Edge of Tomorrow (film)

Edge of Tomorrow
film
(Filmposter yn 'e Ingelske Wikipedy)
makkers
regisseur	Doug Liman
produsint	Erwin Stoff Tom Lasally Jeffrey Silver Gregory Jacobs Jason Hoffs
senario	Christopher McQuarrie Jez Butterworth John-Henry Butterworth Dante Harper Joby Harold Simon Kinberg
basearre op	All You Need is Kill fan    Hiroshi Sakurazaka
kamerarezjy	Dion Beebe
muzyk	Christophe Beck
filmstudio	Village Roadshow Pictures RatPac-Dune Entertainment 3 Arts Entertainment Viz Productions
distribúsje	Warner Bros.
spilers
haadrollen	Tom Cruise Emily Blunt
byrollen	Bill Paxton Brendan Gleeson Jonas Armstrong Kick Gurry Charlotte Riley
skaaimerken
lân/lannen	Feriene Steaten
premiêre	28 maaie 2014
foarm	langspylfilm
sjenre	science fiction-oarlochsfilm
taal	Ingelsk
spyltiid	113 minuten
budget en resultaten
budget	$178 miljoen
opbringst	$370,5 miljoen
prizen	1 × Saturn Award

Edge of Tomorrow is in Amerikaanske science fiction-oarlochsfilm út 2014 ûnder rezjy fan Doug Liman, mei yn 'e haadrollen Tom Cruise en Emily Blunt. De titel betsjut "[Op 'e] Râne fan Moarn". De byhearrende slogan Live, Die, Repeat betsjut "Libje, Stjer, Werhelje". De film spilet yn in apokalyptyske, dystopyske takomst wêryn't it meastepart fan Jeropa ferlern gien is by in ynvaazje fan bûtenierdske wêzens. It ferhaal folget majoar William Cage, en p.r.-man fan it Amerikaanske Leger sûnder ûnderfining mei eigentlike gefjochten, dy't troch syn oerhearrigen twongen wurdt om mei te dwaan oan in amfibyske operaasje op 'e Frânske kust. As er dêr sneuvelet, wurdt er lykwols wer wekker op 'e foargeande deis en beseft er (úteinlik) dat er yn in tiidlus belâne is. Edge of Tomorrow krige fan 'e filmkritisy oer it algemien positive resinsjes en wie kommersjeel súksesfol yn 'e bioskopen. In mooglike ferfolchfilm, mei as titel Live, Die, Repeat and Repeat, sit anno 2022 fêst yn 'e preproduksjefaze.

Plot

Yn 'e neie takomst arrivearje bûtenierdske wêzens dy't troch de minsken mimics neamd wurde, fia in asteroïde-ynslach yn Jeropa. Nei in stadich begjin feroverje se yn 'e jierren dêrnei it hiele fêstelân fan it kontinint. Fiif jier letter behellet de Feriene Ferdigeningsmacht (UDF), in wrâldwide militêre alliânsje dy't oprjochte is om 'e bûtenierdske ynvaazje tsjin te kearen, by Verdun einlings in oerwinning oer de mimics troch de ynset fan troepen yn nij ûntwikkele meganyske eksoskeletten. Heldinne fan dy striid is de Britske sersjant Rita Vrataski, dy't troch de media de "Ingel fan Verdun" neamd wurdt, hoewol't se mank de sljochtwei soldaten bekend stiet as de "Izeren Teef".

Nei de oerwinning by Verdun makket de UDF plannen foar in grutte ynvaazje fan Frankryk út Ingelân wei. Majoar William Cage, in glêde p.r.-man fan it Amerikaanske Leger, arrivearret per helikopter yn Londen, dêr't er opwachte wurdt troch de swarte korporaal Julie Montgomery. Hy wurdt dêr tafoege oan 'e stêf fan 'e Britske generaal Brigham, dy't de lieding oer de op hannen wêzende militêre operaasje hat. Cage hat noch nea oan it front west, en hy is in leffert dy't dat graach sa hâlde wol. As Brigham him mei de earste weach fan 'e troepen mei nei Frankryk stjoere wol om der foar de media ferslach fan te dwaan, liket dat him dan ek wol nei fleanen. Hy betanket foar dy ear, en as Brigham tsjin him seit dat it gjin útnûging mar in befel is, besiket er op wanhopige wize de generaal te sjantearjen troch te sizzen dat er der troch syn kontakten mei de media foar soargje kin dat Brigham de skuld fan eventuele takomstige nederlagen kriget.

Brigham lit soks lykwols net oer syn kant gean. Hy lit Cage arrestearje troch de militêre plysje, en as de majoar besiket út te naaien, wurdt er tasere en rekket er bewusteleas. As Cage wer bykomt, befynt er him op 'e Ynternasjonale Lofthaven Heathrow, dat no in militêre basis is. Hy ûntdekt dat Brigham him yn rang weromset hat nei soldaat, en dat er as deserteur oerlevere is oan 'e net sa sêftsinnige soargen fan sersjant-ynstrukteur Farell. Dyselde dielt him yn by Seksje J, in militêre ienheid dy't dochs al foltroppe is mei aparte figueren. De oare soldaten sitte der net op te wachtsjen om op in deserteur passe te moatten en litte dat dúdlik blike. De rest fan 'e dei bringt Cage mei de oare leden fan Seksje J yn training troch en nei in koarte nacht fynt de oare moarns de ynvaazje plak.

De amfibyske operaasje op it Frânske strân rint út op in folslein fiasko, mei't bliken docht dat de mimics der ree foar binne en de UDF opwachtsje. Farell en de rest Seksje J sneuvelje al rillegau. Cage is der tsjûge fan hoe't ek Rita Vrataski omkomt. Neitiid brûkt er in M18 Claymore-myn om in ûngewoan grutte, blauwe mimic, en by fersin ek himsels, op te blazen. Hy rekket deadlik ferwûne, mar wylst er yn it stjerren leit, rekket er oerdutsen troch de bloed fan it bûtenierdske wêzen, dat fia syn wûnen syn lichem yn kringt. Hy stjert en alles wurdt swart.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Cage skrikt wekker en ûntdekt dat er wer op Heathrow is, op itselde stuit as doe't er dêr in dei earder bykaam út bewusteleazens nei't er tasere wie. Deselde foarfallen fan 'e foarrige deis spylje har wer ôf. Cage besiket oan sersjant Farell út te lizzen dat der wat nuvers oan 'e hân is, mar wurdt negearre. Hy wurdt by Seksje J yndield, bringt de rest fan 'e dei troch mei training, nimt nei in koarte nacht diel oan 'e ynvaazje en sneuvelet wer op it strân yn Frankryk, wêrnei't er wer wekker wurdt op Heathrow. Hy makket tsientallen kearen dyselde tiidlus troch, wêrby't de lytse feroarings dy't er besiket oan te bringen by einsluten gjin oare útkomst ta gefolch hawwe. Op in kear besiket er it libben fan Rita Vrataski te rêden. As sy sjocht dat er op 'e sekonde sekuer wit wannear't wêr in mimic opdûke sil, beseft se wat der mei him oan 'e hân is en jout se him befel om har op te sykjen as er de earstfolgjende kear wer wekker wurdt.

As Cage wer wekker wurdt op Heathrow, moat er earst oan Farell en Seksje J sjen te ûntkommen, wat er klearspilet troch by it opdrukken ynienen fansiden ûnder in ridende frachtwein troch te rôljen. Nei't er in kear deariden is, perfeksjonearret er syn timing. Hy siket Vrataski op en fertelt har wat sy de oare kear tsjin him sein hat. Hja is der maklik fan te oertsjûgjen dat er yn in tiidlus fêstsit, om't harsels foar Verdun itselde oerkommen is. Vrataski nimt him mei nei dr. Noah Carter, in ekspêr yn mimic-biology dy't omreden fan syn ekstreme ideeën yn ûngenede fallen is.

Syn teory is dat de mimics eins ien superorganisme foarmje, wêrfan't de tige seldsume blauwe wêzens, de "alfa's", analooch oan it senuwstelsel binne en de sljochtwei soldaten behearskje. De harsens wurde foarme troch ien inkeld wêzen, dat Carter oantsjut as de "omega". De omega hat it fermogen om 'e tiid te behearskjen; as der in alfa omkomt, set de omega de tiid in dei werom en past er syn taktyk oan oant de striid wûn wurdt. Trochdat it bloed fan 'e alfa dy't er deade mei syn eigen bloedstream fermongen rekke is, hat Cage by fersin it fermogen om 'e tiid in dei werom te setten 'kaapt'. Vrataski hie itselde fermogen en libbe mear as 300 kear deselde dei by de slach om Verdun, oant se op in kear ferwûne mar net dea rekke, in bloedtransfúzje tastjinne krige en dêrmei it fermogen om 'e tiid werom te setten ferlear. Se seit tsjin Cage dat er de fizioenen brûke moat, dy't nei ferrin fan tiid mei syn fermogen mank geane, om 'e omega te lokalisearjen en de deadzjen, om't dat de iennichste mooglikheid is om 'e bûtenierdske ferovering fan 'e hiele wrâld tsjin te kearen.

Wylst se wachtsje oant Cage fizioenen fan 'e omega begjint te krijen, wurdt er lus nei lus troch Vrataski traint, sadat er úteinlik begjint út te blinken as fjochter. Mentaal nimme de lussen lykwols har tol, en om't it dochs neat útmakket, knypt Cage der op in kear tuskenút om in frije dei yn Londen troch te bringen. Wylst de ynvaazje op it strân yn Frankryk mislearret, sit hy yn in Londenske kroech oan it bier nei de berjochten op 'e tillefyzje te sjen. As de elektrisiteit útfalt, giet er nei bûten ta en is er der tsjûge fan hoe't de mimics in tsjinynvaazje fan Londen útfiere, wêrby't de stêd ferwoastge wurdt. Mei't er no begrypt dat it mislearjen fan 'e ynvaazje de definitive nederlaach fan 'e minskheid ynliede sil, smyt Cage him mei nammenste mear oandriuw op syn training.

De fizioenen dy't er meitiid kriget, binne fan in keardaam yn Dútslân, dêr't de omega him yn 'e katakomben ûnder de daam beskûl hâldt. Netiid bringe Cage en Vrataski, mei help fan Carter, in grut tal lussen troch mei út te sykjen wêr't dat krekt is en hoe't se der komme kinne. Mei't Vrataski no al withoefolle dagen de iennichste persoan is mei wa't er echt kontakt hat, begjint Cage gefoelens foar har te krijen. Foar har leit dat hiel oars: sy ken him eltse kear mar ien dei, en se hat mei dêrtroch inkeld belangstelling foar de misje. Meitiid slagget it Cage en Vrataski einlings om by de ynvaazje fan it strân ôf te kommen. Se stelle in efterlitten auto op in útstoarne camping en ride dêrmei it Frânske binnenlân yn oant de benzine op is. Rinnende fine se in boerespultsje dêr't in helikopter stiet foar gewaaksbesproeiïng. Hoe faak oft er it ek besiket, Cage kin gjin mooglikheid fine om Vrataski foarby dat punt te loadsen: as se de helikopter start, lokket dat mimics oan en sy komt eltse kear om yn it gefjocht.

Mei't er syn nocht derfan hat om tasjen te moatten hoe't sy deagiet, betinkt er him yn in nije tiidlus, wêryn't er him al út gewoante wei by har melden hat. As se freget wat er fan har wol, seit er dat er him fersind hat en jout er him ôf. De oare deis wit er allinnich fan it strân te kommen en mei de helikopter de keardaam te berikken. It docht lykwols bliken dat de omega harren te fiter hân hat: it wêzen is net by de keardaam, mar wol in alfa dy't in mûklaach foar Cage opset hat. De alfa besiket him libben yn 'e hannen te krijen om him syn fermogen om 'e tiid werom te setten, ôf te nimmen. Mar Cage ferdrinkt himsels mei opsetsin yn it grûnwetter dat ûnder de daam opsiperet om dat foar te kommen.

Yn 'e folgjende lus leit er syn befinings foar oan Vrataski en Carter. Neffens Vrataski is der no noch mar ien mooglikheid oer. Carter hie in prototype fan in apparaat boud dat kontakt meitsje koe mei it senuwstelsel fan in alfa om sa de lokaasje fan 'e omega gewaar te wurden. It probleem is lykwols dat dat apparaat him ôfpakt is doe't er yn ûngenede foel; it leit no efter slot en skoattel yn in klûs yn it kantoar fan generaal Brigham. As Carter derop wiisd dat se mei dat apparaat noch altyd in alfa sjen moatte te fangen, antwurdet Vrataski dat it mei Cage, dy't de fermogens fan in alfa hat, ek wurkje moatte soe. It kostet tsientallen tiidlussen foar't it Cage en Vrataski slagget om mei súkses it haadkantoar fan it Britsk Ministearje fan Definsje binnen te kringen en noch mear om Brigham safier te krijen dat er harren it apparaat jout.

Neitiid stjoert Brigham lykwols de militêre plysje efter harren oan, sadat se noch mear tiidlussen kwyt binne om te learen hoe't se mei súkses ûntsnappe kinne. As dat op 't lêst slagget, stekt Vrataski ûnder in auto-efterfolging troch de Londenske binnenstêd it apparaat yn Cage syn boppeskonk, wêrnei't er de omega yn it wetter yn in parkearkelder yn Parys sjocht, rjocht ûnder de Glêzen Piramide foar it Louvre. Fuort dêrnei komt de efterfolging ta in abrupte ein as in soldaat yn in meganysk eksoskelet harren auto tsjinkeart. Cage en Vrataski reitsje út 'e tiid, en as Cage wer bykomt, leit er yn in militêr hospitaal, dêr't er krekt in bloedtransfúzje krigen hat en sa syn fermogen om 'e tiid werom te setten ferlern hat.

Cage en Vrataski beseffe dat dit harren alderlêste kâns is om 'e omega út te skeakeljen: as se diskear deageane, bliuwe se gewoan dea. Se ûntsnappe út it militêr hospitaal en rekrutearje Seksje J foar in nachtlike misje nei Parys. De soldaten reitsje al heal oertsjûge fan Cage syn ferhaal om't er alderhanne dingen fan harren wit dy't se him beslist nea ferteld hawwe (ynsafier't se witte), en as blykt dat Vrataski de lieding oer de misje hat, smite se harren gewicht der folslein efter. Oankommen yn Parys offerje de soldaten fan Seksje J harren ien foar ien op om Cage en Vrataski by it Louvre te krijen. As dêr by de yngong nei de kelder in alfa de wacht hâldt, lokket Vrataski dy fuort mei fatale gefolgen foar harsels, om't Cage troch syn seare skonk net drave kin. Cage smyt himsels yn it gat nei de kelder, dêr't er yn it wetter falt en omleech swimt nei de omega. De alfa kriget him te pakken, en trochboarret him mei in tentakel, mar net foar't Cage de pinnen út in hiele gurle mei hângranaten lûkt en de gurle loslit, sadat dy yn it wetter omleech sakket nei de omega. De dêropfolgjende eksploazje deadet de omega, wat de alfa's en gewoane mimics oeral yn 'e wrâld op slach ferswakket om't se gjin sintrale lieding mear hawwe.

Wylst in stjerrende Cage deabliedend en ferdrinkend troch it wetter omleech sakket, driuwt er troch it bloed fan 'e omega hinne. Nei't er stoarn is, wurdt er wekker yn 'e helikopter nei Londen, dêr't er opwachte wurdt troch de korporaal Julie Montgomery. Hy beseft dat troch de ynfloed fan it bloed fan 'e omega de tiid twa dagen tebekset is. It Londen wêryn't er arrivearret, is lykwols net itselde Londen dêr't er oarspronklik yn oankaam: oeral liede de tsjerkklokken om 'e oerwinning te fieren, want in ûntploffing fan ûnbekende oarsprong yn it sintrum fan Parys, de jûns tefoaren, hat blykber it fermogen fan 'e mimics ferneatige om noch te fjochtsjen. Op it nijs fertelt generaal Brigham dat er ferwachtet dat de lâning op 'e Frânske kust, moarn, sûnder swierrichheden ferrinne sil. Cage bejout him nei Heathrow, dêr't er de hiele Seksje J libben en wol trainen sjocht foar't er Vrataski opsiket, lykas er ûntelbere kearen earder dien hat. As hja him as ofsier like kâld begroetet as hja yn alle foargeande lussen mei him as sljochtwei soldaat die, moat Cage laitsje.

Tom Cruise.

Emily Blunt.

haadrollen

personaazje	akteur/aktrise
majoar William Cage	Tom Cruise
sersjant Rita Vrataski	Emily Blunt

byrollen

personaazje	akteur/aktrise
sersjant-ynstrukteur Farell	Bill Paxton
generaal Brigham	Brendan Gleeson
soldaat Skinner	Jonas Armstrong
soldaat Griff	Kick Gurry
soldaat Nance	Charlotte Riley
soldaat Kimmel	Tony Way
dr. Noah Carter	Noah Taylor
soldaat Ford	Franz Drameh
soldaat Kuntz	Dragomir Mrsić
Takeda	Masayoshi Haneda
korporaal Julie Montgomery	Madeleine Mantock
dr. Whittle	Marianne Jean-Baptiste

Produksje en distribúsje

Produksje

Edge of Tomorrow is basearre op 'e roman All You Need is Kill (ûnder dy Ingelske titel ferskynd yn it Japansk), fan 'e Japanske skriuwer Hiroshi Sakurazaka, út 2004. Yn 2009 ferskynde dat boek yn in Ingelske oersetting ûnder deselde titel by útjouwerij Viz Media. De útjefte loek de belangstelling fan filmprodusint Erwin Stoff fan filmstudio 3 Entertainment, dy't datselde jiers noch in opsje op 'e filmrjochten naam. Om ta in ferfilming te kommen, gie 3 Arts Entertainment in joint venture oan mei Viz Productions, de filmproduksjedifyzje fan útjouwerij Viz Media, dêr't filmprodusint Jason Hoffs oan it roer stie. Ynstee dat se in pitch skreaune, in koarte útlis om it idee foar de ferfilming út te suteljen by gruttere studio's, besleaten se in spec skript skriuwe te litten (in senario wêrfan't by it skriuwen noch net bekend is oft it wol ferkocht wurde kinne sil).

Dat skript waard skreaun troch Dante Harper, dy't der acht moannen mei besteld wie. Doe't it ôf wie, waard it yn april 2010 fuortendaliks oankocht troch de Amerikaanske filmstudio Warner Bros., foar de priis fan $3 miljoen. Yn juny 2011 waard Joby Harold oannommen om it senario om te wurkjen. Doug Liman, dy't oannommen waard as regisseur, ferwiisde in healjier foar't de opnamen begjinne soene, twatrêdepart fan it skript fan Harper nei de foddekoer. Jez en John-Henry Butterworth waarden ynset om it senario op 'e nij te skriuwen. Letter naam Simon Kinberg it fan harren oer, en acht wiken foar de opnamen waard Christopher McQuarrie frege om in nije ein foar de film te betinken, om't de ein fan 'e roman en it eardere skript as te somber beskôge waard. Uteinlike wiene de opnamen al begûn doe't McQuarrie noch mei de ein fan 'e film oan 'e gong wie.

Regisseur Doug Liman.

Warner Bros. woe oarspronklik Brad Pitt foar de haadrol hawwe, mar dy betanke foar de ear. Tom Cruise hie wol belangstelling. In grut part fan 'e oandriuw fan 'e filmmakkers om it senario wat luchtich te hâlden en de somberens derút te skriuwen, kaam eins út Cruise syn koker, dy't allegeduerigen timmere op 'e humor dy't neffens him yn 'e serieuze film ferwurke wurde moast. Foar it úteinlike senario krigen inkeld McQuarrie en de Butterworths in fermelding op 'e ôftiteling. Behalven Stoff en Hoffs wiene ek Tom Lasally en Jeffrey Silver as produsint by it projekt belutsen, foar de filmstudio's Village Roadshow Pictures en RatPac-Dune Entertainment. Foar de film wie in budget beskikber fan $178 miljoen. De kamerarezjy wie yn 'e hannen fan Dion Beebe, en de filmmuzyk waard fersoarge troch Christophe Beck.

Opnamen

De opnamen foar Edge of Tomorrow setten op 1 oktober 2012 útein yn 'e Warner Bros. Studios, Leavesden yn it Ingelske greefskip Hertfordshire. Hoewol't it oarspronklik de bedoeling west hie fan regisseur Liman om 'e gefjochtssênes by de amfibyske operaasje op it strân op lokaasje op in strân te filmjen, waard der úteinlik foar keazen en doch dy opnamen yn 'e studio foar in grienskerm, dêr't troch special effects letter de eftergrûn efter plakt waard. Foar dy eftergrûn waarden bylden fan 'e Saunton Sands oan 'e kust fan Devon brûkt. Wol waard der op 24 novimber op lokaasje filme op Trafalgar Square, yn Londen, wêrfoar't 36 strjitten ôfsletten en 122 busrûtes omlaat wurde moasten. De sênes op "Heathrow" waarden eins opnommen op in eardere legerbasis by Barton Stacey, yn Hampshire.

It wie de bedoeling dat de lâningsoperaasje yn 'e film de sjoggers tinke litte soe oan soartgelikense fjildslaggen út 'e Twadde Wrâldoarloch, lykas D-Day en de Evakuaasje fan Dúntsjerk. Fierders waard ek aktyf besocht om 'e film wat it oansjen fan in fideospultsje te jaan, mei't Sakurazaka by it skriuwen fan syn roman dêrtroch beynfloede wie. Dêrby gie it benammen om it stjerren en wer wekker wurden fan 'e haadpersoan, dat lykstrekich opgiet mei it respawnen yn fideospultsjes, wêrby't in spiler op in beskaat level wer by it begjin begjinne moat as syn avatar omkomt foar't er dat level mei súkses ôfslute kinnen hat.

Haadrolspiler Tom Cruise yn 2014 yn Parys, by de Frânske premiêre fan Edge of Tomorrow.

Distribúsje

De distribúsje fan Edge of Tomorrow waard fersoarge troch Warner Bros. De film gie op 28 maaie 2014 yn Londen yn premiêre en iepene dêrnei op 6 juny yn 'e Amerikaanske bioskopen. It byhearrende soundtrackalbum ferskynde op 3 juny 2014 by platemaatskippij WaterTower Music. Op 23 septimber fan dat jier kaam Edge of Tomorrow út op dvd en blu-ray.

Untfangst

Fan 'e filmkritisy krige Edge of Tomorrow oer it algemien positive resinsjes. Sa omskreau Todd McCarthy de film yn The Hollywood Reporter as in "narratologysk ambisjeuze science fiction-aksjefilm" dy't "relatyf boartlik omgiet mei de bekende fjildslachklisjees." Hy tekene dêrby oan dat er, nettsjinsteande de humor, it útgongspunt fan in tiidlus "ferfeelsum" fûn, en ek omskreau er de klimaks by en ûnder it Louvre as "dramatysk net oertsjûgjend en fisueel troebel". De special effects yn 'e film priizge er lykwol as "spannend" en "echt lykjend". Yn 'e Los Angeles Times neamde Kenneth Turan Edge of Tomorrow "spannend en ûnferwachts". Foar him trochbriek de film in rige "út deselde mal sleine, déjà-vu-kaskreakers".

Op 'e webside Rotten Tomatoes, dy't resinsjes sammelet, hie Edge of Tomorrow in tige heech goedkarringspersintaazje fan 91%, basearre op 325 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[De film] is spannend, goed aktearre, grappich en fernimstich, en leveret dêrmei it bewiis dat Tom Cruise noch altyd mear as kapabel genôch is om it gewicht fan in kaskreaker […] te dragen." Op Metacritic, de wichtichste konkurrint fan Rotten Tomatoes, behelle Edge of Tomorrow in goedkarringspersintaazje fan 71%, basearre op 43 resinsjes.

Resultaat

Opbringst

Edge of Tomorrow brocht yn 'e bioskopen yn 'e Feriene Steaten en Kanada $100,2 miljoen op, en yn alle oare lannen en territoaria $270,3 miljoen. Wrâldwiid kaam de opbringst dêrmei út op $370,5 miljoen. Ofset tsjin it budget fan $178 miljoen betsjut dat in winst fan $192 miljoen, hoewol't dêr de marketingkosten noch wol ôf moatte.

Prizen

Edge of Tomorrow waard yn 2015 by de Saturn Awards nominearre foar prizen yn sân kategoryen, wêrûnder bêste science fiction-film, bêste regisseur, bêste akteur (Tom Cruise), bêste aktrise (Emily Blunt), bêste senario en bêste special effects. De film wûn de Saturn foar bêste filmmontaazje (James Herbert en Laura Jennings). Edge of Tomorrow wûn ek de Annie Award yn 'e kategory treflik animearre effekten yn in live action-produksje en de Critics' Choice Movie Award foar bêste aktrise yn in aksjefilm (Emily Blunt). Edge of Tomorrow waard fierders nominearre foar noch trije Critics' Choice Movie Awards, in Empire Award (foar Blunt), trije Teen Choice Awards en de Hugo Award foar bêste dramatyske presintaasje (lange foarm).

Mooglike ferfolchfilm

Yn in fraachpetear mei it tydskrift Collider fertelde senarioskriuwer Christopher McQuarrie al yn desimber 2015 dat Tom Cruise in idee foar in ferfolch op Edge of Tomorrow hie. Yn april 2016 liet Doug Liman him dêrfoar as regisseur fêstlizze, en yn maaie 2017 makke er bekend dat de ferfolchfilm Live, Die, Repeat and Repeat komme soe te hjitten, in ferwizing nei de slogan fan Edge of Tomorrow: Live, Die, Repeat. Yn maart 2018 sei Emily Blunt dat sysels, Cruise en Liman allegear tige entûsjast wiene oer de ferfolchfilm. Nei in protte fertragings wie Live, Die, Repeat and Repeat yn jannewaris 2020 neffens Liman noch altyd yn 'e preproduksjefaze. Dat jier soarge de koroanapandemy foar fierdere fertraging. Yn maaie 2021 sei Blunt dat in ferfolchfilm op dat stuit, mei de beheinings dy't omreden fan 'e pandemy ynsteld wiene, te djoer wêze soe om te meitsjen.

Keppelings om utens

• (in) Offisjele webside fan Edge of Tomorrow
• (in) Ynformaasje oer Edge of Tomorrow yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Edge of Tomorrow fan Wikimedia Commons.