Terminator: Genisys

Terminator: Genisys
film
(Filmposter yn 'e Ingelske Wikipedy)
makkers
regisseur	Alan Taylor
produsint	David Ellison Dana Goldberg
senario	Laeta Kalogridis Patrick Lussier
kamerarezjy	Kramer Morgenthau
muzyk	Lorne Balfe
filmstudio	Skydance Productions
distribúsje	Paramount Pictures
spilers
haadrollen	Arnold Schwarzenegger Emilia Clarke Jai Courtney
byrollen	Jason Clarke J.K. Simmons Byung-Hun Lee Matt Smith
skaaimerken
lân/lannen	Feriene Steaten
premiêre	22 juny 2015
foarm	langspylfilm
sjenre	science fiction-aksjefilm
taal	Ingelsk
spyltiid	126 minuten
budget en resultaten
budget	$155 miljoen
opbringst	$440,6 miljoen
filmsearje
filmsearje	Terminator
● foarich diel	Terminator: Salvation
● folgjend diel	Terminator: Dark Fate

Terminator: Genisys is in Amerikaanske apokalyptyske en dystopyske science fiction-aksjefilm út 2015 ûnder rezjy fan Alan Taylor, mei yn 'e haadrollen Arnold Schwarzenegger, Emilia Clarke en Jai Courtney. De film is it fyfde diel en tagelyk in reboot fan 'e filmsearje Terminator. It ferhaal giet oer Kyle Reese, in soldaat yn 'e oarloch tsjin 'e keunstmjittige yntelliginsje fan it Skynet, dy't de minskheid útrûgje wol. Hy wurdt út 2029 wei werom yn 'e tiid stjoerd nei 1984 om Sarah, de mem fan fersetslieder John Connor, te rêden as it Skynet in moardmasine, in terminator, werom yn 'e tiid stjoerd om har te deadzjen. Oant safier folget de film krekt itselde ferhaal as The Terminator, it earste diel fan 'e rige. Mar as Reese yn 1984 arrivearret, blykt de tiidline folslein feroare te wêzen trochdat út in fierdere takomst terminators nei 1973 stjoerd binne. Dêrtroch is Sarah Connor op njoggenjierrige leeftyd wees wurden en is se grutbrocht troch in werprogrammearre Terminator dy't se 'Pops' neamt. Terminator: Genisys krige fan 'e filmkritisy oer it algemien negative resinsjes, mar wie kommersjeel súksesfol yn 'e bioskopen. Om't de opbringst yn 'e Feriene Steaten lykwols bot ôffoel, waarden de beide plande ferfolchfilms fan Terminator: Genisys skrast.

Plot

Yn 2029 is de oarloch tusken de masines dy't oanstjoerd wurde troch de wrâldwide keunstmjittige yntelliginsje Skynet en it minsklik ferset û.l.f. John Connor yn folle gong. It Skynet beskôget it bestean fan 'e minskheid as in bedriging foar syn eigen fuortbestean en is wisberet om 'e minsken út te rûgjen. It ferset stiet op it punt it Skynet te ferslaan, mar ear't dat barre kin, aktivearret it Skynet in tiidmasine. It stjoert in T-800-terminator, in moardmasine yn 'e foarm fan in cyborg mei in metalen skelet ûnder in laachje libben weefsel, werom yn 'e tiid nei 1984. De bedoeling dêrfan is om Sarah Connor, de mem fan John Connor, te fermoardzjen ear't John berne wurde kin, sadat er letter ek nea it minsklik ferset nei de oerwinning liede kin.

Nei't it Skynet oerwûn is, stjoert John Connor in frijwilliger, syn freon Kyle Reese, efter de terminator oan om Sarah te beskermjen. Foartiid fertelt er Reese wat dy yn 1984 oantreffe sil: de tweintichjierrige Sarah wurket as servearster en hat net it flauste benul fan wat har te wachtsjen stiet. Se is gjin skym fan 'e trochwintere striidster dy't se letter wurde sil. Reese sil har dêrom beskermje moatte en yn alles it foartou nimme moatte.

As de tiidmasine aktivearre wurdt en Reese yn it magnetysk fjild fan it apparaat hinget, fangt er in glim op fan hoe't John Connor oanfallen wurdt troch in terminator yn 'e momkape fan in minsklik soldaat, dy't op 'e iene of oare wize de ûndergong fan it Skynet oerlibbe en it ferset ynfiltrearre hat. Dêrtroch ûntstiet in tiidsparadoksaal skeakelpunt dat de tiidlinen fan takomst en ferline feroaret. Fan gefolgen ûnderfynt Reese, wylst er troch de tiid weromreizget nei 1984, oantinkens oan in jonkheid dy't er nea hân hat. Hy is nammentlik berne nei de nukleêre holokaust fan 1997, doe't it Skynet selsbewust waard en op 'e saneamde Oardielsdei alle nukleêre wapenreau op 'e wrâld ynsette om 'e minskheid te ferneatigjen. De griene wrâld dêr't syn âldelju him oer ferteld hawwe, hat er sels nea meimakke. No kin er him ynienen in parallelle skiednis tebinnenbringe, wêryn't er dy wrâld wol meimakke hat en de Oardielsdei pas plakfûn yn 2017, doe't er trettjin jier wie. Ek hat er in oantinken oan himsels as jonge foar de spegel, wêrby't er oanhâldend tsjin himsels seit: "Genisys is Skynet, ûnthâld dat."

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

De T-800 fan Skynet arrivearret yn 1984 yn Los Angeles, mar treft dêr fuortendaliks in oare, âldere T-800-terminator, dy't him oanfalt. Dyselde wurket gear mei Sarah Connor en wurdt troch har "Pops" neamt ("Heity"). Tegearre bringe se de nije T-800 sa'n skea ta dat dy útskeakele wurdt. As Reese yn 1984 arrivearret, wurdt er oanfallen troch in type terminator dat er noch nea sjoen hat, in T-1000, dy't út floeiber metaal bestiet. Op 'e flecht foar dy masine wurdt er arrestearre troch twa plysjes nei't er ynbrutsen hat yn in warehûs. De iene plysjeman wurdt troch de T-1000 deamakke, en Reese siket beskûl mei de oare plysje, in jonge rekrút dy't O'Brien hjit. Se wurde rêden as Sarah Connor mei in pânsere bestelwein de winkel ynriidt om Reese op te pikken, wêrnei't de T-1000 de efterfolging yn set en O'Brien fierder gewurde lit.

Ta Reese syn skrik wurdt Sarah beselskippe fan 'e âlde T-800-terminator Pops. Nei't er dyselde om 'e nocht en tsjin Sarah har wil besocht hat út te skeakeljen, slacht Pops him bewusteleas. As Reese letter wer by besleur komt, leit Sarah him út dat se yn 1973 op njoggenjierrige leeftyd oanfallen is troch de T-1000, dy't har âlden deade. Sysels waard rêden troch Pops, in T-800 dy't werprogrammearre wie om har te beskermjen en doe ek werom yn 'e tiid stjoerd wie nei 1973. Neitiid is se grutbrocht troch Pops. Wa't Pops werprogrammearre en weromstjoerd hat, is ûnbekend, mar it is dúdlik dat hy en de T-1000 weromstjoerd wêze moatte fan fierder yn 'e takomst as 2029.

Sarah en Pops lokje de T-1000 nei in leechsteand fabryk. Dêr reäktivearret de T-1000 de nije T-800, dy't krekt yn 1984 oankommen wie. Dy giet efter Reese oan, dy't mar nauwerneed it faaie libben derôf rêde en de T-800 ferneatigje kin. Underwilens wurdt de T-1000 ferneatige as er ûnder in stellaazje mei jerrycans sâltsoer lokke wurdt, dy't dêrop troch Sarah leksketten wurde.

Sarah en Pops hawwe yn itselde fabryk ek in provisoaryske tiidmasine boud, mar dy koene se net brûke om't se in kompjûter misten dy't avansearre genôch wie om 'e masine oan te driuwen. Troch de prosessor fan 'e ferneatige T-800 oan 'e tiidmasine ta te foegjen, meitsje se it apparaat no operatyf. Sarah is fan doel om 'e tiidmasine te brûken en reizgjen nei 1997, it jier dat it Skynet ree komt, sadat se de Oardielsdei foarkomme kin. Reese is der lykwols fan oertsjûge rekke dat as de tiidline yn 1984 feroare is, dat ek sa wêze moat mei wat Sarah as de takomst beskôget. Hy bringt him in warskôging út syn nije oantinkens oan syn bernetiid tebinnen, dêr't er út opmakket dat se ynstee nei 2017 reizgje moatte om it Skynet tsjin te hâlden. Hy hat der klauwen oan om Sarah fan syn gelyk te bepraten, mar rêdt dat úteinlik op troch wat te werheljen dat sy sels tsjin him sein hat doe't er noch mar trettjin jier wie (wat betsjutte moat dat Sarah nei 2017 reizge is).

Om't Pops yn it gefjocht mei de T-1000 in diel fan syn weefselbedekking kwytrekke is, dat jierren duorje sil ear't it wer oangroeid is, kin er net meireizgje troch de tiid. Inkeld libben weefsel (of floeiber metaal dat de foarm fan libben weefsel oannimt) kin fan 'e tiidmasine gebrûk meitsje. Pops stjoert sadwaande Reese en Sarah neaken 33 jier yn 'e takomst, wylst er sels, sa't er seit, "de lange rûte nimt". Sarah krûpt de âlde terminator oan, mar Pops seit dat er in masine is en net begrypt wêrom't minsken dingen fêstholde as se dy krekt loslitte moatte.

Yn 2017 arrivearje Reese en Sarah neaken midden op in drokke autosnelwei yn San Francisco, dêr't de enerzjybol fan it tiidreizgjen oansjenlike skea tabringt oan it weidek en ferskate auto's. Dat wurdt troch de plysje opfetten as in selsmoardoanslach, en Reese en Sarah wurdt troch resjersjeurs Matias en Cheung arrestearre op fertinking fan terrorisme. In oansjenlik ferâldere Pops stiet ûnderwilens in ein fierderop yn 'e file en kin harren sa gau net berikke. Wylst harren ferwûnings yn it sikehûs fersoarge wurde, hearre Reese en Sarah dat Genisys, in nij kompjûtersysteem dat alle apparaten op 'e wrâld oaninoar keppelje sil, oer inkele dagen yn wurking steld wurde sil. Reese wit út syn nije jeugdoantinkens dat Genisys in oare namme is foar it Skynet.

Wylst Reese en Sarah noch yn it sikehûs binne, ferskynt ynienen John Connor by harren, dy't bewiist dat er is wa't er liket te wêzen troch ferskate oantinkens op te heljen dy't er inkeld dielt mei Reese, resp. Sarah. Se ûntsnappe út 'e ôfskoattele sikehûskeamer en sykje har wei nei de parkearkelder, dêr't Pops him by harren jout en fuortendaliks John delsjit. Sarah en fral Reese binne yn alle steaten, mar as John wer oerein klaut sûnder bliuwend skansearre te wêzen, docht bliken dat er no in T-3000 is. Dat is in avansearre type terminator opboud út nanotechnology dy't him op sellulêr nivo omfoarme hat ta in masine, mei behâld fan alle kennis út syn oantinkens, mar sûnder de emoasjes en doelen dy't er as minske hie. Dat is bard doe't Reese syn reis nei 1984 begûn en John oanfallen waard troch in terminator yn 'e momkape fan in fersetsman. John is dêrnei weromreizge yn 'e tiid om te bewissigjen dat it bedriuw Cyberdyne Systems yn 2017 dochs noch it Skynet, no ûnder de nije namme Genisys, ûntwikkelje soe.

Reese, Sarah en Pops ûntkomme oan John nei't Pops him yn it gefjocht troch ferskate muorren fan it sikehûs hinne raamd hat en dêrby de tafallige ûntdekking dien hat dat de ionisearjende wurking fan in CT-scanner as in magneet wurket op 'e nanotechnologyske dieltsjes dêr't John no út bestiet. Se bejouwe har nei in stikmannich âlde ûndergrûnske bunkers yn 'e heuvels dy't útsjogge oer de Golden Gate-brêge, dêr't Pops de lêste tritich jier in wier arsenaal oan wapenreau sammele hat. Wylst se dêr binne, ûntdekt Sarah ta har ferheardens dat Pops foto's, tekenings en boartersguod fan har út har jonkheid bewarre hat. Nettsjinsteande al syn bewearings fan it tsjinstelde, liedt se dêrút ôf dat er wol deeglik gefoelens hat en fan har hâldt.

It is no noch minder as in etmiel foar't Genisys oanset wurdt en dêrmei de Oardielsdei begjinne sil. Wylst Sarah, Reese en Pops tariedings meitsje om yn te brekken yn it haadkertier fan Cyberdyne Systems, sadat se dêre de mainframekompjûter fan Genisys ferneatigje kinne, komt John harren yn 'e bunkers oer it mad. Se ûntsnappe yn in stellen skoalbus, mar wurde efterfolge troch John op in motor. Op 'e Golden Gate-brêge lit er de bus oer de kop slaan, wêrnei't dy fan 'e brêge keallet. Pops wit Sarah en Reese te rêden, mar neitiid wurde se arrestearre troch in grutte plysjemacht dy't op 'e efterfolging oer de brêge ôf kommen is. Se wurde oerbrocht nei it plysjeburo, dêr't resjersjeurs Matias en Cheung de jonge Kyle Reese en syn âlden derby frege hawwe om't Reese deselde fingerôfdrukken hat as de jonge. Mei help fan in 33 jier âldere plysje O'Brien ûntkomme Reese, Sarah en Pops út it plysjeburo ear't John harren fermoardzje kin. Sarah bewissiget dat de jonge Kyle en syn âlden ûntkomme en jout Kyle dêrby it oantinken oan har dêr't er har letter (of earder), yn 1984, mei beprate sil om nei 2017 te reizgjen ynstee fan nei 1997.

Yn in kaapte helikopter sette se ôf nei it haadkertier fan Cyberdyne Systems, wylst se John yn in oare helikopter efter harren oan krije. Pops springt fan 'e iene helikopter nei de oare oer en lit John sines delstoarte, sadat Reese en Sarah feilich lânje kinne. John oerlibbet it delstoarten lykwols sûnder skansearre te reitsjen en arrivearret it earst by Cyberdyne, dêr't er it ôftellen nei it aktivearjen fan Genisys ferflugget fan 13 oeren nei 15 minuten. Pops stelt John tydlik bûten gefjocht troch him te speetsen oan in propellorblêd fan 'e delstoarte helikopter, wêrnei't hy, Reese en Sarah op strategyske plakken yn it gebouwekompleks bommen pleatse.

John wit ûnderwilens wer los te kommen, wêrnei't er fannijs yn gefjocht rekket mei Pops. Dy wit harren tegearre fêst te setten yn it magnetysk fjild fan in noch net funksjoneel prototype fan in tiidmasine dy't John foar Cyberdyne bout. Beide terminators wurde ferneatige troch de magnetyske ynfloed, mar de kop en torso fan Pops wurde op 't lêst troch de sintrifugale krêft út 'e tiidmasine smiten en bedarje yn in reservoir mei eksperiminteel floeiber metaal. De nanotechnologyske dieltsje dêr't John út bestiet, wurde yn 'e tiidmasine lykwols folslein útinoar skuord. Underwilens litte Reese en Sarah de bommen ôfgean mei in koarte wachttiid dy't har by steat stelt om beskûl te sykjen yn in bunker ûnder it Cyberdyne-kompleks. (Dy is dêr temûk oanlein troch Pops, dy't yn 'e ôfrûne tritich jier as boufakker de bou fan it Cyberdyne-haadkertier ynfiltrearre hat.) As de bommen ôfgeane, wurdt it hiele kompleks mei de grûn lyk makke. De mainframekompjûter en alle oare technology wurdt folslein ferneatige. Inkeld Pops, dy't himsels yn it reservoir in upgrade jûn hat ta in terminator fan floeiber metaal, oerlibbet de ferwoastging. Neitiid befrijt er Reese en Sarah út 'e bunker, dy't stânholden hat, mar beskûl giet ûnder in reuseftige berch pún.

Trijeresom reizgje se nei de wente dêr't de jonge Kyle Reese opgroeit. Om 'e tiidslus folslein te meitsjen, fertelt Reese syn jongere sels dat Genisys it Skynet is, en dat it systeem ferneatige wurde kin foar't it aktivearre wurdt. Hy jout himsels opdracht om dat boadskip foar de spegel allegeduerigen tsjin himsels te werheljen. Dêrmei wurdt de oankomst fan himsels en Sarah út 1984 yn 2017 bewissige. Sarah, Reese en Pops ride fuort, de griene wrâld yn. Sarah beseft dat no, foar it earst sûnt se njoggen jier wie, har takomst wer wiid iepen leit en dat se har net mear oan it fêste skript hoecht te hâlden dat foar har fêstlein wie. Dat, it is folslein út frije wil dat se Reese tutet.

Arnold Schwarzenegger.

Emilia Clarke.

Jai Courtney.

In sêne dy't healwei de ôftiteling folget, makket lykwols dúdlik dat de systeemkearn fan Genisys, dy't yn in ûndergrûnske bunker ûnder it eigentlike Cyberdyne-kompleks sitewearre wie, de ûntploffing trochstien hat.

Rolferdieling

haadrollen

personaazje	akteur/aktrise
de Terminator, 'Pops'	Arnold Schwarzenegger¹
Sarah Connor	Emilia Clarke
Kyle Reese	Jai Courtney

byrollen

personaazje	akteur/aktrise
John Connor	Jason Clarke
resjersjeur O'Brien yn 2017	J.K. Simmons
T-1000-terminator yn 1984	Byung-Hun Lee
Alex, in T-5000-terminator dy't it Skynet belichemet	Matt Smith
resjersjeur O'Brien yn 1984	Wayne Bastrup
resjersjeur Matias	Michael Gladis
resjersjeur Cheung	Sandrine Holt
Danny Dyson	Dayo Okeniyi
Miles Dyson	Courtney B. Vance
de jonge Kyle Reese	Bryant Prince
Sarah Connor yn 1973	Willa Taylor

¹) Brett Azar wie de body double foar Schwarzenegger yn 'e sêne mei de T-800 Terminator dy't werom yn 'e tiid nei 1984 stjoerd wurdt en yn 'e sêne mei de jonge T-800 ('Pops'), dy't nei 1973 stjoerd wurdt.

Produksje en distribúsje

Produksje

Nei't The Halcyon Company yn 2009 Terminator: Salvation, de foargeande film út 'e Terminator-franchise, produsearre hie, rekke Halcyon yn finansjeel swierwaar, en moast it datselde jiers noch in fallisemint oanfreegje. Fan gefolgen waarden de rjochten op Terminator yn 2010 foar $29,5 miljoen ferkocht oan it ynvestearringsfûns Pacificor, dat de grutste skuldeasker fan Halcyon wie. Dat ferkocht se yn 2012 foar minder as $20 miljoen troch oan Megan Ellison fan Annapurna Pictures. It ferskil yn priis wie it gefolch fan in nije Amerikaanske copyrightwet, dy't makke dat de rjochten yn 2019 wer yn 'e hannen fan betinker James Cameron oergean soene. De keaper soe dus net lang fan syn oankeap profitearje kinne.

Terminator: Genisys waard regissearre troch Alan Taylor nei in senario fan Laeta Kalogridis en Patrick Lussier. As produsinten wiene (Megan har broer) David Ellison en Dana Goldberg by it projekt belutsen foar de filmstudio Skydance Productions. Foar de film wie in budget beskikber fan $155 miljoen. De kamerarezjy wie yn 'e hannen fan Kramer Morgenthau, en de filmmuzyk waard fersoarge troch Lorne Balfe.

De opnamen setten op 21 april 2014 útein en duorren oant en mei 6 augustus fan dat jier. Der waard in protte filme yn New Orleans, yn 'e Michoud Assembly Facility, in fabryk fan 'e Amerikaanske romtefeartorganisaasje NASA. Dat wie it iennichste gebou yn 'e stêd mei in romte dy't heech genôch wie dat de filmset der yn paste. Dêrnjonken waard ek hjir en dêr op lokaasje filme yn San Francisco en omkriten. It haadkertier fan 'e Oracle Corporation yn Redwood City (in bedriuw dat oprjochte wie troch Ellisoan syn heit Larry) giet yn 'e film troch foar it haadkertier fan Cyberdyne Systems. Yn 'e postproduksje waarden likernôch 1.200 special effects oan Terminator: Genisys tafoege, dy't makke wiene troch û.o. Double Negative, Moving Picture Company (MPC), Industrial Light & Magic (ILM) en Method Studios.

It haadkertier fan 'e Oracle Corporation giet yn 'e film troch foar it haadkertier fan Cyberdyne Systems.

Distribúsje

De distribúsje fan Terminator: Genisys waard fersoarge troch Paramount Pictures. De film gie op 22 juny 2015 yn Berlyn yn premiêre, en iepene dêrnei op 1 july yn 'e Amerikaanske bioskopen. It byhearrende soundtrackalbum ferskynde op 24 juny by platemaatskippij Skydance Records. De film kaam op 20 oktober 2015 beskikber as digitale download, en waard op 10 novimber fan dat jier útbrocht op dvd en blu-ray

Untfangst

Fan 'e filmkritisy krige Terminator: Genisys oer it algemien negative resinsjes. Sa omskreau Oliver Gettell de film yn 'e Los Angeles Times as "in rommelige ferfolchfilm". Reid Nakamura fan TheWrap fûn de ferhaalline, benammen wat it tiidreizgjen oangie, "fiersocht", en de aktearprestaasjes fan 'e akteurs "neat om oer nei hûs te skriuwen". Yn 'e Chicago Tribune skreau Michael Phillips dat it Terminator: Genisys oan orizjinaliteit ûntbriek. Hy beskreau de film as "net mear as aldendeiske saken en boppedat ek noch saaie aldendeiske saken."

Michael O'Sullivan fan The Washington Post hie lykwols wól aardichheid oan 'e film. Hy skreau: "Genisys grypt werom op wat de franchise oarspronklik sa goed makke: net de masine yn 'e man, mar krektoarsom." Yn it tydskrift Vanity Fair fûn Richard Lawson dat de film "in ferrassend oertsjûgjend argumint foar himsels is". Mark Hughes fan it blêd Forbes neamde alle negative resinsjes it resultaat fan "synyske nostalgy", dy't "feroaring wantrout en mislearring ferwachtet". De goedkarringspersintaazjes fan resinsjesammelingswebsiden fûn er "bespotlike en ûnfertsjinne leech".

Op 'e webside Rotten Tomatoes, dy't resinsjes sammelet, hie Terminator: Genisys in leech goedkarringspersintaazje fan 27%, basearre op 271 ûnderskate resinsjes. De konsensuskrityk fan 'e webside, gearstald út al dy resinsjes, stelt: "Mei't er fêstsûgd sit yn in betize mytology is [de film] in haperjend wjerkôgjen fan âld materiaal, dat net de tematyske djipte, konseptuele yntelliginsje of fisuele spanning hat dêr't dizze ienris machtige franchise mei begûn." Op Metacritic, de wichtichste konkurrint fan Rotten Tomatoes, behelle Terminator: Genisys in goedkarringspersintaazje fan 38%, basearre op 41 resinsjes.

Resultaat

Opbringst

Terminator: Genisys brocht yn 'e bioskopen yn 'e Feriene Steaten en Kanada $89,7 miljoen op, en yn alle oare lannen en territoaria $350,8 miljoen. Wrâldwiid kaam de opbringst dêrmei út op $440,6 miljoen. Ofset tsjin it budget fan $155 miljoen betsjut dat in winst fan $285,6 miljoen, hoewol't dêr de marketingkosten noch wol ôf moatte. Dêrmei wie Terminator: Genisys in oansjenlik kommersjeel súkses, mar om't Amerikaanske filmstudio's yn earste ynstânsje nei de opbringst yn eigen lân sjogge, dy't yn dit gefal teloarstellend leech wie, waard dochs besletten om 'e beide ferfolchfilms dy't foar Terminator: Genisys op 'e planning stiene, te skrassen. Yn 'e Amerikaanske bioskopen ûnderfûn Terminator: Genisys benammen konkurrinsje fan 'e dinosaurusfilm Jurassic World en de tekenfilm Inside Out. De grutste merk wie foar Terminator: Genisys Sina, dêr't de film $112,8 miljoen binnenswile.

Prizen

Terminator: Genisys waard nominearre foar de Saturn Award foar bêste science fiction-film en de Teen Choice Awards foar favorite simmerfilm en favorite aktrise yn in simmerfilm (Emilia Clarke).

Ferfolchfilms

It hie oarspronklik de bedoeling west dat Terminator: Genisys it earste diel wurde soe fan in filmtrilogy. Yn 'e folgjende films soene dan ferskate losse eintsje ôftriedde wurde moatte; sa moast der noch antwurd jûn wurde op 'e fraach wa't Pops nei 1973 stjoerd hie om Sarah te beskermjen, en boppedat moast noch ôfweefd wurde mei Genisys/Skynet, dat it opblazen fan it haadkertier fan Cyberdyne Systems oerlibbe hie (sa't bliken die út in sêne healwei de ôftiteling). Neffens in artikel dat yn desimber 2013 yn The Hollywood Reporter ferskynde, wiene der ek plannen foar in tillefyzjesearje op basis fan Terminator: Genisys.

De lege opbringst fan 'e film yn 'e Feriene Steaten smiet lykwols de kat yn it jern. Nettsjinsteande it feit dat Terminator: Genisys it bûten Noard-Amearika poerbêst dien hie, waard besletten alle fierdere produksjes yn it ramt fan 'e film te skrassen. Yn 2019 kamen de rjochten fan 'e Terminator-franchise wer werom by betinker James Cameron, dy't mei it folgjende diel yn 'e rige, Terminator: Dark Fate, in hiele oare rjochting út gie.

Jason Clarke, de akteur dy't yn Terminator: Genisys de rol fan John Connor spile, liet yn in fraachpetear yn april 2018 syn argewaasje blike oer dy gong fan saken. Emilia Clarke (gjin famylje) lykwols, de aktrise dy't yn Terminator: Genisys de rol fan Sarah Connor spile, sei yn in fraachpetear yn maaie 2018 dat it har neat spiet dat der gjin ferfolchfilms kommen wiene, want neffens har hie nimmen wille hân op 'e set fan Terminator: Genisys.

Keppelings om utens

• (in) Ynformaasje oer Terminator: Genisys yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.