიხედვით გიორგის ელჩისათვის განუცხადებია: {{ციტატა|მე შენისა უმცირესი არავარ და არცა გძალუძს მოოჴრება ქუეყანისა ჩემისა და, ვინათგან უთქუამს, უკეთუ არა აღასრულოს საქმე ეგე, იყოსმცა დიაცი და არა კაცი.}} გიორგი მეფის ამ ზედმეტად "გაბედულმა" პასუხმა, ცხადია, უაღრესად პატივმოყვარე თემურლენგი დიდად განარისხა. ის მთელი თავისი უზარმაზარი ლაშქრით საქართველოში შემოიჭრა. მისი მიზანი საქართველოს მთლიანი განადგურება იყო. გიორგი მეფესაც დიდი სამზადისი ჩაუტარებია. მობილიზებული იყო ''"ყოველი საქართველო"'', დამხმარე ჯარი გადმოიყვანეს ჩრდილოეთ კავკასიიდანაც.

==მიმდინარეობა ==
თემურლენგისა და ქართველთა ლაშქარი [[სევანი (ტბა)|გოგჩის ტბასთან]] შეებნენ ერთმანეთს. ქართველთა ლაშქარს უკეთესი პოზიცია ეჭირა. ქარიანი დღე იყო და მტერს პირდაპირ სახეში აყრიდა მტვერს. [[ქართველები|ქართველებმა]] პირველივე შეტევისას თითქმის მთლიანად გაანადგურეს მტრის მეწინავე რაზმი. თუმცა თემურის ლაშქარი დიდად სჭარბობდა ქართველთა ლაშქარს. მთელი დღის ბრძოლის შედეგად მოღლილ ქართველებს საღამოს ახალი დიდი ძალებით შემოუტია თემურლენგმა. ქართველები იძულებულნი გახდნენ უკან დაეხიათ და [[ქვემო ქართლი]]ს მთებში, ციხესიმაგრეებსა და გამოქვაბულებში გამაგრებულიყვნენ. თემურლენგის მეომრები თოკებზე გამობმული კალათებით ეშვებოდნენ გამოქვაბულების წინ და ისრებით ცეცხლმოკიდებულ ჩვრებს შეისროდნენ. ასე გამოაირეს ქვემო ქართლის მთიანი ნაწილი. შემდეგ [[თბილისი|თბილისს]] მოადგნენ და დიდი ბრძოლებით ისიც აიღეს. თემურს გიორგი მეფის შეპყრობა სურდა და ყველაფერს აკეთებდა ამისათვის. მან სპეციალური რაზმები დაადევნა გიორგის. გიორგი მეფე ბრძოლით იხევდა უკან. მოწინააღმდეგეები ისე ახლო-ახლო იბრძოდნენ ერთმანეთთან, რომ გიორგის ამალის ზოგიერთი წევრი ტყვედაც კი ჩაიგდეს მონღოლებმა. გზადაგზა მტერი ანადგურებდა ეკლესიებს, ციხესიმაგრეებს, საცხოვრებელ სახლებს, ნათესებს, ხეხილის ბაღებს. ასე გავლეს [[მუხრანი (მხარე)|მუხრანი]] და მისი მიდამოები.

შემდეგ [[ქსანი|ქსნის]] მიდამოებში შეიჭრნენ. ქსნის ერისთავი [[ვირშელ ქსნის ერისთავი|ვირშელი]] [[ნახჭევანი]]ს ლაშქრობის მონაწილე იყო. როგორც ჩანს იქიდან წამოყვანილი ტყვეები [[ქსნის ხეობა]]შიც ყოფილან. თემურის ქსინს საერისთავოში შეჭრის ერთ-ერთი მიზანი მათი გათვისუფლებაც ყოფილა. ვირშელი [[ქნოღოს ციხე]]ში გამაგრდა და დიდი წინააღმდეგობაც გაუწია მომხდურებს. მტერმა ვიწრო ხეობაში დიდი ლაშქრის გაშლა ვერ მოახერხა და იზულებული გახდა უკან გამობრუნებულიყო, თუმცა ქსნის ხეობას ძალზედ დიდი ზარალი მიაყენა. ქსნის ხეობის შემდეგ მონღოლები ქართლში შეიჭრნენ. ქართლის მთავარი ჯანიბეგი დიდ წინააღმდეგობას უწევდა, მაგრამ ბოლოს იძულებული გახდა დამორჩილებოდა, თუმცა მისი სამფლობელო აოხრებას მაინც ვერ გადაურჩა. აღსანიშნავია, რომ ჯანიბეგის სამფლობელოშიც ყოფილა ნახიჭევანიდან წამოყვანილი მუსლიმანი ტყვეები.

შემდეგი დიდი ბრძოლა გაიმართა [[გორის ციხე]]სთან. ქართველთა წინააღმდეგობის მიუხედავად თემურლენგმა ციხე მაინც აიღო. გიორგი მეფე კვლავ ბრძოლით იხევდა უკან, თემურლენგი კი გზად ყველაფერს ანადგურებდა. შვიდი დღის განმავლობაში იცავდნენ ქართველები კარგად გამაგრებულ [[ძამის ციხე]]ს, რის შემდეგაც გიორგი მეფე იძულებული გახდა დაეტოვებინა ციხე, ალყა გაარღვია და დასავლეთისაკენ დაიხია. თემურის ჯარმა იქაურობა ააოხრა და მოსახლეობა უმოწყალოდ გაჟლიტა. ბოლო ბრძოლა გიორგი მეფემ [[ლიხის ქედი]]ს მიდამოებში გაუმართა მტერს. გიორგი მეფე იძულებული გახდა დასავლეთ საქართველოში გადასულიყო. თემურლენგმა დასავლეთ საქართველოში გადასვლა ვერ გაბედა.

ამის შემდეგ იგი [[სამცხე]]ს შეესია, გაძარცვა და ააოხრა. ტყვეებიც მრავლად მოაგროვეს. იქიდან [[თრიალეთი (მხარე)|თრიალეთი]]ს გამოვლით [[თეძამი|თეძმის]] ხეობაში ჩავიდნენ და იქაურობაც გაძარცვეს და ააოხრეს, მათ შორის [[რკონის მონასტერი]]ც. შემდეგ [[ქვათახევი]]ს მიდამოებიც დაარბიეს, მონასტერს კი ცეცხლი წაუკიდეს და იქ თავშეფარებული ხალხი, მათ შორის ბერ მონაზვნები გამოწვეს. ამის შემდეგ [[მცხეთა]]ში შევიდნენ და [[სვეტიცხოველი]] გაძარცვეს და დაანგრიეს. დიდი ბრძოლები გაიმნართა [[არაგვის ხეობა]]შიც. არაგვის მოსახლეობამაც დიდი ზარალი განიცადა. აქედან თემურლენგი სამხრეთით [[კოლა|კოლის]] მინდვრისაკენ გაემართა, გზად [[ფანასკერტის ციხე]] აიღო, მისი მიდამოები გაანადგურა და კოლის მინდორზე დაბანაკდა.

==შედეგები==
1400 წლის ლაშქრობა, რომელიც გაგრძელდა მთელი გაზაფხული-ზაფხული, ყველაზე ხანგრძლივი და ულმობელი იყო. დაანგრიეს, გაძარცვეს და გადაწვეს მრავალი ქალაქი და სოფელი, ციხესიმაგრე და ეკლესია-მონასტერი, ყანები და ხილის ბაღები; ტყვედ წაიყვანეს 60 000 და გაჟლიტეს გაცილებით მეტი ადამიანი. ყოველივე ეს [[თემურლენგი]]ს ისტორიკოსების თქმით იმიტომ მოხდა, რომ გიორგი მეფემ ნახიჭევანში, ალინჯას ციხის მოალყე თათრები დახოცა, ციხეში მომწყვდეული ბატონიშვილი თაჰერი გამოიყვანა და თემურის მოთხოვნის მიუხედავად არ გადასცა მას.

==იხილეთ აგრეთვე==
* [[თემურლენგის ლაშქრობები საქართველოში]]
* [[თემურლენგის პირველი ლაშქრობა საქართველოში]]
* [[თემურლენგის მეორე ლაშქრობა საქართველოში]]
* [[თემურლენგის მესამე ლაშქრობა საქართველოში]]
* [[თემურლენგის მეოთხე ლაშქრობა საქართველოში]]
* [[თემურლენგის მეხუთე ლაშქრობა საქართველოში]]
* [[თემურლენგის მეშვიდე ლაშქრობა საქართველოში]]
* [[თემურლენგის მერვე ლაშქრობა საქართველოში]]

==ლიტერატურა==
* საქართველოს ისტორია, ტ. II, თბ. 2008 წ. გვ. 93-94

{{თემურლენგის ლაშქრობები საქართველოში}}

[[კატეგორია:თემურლენგის ლაშქრობები საქართველოში|6]]