Kleinhoff Hotel
|
C'l artìcul chè 'l è scrit in
Miranduléś |
 Kleinhoff Hotel
| ||
 Werner Pochath in na figùra dal film | ||
| Hutèl Kleinhoff 1977 | ||
|---|---|---|
| Regìa: Carlo Lizzani | ||
| Scritōr: Valentino Orsini • Faliero Rosati | ||
| Atōr: Corinne Cléry • Bruce Robinson • Katja Rupé Michele Placido • Werner Pochath • Peter Kern | ||
| Müsica: Giorgio Gaslini | ||
| Léngua: Ingléś | ||
| Dürä dal film: 105 minüt | ||
| Nasiōṅ: Itàglia • Prinsipâ 'd Mònag | ||
Kleinhoff Hotel (Hutèl Kleinhoff) 'l è 'n film dramàtic dal 1977 girâ par Carlo Lizzani da 'n sugèt ad Valentino Orsini e 'l è ambintâ durànt i an ad piómb.
La pelìcula l'è stada giràda a Berlîṅ.
Sunt
La Pascale Rostand (Corinne Cléry) l'è na bèla e rica sgnōra francéśa spuśàda cun 'n architét tedésc, Thomas (Luigi Marturano), da spés in Àfrica par lavōr. A sucéd acsè ch'i s védan pôc.
Un dè la Pascale la pèrd al sò aparéć par Lóndra, la gh'iva 'd andàr a càtar sò màdar, e l'è custréta a 'rmàgnar a Berlîṅ par na nòt par pò tōr al vōl sucesìṿ 'l admàṅ da matìna. La sarnìs 'l Hutèl Kleinhoff parchè la gh andàva quànd l'éra studènta ma adès là 'l è cambiâ incòsa, anc i pruprietàri. Méntar la s prepàra par far-as na dócia, la fà a mènt che da na sfésa insìma a la pòrta a riva in dla sò cambra dla luś e anc di stus da qvéla ch'a gh'è darènt. La decìd ad śbraghiràr un pôc e la mónta insìma a na scrana par védar ch'i gh'è là da drē. La véd 'n óm ch'al dascór da par lò, Axel (Bruce Robinson), ch'a pâr ch'al gh'àppia da recitàr na part, pò 'l al bèca tut nûd.
Durànt la nòt la 'l véd ch'al dascór ad fighi cun na dóna ch'la rid sèmpar e che na vòlta l'éra la sò muróśa, la Brigitte (Katja Rupé). Chi lē l'è vgnuda par dar-ag 'n indirìs e anc par gusàr, la sa sfarga da par lē in sal lèt ch'la pâr na gatìna ad siē méś minga steriliśàda. A 'l inìsi lò al n in vōl savēr ma pò lē la taca a piànśar e a finìs ch'i ciùlan dabòṅ cun la Pascale ch'la sènt incòsa da cl'atra banda dal mur. La matìna dòp a riva David (Werner Pochath) ch'al taca a dascórar cun Axel e a s capìs ch'i èṅ tut dū di terurìsta rivulusiunàri cónt'r al sistéma, la pulisìa la gh dà la casa. Chi lōr i èṅ 'd acòrd par far fóra Pedro (Michele Placido) parchè i crédan che lò 'l àppia tradî la càuśa e anc di sò cumpàgn. Axel, ch'adès al s fà ciamàr Karl e David 'l è drē a far-ag di ducumènt nóṿ, al gh'à na pistòla sèg par far-al séc, acsè 'l impàra.
Cla nòt lè la Brigitte e la Pascale, insém a tuti dgl'atri dóni ch'i s catàv'n in un lucàł dla sità, i finìs'n in cumisariâ p'r èsar cavàdi śò e perquisìdi dòp na redàda. Quànd la francéśa la vèṅ mandàda libra la và subìt in dla cambra 'd Axel par dir-ag che la sò amìga, drugàda e cun di precedènt, l'è finìda dèntar. Axel al créd che lē la sia una dla pulisìa e al la fà cavàr śò par gusàr-'s-la ma in fiṅ di cònt la gh cata gust ad lē tant ch'la gh śibìs ad scapàr via insém.