Salute, Jonathan!/Capitul 11
![]() |
|
Problems listening to this file? See media help. |
Contenete - Capitul 10 - Capitul 11 - Capitul 12
Deciunesim capitul (11.esim capitul)
[edit | edit source]![](http://upload.wikimedia.org/wikipedia/commons/thumb/8/8b/Treasure_map_-_black.svg/220px-Treasure_map_-_black.svg.png)
![](http://upload.wikimedia.org/wikipedia/commons/thumb/c/c2/Animation_of_Chandrayaan-2_around_Earth.gif/220px-Animation_of_Chandrayaan-2_around_Earth.gif)
![](http://upload.wikimedia.org/wikipedia/commons/thumb/7/72/Mentally_ill_patients_in_the_garden_of_an_asylum%2C_a_warden_l_Wellcome_L0014220.jpg/220px-Mentally_ill_patients_in_the_garden_of_an_asylum%2C_a_warden_l_Wellcome_L0014220.jpg)
![](http://upload.wikimedia.org/wikipedia/commons/thumb/b/b6/Dawn_in_Bray%2C_Co.Wicklow.jpg/220px-Dawn_in_Bray%2C_Co.Wicklow.jpg)
![](http://upload.wikimedia.org/wikipedia/commons/thumb/f/f9/Grays.svg/220px-Grays.svg.png)
Li parlada inter Jonathan e Comto Dracula continua. Jonathan vole saver un cose. Il di: “Dracula, yer yo videt un blu flamme. Quo it esset?”
Dracula: “Li blu flamme es un flamme quel on posse vider solmen un nocte in li annu. Li blu flamme es li loc u on posse trovar un tresor. In mi land li historie es long. Mult persones vivet in it, mult rich persones, e nu ili es mort. Li persones qui nu es mort havet mult tresor.”
Jonathan: “Alor pro quo li persones ne sercha li tresor in ti nocte del annu?”
Dracula: “Pro que ili es stupid! Li nocte quande hay li blu flammes, ili ne vole ear for. Ili ne ama li blu flammes. Anc vu ne ama li blu flammes, ne ver?”
Jonathan: “To es ver. Yo ne vole ear for quande hay li blu flammes. Ili es strangi.”
Dracula: “Adver. Bon, parla me pri London e mi dom in London. Yo vole saver qual es mi dom in London.”
Jonathan: “Bon, un moment. Mi libres es in mi chambre.” Jonathan ea a su chambre, e sercha su libres, e trova su libres. Il retorna e parla a Dracula pri su dom. Dracula es tre inteligent; il es inteligentissim. Dracula questiona Jonathan mult vezes, e il sembla saver mult coses pri London.
Dracula: “Yo have un question, Harker Jonathan...ah, pardon, Jonathan Harker. In Rumania on di li surnómine, poy li nómine. Vor surnómine es Harker. Bon, ancor un vez...Jonathan Harker. Di me, esque li dom es old?”
Jonathan: “Yes, it es ancian de settcent (700) annus, yo crede. Li nómine del dom es Carfax. Carfax va esser li dom de Comto Dracula in London. It es tre grand. Circum li dom hay mult árbores, e aqua. In li circumité es un asil por lunaticos.”
Dracula: “Un asil por lunaticos? Alor, un dom por strangi persones?”
Jonathan: “Yes, un asil es un dom e un lunatico es un strangi person. Ma li altri coses es bon.”
Dracula: “No, yo ne have problemas con lunaticos qui vive in un asil. Yo pensa que li dom es bon. Yo ama old domes, ancian domes. Anc yo es tre old…un moment! Yo va retornar.”
Jonathan atende, e atende.
Jonathan atende plu, e pos un o du hores, Dracula retorna.
Dracula: “Ah, vu labora ancor! To es bon, ma vu deve manjar. Yo...ha ja manjat. Ma noi posse parlar durant que vu manja.” Jonathan manja durant que Dracula questiona le. Dracula questiona le pri omnicos. Ili parla durant hores e hores. Ma nu ili audi li son de un gallino.
Dracula: “Ah! Li matine va strax arivar. Vu es fatigat e li témpor ha venit por dormir. A revidentie!”
Jonathan intra su chambre e vide li ciel. It es gris. Il pensa pri quo Dracula hat fat. Quande li matine venit, il hat dit “a revidentie”, quel es vider ancor un vez...vider es li cose vider, e revider es li cose vider ancor un vez. "Alor, yo va vider le deman, e ancor posdeman. Pro quo il di "a revidentie" quande veni li matine? Esque Dracula ne ama li matine? Tre strangi..." Vidente li gris ciel, il dormi.
Grammatica
[edit | edit source]·ada, ·ida
[edit | edit source]Un parlada es parlar e parlar, o li cose parlar.
- verbe in ·ar: ·ada
- verbe in ·ir: ·ida
- verbe in ·er: ·ida
- ear: eada.
- exear: exeada.
- venir: venida.
Durant li viage, ex li coche Jonathan videt li eada e venida de mult persones.
qual e quel
[edit | edit source]Qual e quel es diferent. Pensa pri 1) un grandissim dom, 2) un grand dom, 3) un micri dom, 4) un micrissim dom.
- qual: qual es li cose?
- Qual es li duesim dom? It es grand.
- Qual es vor dom? It es micri.
- quel: quel cose it es?
- Quel dom es micrissim? Li quaresim dom.
- Quel es vor dom? Li dom ta.
anteyer, yer, hodíe, deman, posdeman
[edit | edit source]Hodíe es 5 may. Yer esset 4 may, e anteyer esset 3 may. Deman va esser 6 may, e posdeman va esser 7 may.
re·
[edit | edit source]Yo videt un tresor: yo videt it un vez. Poy yo revidet it (yo videt it ancor un vez).
ntie
[edit | edit source]Esque vu ancor save ·nt por verbes? Noi va revider li verbes:
- verbes in ·ar: ·ant
- verbes in ·er: ·ent
- verbes in ·ir: ·ient
·ntie es ·nt + ·ie.
- verbes in ·ar: ·antie
- verbes in ·er: ·entie
- verbes in ·ir: ·ientie
Vid·er → vid·ent → vid·ent·ie = videntie, li cose vider. "A revidentie" = "al témpor quande on revider."
Silent → silent·ie (esser silent), excellent·ie (esser excellent)...
circum, circumité
[edit | edit source]·ité es mult coses.
- circum li dom
- li circumité: li coses circum li dom (li altri persones, li altri domes...)
Vocabularium
[edit | edit source]- ancian: oldissim
- adver: it es ver
- annu: 365 dies
- asil
- circum
- circumité
- creder: creder es ne saver ma pensar que un cose es ver
- fatigar
- ja
- lunatico
- pardon
- retornar: venir ancor un vez
- surnómine
- tresor: mult moné e rich coses