Ramón Sampedro

Ramón Sampedro Cameán, nado na parroquia de Xuño o 5 de xaneiro de 1943 e finado en Boiro o 12 de xaneiro de 1998, foi un mariñeiro, escritor galego e defensor da eutanasia.

Ramón Sampedro

(2015)
Biografía
Nacemento	(es) Ramón Sampedro Cameán 5 de xaneiro de 1943 Porto do Son, España
Morte	12 de xaneiro de 1998 (55 anos) Boiro, España
Causa da morte	suicidio asistido, intoxicación por cianuro
Actividade
Campo de traballo	Suicidio asistido
Ocupación	Mariñeiro e escritor
Xénero artístico	Poesía

Traxectoria

As furnas, Praia das Furnas, Xuño, Porto do Son.

Con 19 anos enrolouse na mariña mercante como mécanico co obxectivo de coñecer mundo. Aos 25 anos, o 23 de agosto de 1968 un accidente na praia das Furnas, en Porto do Son, déixao tetrapléxico, sen poderse mover de pescozo para abaixo. Decidido a morrer, pero impedido fisicamente para suicidarse, emprende unha loita legal polo dereito a exercer a eutanasia. Co código penal español, a eutanasia activa, é dicir, a axuda a morrer a unha persoa que ten vontade de facelo pero que non pode facelo en por si, está castigada pola lei e considerada homicidio.

Esta loita legal non deu os froitos agardados, malia a repercusión dos medios do caso, pois chegou tanto á xustiza española como a unha comisión europea en Estrasburgo. O seu caso apareceu nos xornais de todo o mundo.

En xaneiro de 1998, e logo de vinte e nove anos sen poder moverse, leva a cabo un plan para acabar coa súa vida, coa axuda de diversas persoas. Envelénase con cianuro potásico e filma os seus últimos momentos e a súa morte cunha cámara de vídeo, para exculpar esas persoas. A xornalista Ramona Maneiro foi acusada de achegarlle o vaso co veleno, pero foi absolta por falta de probas. Anos máis tarde, cando o delito xa prescribira, Maneiro recoñeceu que fora ela quen o asistira no suicidio.

Obra

Escribiu dous libros: Cartas desde el infierno (1996) onde agrupou os seus escritos ata ese momento e, xa postumamente, o poemario Cando eu caia (1998). Traducida ao castelán.

• Cartas desde el infierno (Planeta, 1996)
• Cando eu caia (Edicións Xerais, 1998)

Cine

• Condenado a vivir é un telefilme realizado para a TVG en 1999 que leva á ficción a historia de Ramón Sampedro. O actor encargado de dar vida ó tetrapléxico coruñés é Ernesto Chao.
• No 2004, Alejandro Amenábar levou as súas vicisitudes ao cine con Mar adentro, filme que recibiu gran cantidade de premios, entre os que destacou un Óscar ó mellor filme en lingua non inglesa. O papel de Ramón Sampedro interpretouno Javier Bardem.

Véxase tamén

Ligazóns externas

• Live and Let Die, na revista TIME. (en inglés)