Xiana de Nicomedia

Xiana de Nicomedia

Nome orixinal	(el) Ίουλιανή Νικομηδείας
Biografía
Nacemento	c. 285 (Gregoriano) Nicomedia
Morte	305 (19/20 anos) Nicomedia
Causa da morte	decapitación
Actividade
Campo de traballo	Martirio
Período de tempo	Imperio Romano
Enaltecemento
santa
Día de festividade relixiosa	16 de febreiro

Xiana de Nicomedia, tamén coñecida como Xuliana ou Xiá, nada arredor de 285 en Nicomedia e falecida o 16 de febreiro do 304 no mesmo lugar, foi unha mártir e santa da Igrexa católica. A súa festa celébrase o 16 de febreiro e o 28 de xuño, e na Igrexa Ortodoxa Grega o 21 de decembro.

Traxectoria

Xiana era filla dunha coñecida familia ilustre de Nicomedia, na actual Turquía, de pai pagán e perseguidor dos cristiáns e unha nai agnóstica. Ela, pola situación familiar, faise bautizar en segredo. Ademais entregouse enteiramente a Cristo, refugando o matrimonio. Pero o novo senador Eleusio quixo casar con Xiana e o pai concertou o matrimonio entre o senador e a rapaza. Esta recibiu ao pretendente pero, cando se concretaron os acordos matrimoniais, puxo a condición de que non o aceptaría ata que non chegase a ser xuíz e prefecto da cidade. Pero o mozo logrouno, polo que ela púxolle outra condición: facerse cristián. Eleusio rexeitouna por este motivo.

Entón, durante a persecución de Maximiano, sometéuselle a tortura, con estano derretido e lume, e foi encarcerada co obxectivo de darlle tempo para pensar e levala a un cambio de actitude. As súas Actas describen as loitas que se di que tiña co Diaño; represéntaselle nas imaxes cun diaño alado a quen leva atado cunha cadea. Esta pelexa de Xiana con Satanás era unha das historias favoritas da Igrexa medieval. Cabe destacar o seu gran significado psicolóxico: dise que Satanás se lle apareceu á santa como un anxo de luz co propósito de persuadila de que todo ao que renunciara neste mundo era, de feito, bo. Finalmente, con dezaoito anos, cortóuselle a cabeza o 16 de febreiro do 304.

Culto

Cando chegou a paz de Constantino, a matrona Sofronia tomou as reliquias do corpo da mártir Xiana en Nicomedia coa intención de levalas consigo a Roma, pero unha tempestade obrigouna a desembarcar en Pozzuoli (Campania), onde lle edificou unha igrexa que logo destruíron os lombardos. Este traslado fixo que a liana mártir de Nicomedia, fose confundida con Santa Xiana de Cumas, polo que non se sabe se é a mesma ou se son persoas totalmente diferentes.

A principios do século XIII, as reliquias víronse perigar e prudentemente trasladáronse a Nápoles onde repousan e se veneran con gran devoción. Outras reliquias atópanse na actualidade en Bruxelas (Bélxica), na Igrexa da Nosa Señora do Sablon. Con todo, unha tradición do norte de España mantén que é alí onde está enterrada, na Abadía de Santa Xuliana (Cantabria), que dá o seu nome á localidade de Santillana del Mar, como contracción de Santa-Iuliana, hoxe convertida en colexiata, de estilo románico, con máis de mil anos de antigüidade.

Na arte, Santa Xiana é ás veces mostrada nun caldeiro, guiando a Satanás encadeado, ou cunha coroa e levando unha cruz sobre o seu peito. Na pintura e ventás eclesiásticas da Idade Media, Santa liana é mostrada frecuentemente batallando cun dragón con ás; usualmente ela leva unha cadea para amarralo. Tamén pode ser vista cun dragón aos seus pés.