Wikipedia

Pablo González Yagüe

eusko-errusiar kazetaria eta politologoa
2800:150:125:6fb:c061:444a:bf22:3222 (eztabaida)(r)en berrikusketa, ordua: 21:05, 16 iraila 2024

Pablo González Yagüe jaio zenean Pavel Rubtsov (Mosku, Sobietar Errepublika Sozialisten Batasuna, 1982ko apirilaren 28a) kazetaria, politologoa edota zelataria da. Errusian jaioa, euskal jatorria du, eta Bizkaiko Nabarniz herria du bizileku.[1] La Sexta telebista kateko eta Gara eta Público egunkarietako kolaboratzailea da. Aditua da Ekialdeko Europako gatazketan, eta berriemaile berezia izan da Ukrainako eta Karabakh Garaiko gerretan.[2]

Pablo González Yagüe

Bizitza
Jaiotzako izen-deiturakПа́вел Алексе́евич Рубцо́в
JaiotzaMosku, 1982ko apirilaren 28a (42 urte)
Herrialdea Bizkaia
BizilekuaNabarniz
Familia
Bikotekidea(k)
Hezkuntza
Hizkuntzakerrusiera
gaztelania
euskara
ingelesa
Jarduerak
Jarduerakkazetaria eta espioia
Enplegatzailea(k)La Sexta
Gara
Público
KidetzaMain Intelligence Directorate (Soviet Union) (en) Itzuli
Twitter: PabVis Edit the value on Wikidata

Errusiako Gobernuarentzat espioitza lanak egiten zituela egotzita, Poloniak preso izan zuen 2022ko otsailaren 28az geroztik, bakartuta eta tortura psikologikoaren pean, akusazio formalik egin gabe, Pabloren aurkako inongo frogarik erakutsi gabe eta epaiketarik egin gabe. Pablok nazionalitate bikoitza du, Espainiakoa eta Errusiakoa, baina Espainiak eta Europar Batasunak (bai Polonia, bai Espainia Europar Batasuneko kide dira) ez zuten ezer egin giza eskubideen eta prentsa askatasunaren aurkako urraketa horren aurka.[3] Azkenean, ia bi urte eta erdiz preso egon ondoren, Errusiak lortu zuen Poloniak Pablo askatzea, 2024ko abuztuaren 1ean.


ZELATARIA :P

Bizitza pertsonala

1982an jaio zen Moskun.[4] Haren aitona Errusiako umeetako bat izan zen; 1936an piztu zen Espainiako Gerra Zibilagatik Euskal Herritik Sobietar Errepublika Sozialisten Batasunera ihes egin behar zuten haurretako bat, alegia.[1]

Gonzalez aditua da Europako Ekialdeko herrialdeen historian eta politikagintzan, eta eskarmentu handia du munduko alderdi hartako gatazketan. Hori dela eta, Euskal Herriko eta Espainiako hedabide ugarirentzat lan egin du.

Gonzalez Nabarnizen bizi da, bere bikotekide Oihana Goirienarekin eta bikotearen hiru semeekin (Pablo atxilotu zutenean, 14, 9 eta 7 urte zituzten).[5][3]

Aleksey Rubtsov eta Pavel Rubtsov ezizenak ere izan ditu. Rubtsov bere aita errusiarraren abizena da. Bere gurasoak banatu zirenean, Pablok amaren abizena hartu eta bere izena gaztelaniaratu zuen.[6]

Atxilotua izan baino lehenagotik, zelatatua

Atxilotua izan baino hilabete lehenago, Donbassen kazetari lanetan ari zela, Ukrainako zerbitzu sekretuen dei bat jaso zuen. Lehenbailehen Kievera joateko esan zioten, galdeketa bat egin ziezaioten. Públicok zabaldu zuenez, galdeketa horretan «errusiazaletzat» jo zuten Gonzalez, Gararentzat lan egin izana egotzi zioten, eta susmagarritzat hartu zuten, Laboral Kutxako kreditu txartel bat izateagatik. Errusieraz ondo jakiteak eta inguruaz zuen ezagutzak ere sorrarazi zizkieten susmoak zerbitzu sekretuei, hedabide horren arabera. Azkenean, hiru eguneko epean Ukrainatik alde egitera «gonbidatu» zuten, nahiz eta kanporatze agindurik ez zioten ezarri.

Artean Ukrainan zegoela, CNI Espainiako zerbitzu sekretuetako agenteak Gonzalezen senideen etxeetara joan ziren, Euskal Herrian eta Katalunian, Gonzalezen inguruko informazio eske. Horren berri izatean, Boyek Gonzalezi lehenbailehen Espainiako Estatura itzultzeko eskatu zion, abokatuak Berriari adierazi zionez. Etorri zenean, baina, inork ez zuen harengana jo. «Berriz hara itzuli arte itxaron dute haren kontra egiteko», gehitu zuen abokatuak.[7]

Polonian preso

Ukrainako inbasioaren berri-emaile lanetan ari zela, 2022ko otsailaren 28an Poloniako kontraespioitza zerbitzuek atxilotu eta espetxeratu zuten Errusiako Gobernuko inteligentzia zerbitzuentzat lan egitea egotzita.[1] Harrezkero preso da Rzeszów hirian. Poloniak jakinarazi zuen litekeena zela zenbait hilabete igarotzea epaiketa egin arte.[8]

2022ko matxoaren 10an Europako Kontseiluak Pablo Gonzalezen atxiloketa salatu zuen.[9] eta bi egun lehenago Eusko Jaurlaritzak epaiketa «justu eta azkar bat» eskatu zuen Pablo Gonzalez kazetari bizkaitarrarentzat.[2]

Euskal Herriko PEN klubak eskatu zuen gerra ez erabiltzeko adierazpen askatasuna murrizteko eta PENeko ordezkaria den Urtzi Urrutikoetxeak adierazi zuen Ukrainako kideekin harremanetan zeudela, eta, besteak beste, Polonian atxilotuta zegoen Pablo Gonzalez kazetari euskal herritarra gogoratu zuen.[10]

Atxiloaldia luzatzea

Pablo Gonzalez kazetariaren atxiloaldia luzatzeko eskatu zuten maiatzaren 16an Delinkuentzia Antolatuaren eta Ustelkeriaren Arloko Poloniako Fiskaltzaren ordezkariek. Eskaera egin ondotik, epaileek zazpi eguneko epemuga zuten eskaera aztertu eta erabaki bat hartzeko. Azkenean, Poloniako Przemyślgo eskualdeko auzitegiak onartu egin du fiskaltzaren eskaera, eta, hala, Pablo Gonzalez kazetariak beste hainbat hilabetez egon behar izan zuen atxiloaldian eta konfiantzazko abokatuarekin hitz egiteko aukerarik izan gabe.[11]

Konfiantzako abokaturik gabe

Pablo Gonzalez kazetariaren Gonzalo Boye abokatuak sareetan zabaldu zuenez, Poloniak ofiziozko abokatu bat ezarri dio kazetariari. Hala ere, Boyek salatu du abokatu horrekin harremanetan jartzen saiatu zirela Poloniako agintariek helarazi zizkioten datuekin, baina ezinezkoa zela abokatuarekin kontaktatzea.[8]

Espainiak Polonian duen kontsulak Gonzalezekin hitz egin zuen eta, horri esker, senideek bazekiten kazetaria ondo zegoela «animoz eta osasunez»; baina hamahiru egun igaro ostean Gonzalezek bere abokatuarekin hitz egin ez izana ez dator bat Europako Batasunean ustez indarrean dauden oinarri demokratikoekin.

«Kontsula astelehen goizean egon zen harekin, eta niri astelehen arratsaldean eman zidaten horren berri», azaldu zuen Gonzalezen bikotekide Oihana Goirienak: «Geroztik ez dugu albiste gehiago izan. Ez da beste inorekin egon. Abokatuarekin kontaktuan nago egunero, eta ez dit ezeren berririk eman».[12]

2022ko martxoaren 23an Poloniak ohar bat bidali zion kazetariaren bikotekideari. Hartan, jakinarazi zioten Gonzalez maiatzaren 29ra arte egongo zela kartzelan, Rzeszóweko eskualdeko auzitegiak aginduta. Haren aurkako «frogak» zeudela zioen gutunak, baina ez zuen haien berri ematen.

Kazetaria aipatzeko, Pavel Rubtsov eta Aleksei Rubtsov izenak ere erabiltzen zituen gutunak. Haiek, senideen arabera, Gonzalezek errusiar pasaportean duen deitura eta haren aitarena dira, hurrenez hurren. Izan ere, haren gurasoak banatzearekin hartu zuen Pablo Gonzalez deitura —errusiar izenaren itzulpena eta amaren abizena dira—, baina haiek ez zituen aldatu errusiar dokumentazioan. Hala, ingurukoen kezka zen haren aurkako ustezko frogen artean egotea identitate ezberdinak dituelako ustea.

Polonia zuzenean senideekin harremanetan jarri zen lehen aldia izan zen. Halere, kazetariak oraindik ez zuen Boyerekin eta senitartekoekin hitz egiterik izan. Hura ikusi duen bakarra Espainiak herrialde hartan zuen kontsula da. Martxoaren 7an izan zen espetxean, eta Gonzalez «animoz eta osasunez» ondo dagoela adierazi zuen, baita errugabea dela irmo defendatu zuela ere.

Bere herriaren laguntasuna

Hasieratik Nabarnizko herriak bere babesa eta elkartasuna erakutsi dio. Besteak beste martxoaren 6an Nabarnizeko plaza lepo bete zen euripean eta, bukatzeko, txalo zaparrada egin zuten Pablo Gonzalezen askatasunaren alde. Frontoia inauguratu zen egunetik ez zuten hainbeste jende ikusten Busturialdeko herri honetan (260 biztanle). Udalean ordezkaritza duten bi taldeek (EH Bildu eta EAJ) aho batez onartutako ekitaldia egin zen igande eguerdi horretan, hainbat komunikabiderekin batera.[13]

Kazetari eta hedabide batzuen laguntasuna

2022ko martxoaren 4an Berriako langile batzordeak ohar kaleratu zuen Pablo Gonzalez kazetariaren egoeraren inguruan. Gonzalez «berehala» askatzeko eskatu zuten, eta «elkartasun eta babes osoa» agertu nahi izan zieten haren gertuko guztiei. Hauxe zioen oharrak:[14]

« Pablo Gonzalez kazetaria behin-behinean espetxeratu dute Rzeszówen (Polonia), 'espioitza delitua' egotzita. Hori ikusirik, BERRIAko langile batzordeak zera adierazi nahi du:

1. Gonzalez berehala askatzeko eskatzen du, eta elkartasun eta babes osoa agertu nahi die haren gertuko guztiei.

2. Kazetarien lana, kasu honetan Pablo Gonzalezena, ezinbestekoa izaten ari da Ukrainako gerraren berri zuzena izateko. Hura atxilotzeak eta espetxeratzeak Gonzalezen giza eskubideak urratzen ditu, baina, horrez gain, eraso egiten die prentsa askatasunari eta herritarrek informazioa jasotzeko duten eskubideari.

3. Kezkagarria iruditzen zaigu Gonzalezen aurka akusazio larriak egitea —espioitza delitua egoztea—, eta kezkagarriak, era barean, haren atxiloketaren inguruan zabaldu diren informazioak. Kazetari baten sorterria, lan egiten duen hedabidea, bere hizkuntz gaitasunak edo heziketa akademikoa ezin da inolaz ere argudio izan inor galdekatu, atxilotu eta espetxeratzeko».

»

2022ko apirilaren 5ean Pablo Gonzalez kazetaria «berehala aske uzteko» eskatu zuten zenbait kazetari eta herri komunikabidek.

Erakundeei eskatu zieten eragiteko, «frogatu delako presio diplomatikoa eraginkorra izan daitekeela». Babesa agertu zieten senideei eta lagunei.

Erakundeei eta Gonzalezen askatasunaren alde zerbait egin zezaketen pertsonei eskatu zieten kazetaria «lehenbailehen etxera ekartzeko» lanean hasteko. «Askotan frogatu da presio diplomatikoa oso eraginkorra izan daitekeela, horretarako egiazko indarra jartzen denean. Ziur gaude hala izango litzatekeela Pablo Errusian atxilotu izan balute», adierazi zuten. Informazio askatasuna demokraziaren oinarria dela ekarri zuten gogora.

Sinatzaileen artean zeuden, besteak beste, Hala Bedi irratia, Ahotsa.info, Argia, Radio France eta Arabako Alea hedabideetako hainbat kazetari. Testuaren bitartez, elkartasuna eta babesa adierazi zizkieten kazetariari eta haren senideei eta lagunei, eta berehala aske uzteko eskatu zuten.

«Gerra egoera honetan, are garrantzitsuagoa da kazetaritza eta informazioaren profesionalen lana, gatazkan dauden lurraldeetan gertatzen dena herritarrok lehen eskutik jasotzeko», azaldu zuten sinatzaileek. Hala ere, gogoratu zuten gerra guztietan bezala, «kazetariak ere helburu militar» bihurtzen dituztela. Lekuko deserosoak direlako eraso egiten dietela zeritzoten, «informazio askatasuna urratuz». Are, kezkagarritzat jo zituzten ere Europan RT eta Sputnik hedabideak zentsuratu dituen «Europako Batasunaren deriba autoritarioa», eta Errusiako Gobernuak prentsa askatasuna murrizteko ezarri zituen legeak.[15]

Kartzelan zegoela, 40 urte betetzea

2022ko apirilaren 28an Pablo Gonzalezek 40 urte bete zituenean efemeridea aprobetxatu zuten bere lankideek, lagunek eta senideek kazetariaren egoera salatzeko beste bideo bat argitaratzeko.

Aurreko astean jakin zen Pablo Varsoviatik hurbilago dagoen kartzela batera eraman zutela, bere defentsarako behar zuen laguntza kontsularra errazteko. Era berean, berak aukeratutako abokatu poloniar bat zeukan, jada; aurrez Poloniako Fiskaltzak ezarritako ofiziozko bi abokatu zituen. Hala ere, Free Pablo Gonzalez plataformak prentsa ohar baten bidez jakinarazi zuenez, «Gonzalo Boye Pabloren abokatua ezin izan da oraindik berarekin harremanetan jarri».

Plataformatik salatu zutenez, «Europako Batasunean aurrekaririk ez duen kasua da, baina komunikabide handietan ia ez du eraginik izan». Horien arabera, Poloniak Pabloren aurka zituen frogak «zirkunstantzialak dira gaur egun, eta errusiar jatorriarekin lotuta daude».

Era berean, salatu zuten Espainiako Gobernuak Pabloren egoerari buruzko jarrera «epela» erakutsi zuela bi hilabete horretan. Horrek, ziotenez, Europar Batasuneko Oinarrizko Eskubideen Gutunari «jaramonik ez egiteko aukera» eman zion Poloniari.

Change.org plataformaren bidez egindako sinadura bilketak 6.000 babes baino gehiago jaso zituen.[16]

Ia bi urte eta erdiren ondoren, aske

Atxilotu zutenetik bi urte eta bost hilabete igarota, 2024ko abuztuaren 1ean, Errusiak lortu zuen Poloniak Pablo askatzea. Errusiak eta Ameriketako Estatu Batuen orbitako herrialdeek egindako preso truke baten harira askatu zuten Gonzalez (Errusiak 16 estatubatuar, errusiar eta alemaniar askatu zituen; Estatu Batuek, Alemaniak, Norvegiak, Esloveniak eta Poloniak 8 errusiar eta euskal herritar askatu zituzten).[17][18] Pablo libre eta kargurik gabe atera zen Poloniako Radomgo segurtasun handiko espetxetik, eta Moskura joan zen.[19]

Gonzalezen defentsak nabarmendu zuen Errusiako agintariek «benetako interesa» erakutsi zutela auzia konpontzeko, eta, zuzenean aipatu ez arren, Espainiako Gobernuak izandako jarrera txarretsi zuen: «Beste batzuk, aldiz, Pablo Gonzalez kriminalizatzen ahalegindu dira, hura defendatu eta kazetari gisa dituen eskubideak babestu beharrean».[17] Poloniako Gobernuak adierazi zuen Pablo askatzearekin Poloniak hau irabazi zuela: «Irabazi dugu NATOko kide leiala garela, Estatu Batuen aliatu leiala, eta hori berez da balio bat».[20]

Libre atera eta gero, Pablok salatu zuen atxilotu ondorengo bederatzi hilabeteetan Polonian mehatxatu eta torturatu zutela, bere aurkako akusazioa zein zen jakinarazi gabe eta abokatuarekin hitz egiteko aukerarik eman gabe. Pablok 20 kilo galdu zituen espetxealdian, eta, Errusian sendatu ondoren, Euskal Herrira itzuli nahiko luke. Horretarako, Espainiako Erresumako nortasun agiria eta pasaportea egin beharko ditu berriro, libre geratu zenean Poloniak ez baitzizkion agiri horiek itzuli.[19] Poloniako Fiskaltzak adierazi zuen ez dutela kazetaria formalki akusatu, baina ikertzen jarraitzen dutela, eta litekeena dela epaiketa in absentia (akusatua bertan egon gabe) egitea.[21]

Erreferentziak

  1. ↑ a b c Hermosilla, Gotzon. (2022-03-12). «Pablo Gonzalezek ez du hitz egin abokatuarekin oraino, eta 13 egun dira preso dela» Berria (Noiz kontsultatua: 2022-03-20).
  2. ↑ a b https://www.berria.eus/albisteak/210532/eusko-jaurlaritzak-epaiketa-justua-eskatu-du-pablo-gonzalezentzat.htm
  3. ↑ a b Letona Biteri, Xabier. «Inongo frogarik erakutsi barik, bi urte espetxean Polonian» Argia 2024-02-28 (Noiz kontsultatua: 2024-04-12).
  4. ↑ (Gaztelaniaz) Velasco, Marina. (2022-03-19). «El “insólito” caso de Pablo González, el periodista español acusado de espía ruso» Huffington Post (Noiz kontsultatua: 2022-03-20).
  5. ↑ (Gaztelaniaz) https://www.publico.es/politica/esposa-pablo-gonzalez-esto-pelicula-terror-traigan.html
  6. ↑ (Gaztelaniaz) https://www.huffingtonpost.es/entry/el-periodista-pablo-gonzalez-seguira-encarcelado-en-polonia-al-menos-hasta-el-29-de-mayo_es_623b5509e4b0c727d486cad6
  7. ↑ https://www.berria.eus/albisteak/211223/behin-behineko-espetxealdia-ezarri-diote-pablo-gonzalez-kazetariari.htm
  8. ↑ a b https://www.berria.eus/paperekoa/2070/005/001/2022-03-17/pablo-gonzalezi-ofiziozko-abokatu-bat-ezarri-diote.htm
  9. ↑ https://www.berria.eus/albisteak/210621/europako-kontseiluak-pablo-gonzalezen-atxiloketa-salatu-du.htm
  10. ↑ https://www.berria.eus/albisteak/210293/euskal-pen-klubak-eskatu-du-gerra-ez-erabiltzeko-adierazpen-askatasuna-murrizteko.htm
  11. ↑ https://www.berria.eus/albisteak/213854/hiru-hilabetez-luzatu-diote-espetxealdia-pablo-gonzalezi.htm
  12. ↑ https://www.berria.eus/paperekoa/1833/006/001/2022-03-12/pablo-gonzalezek-ez-du-hitz-egin-abokatuarekin-oraino-eta-13-egun-dira-preso-dela.htm
  13. ↑ https://www.naiz.eus/eu/info/noticia/20220306/nabarnizek-pablo-gonzalezen-askatasuna-eskatu-du-kazetaritza-ez-delako-delitua
  14. ↑ https://www.berria.eus/albisteak/210371/pablo-gonzalez-berehala-askatzeko-eskatu-du-berriako-langile-batzordeak.htm
  15. ↑ https://www.berria.eus/albisteak/211813/pablo-gonzalez-kazetaria-berehala-aske-uzteko-eskatu-dute-zenbait-kazetari-eta-herri-komunikabidek.htm
  16. ↑ https://www.eitb.eus/eu/albisteak/gizartea/osoa/8816462/pablo-gonzalezek-40-urte-bete-ditu-gaur-polonian-bi-hilabete-inkomunikatuta-daramatzan-egunean/
  17. ↑ a b «Pablo Gonzalez aske utzi dute» Berria 2024-08-01 (Noiz kontsultatua: 2024-08-02).
  18. ↑ (Ingelesez) Roth, Andrew. (2024-08-02). «Evan Gershkovich release: Biden and Harris greet Americans freed after prisoner swap» The Guardian ISSN 0261-3077. (Noiz kontsultatua: 2024-08-02).
  19. ↑ a b «Pablo Gonzalezek torturak salatu ditu» Berria 2024-08-10 (Noiz kontsultatua: 2024-08-13).
  20. ↑ (Gaztelaniaz) EFE, Agencia. (2024-08-02). «El Gobierno polaco afirma que liberó a Pablo González por "lealtad" a EEUU» Cadena SER (Noiz kontsultatua: 2024-08-02).
  21. ↑ «Poloniak adierazi du Pablo Gonzalezen kontrako ikerketak martxan jarraitzen duela» Berria 2024-08-13 (Noiz kontsultatua: 2024-08-14).

Kanpo estekak

"https://eu.wikipedia.org/w/index.php?title=Pablo_González_Yagüe&oldid=9911454"(e)tik eskuratuta