Jelena Janković
|
C'l artìcul chè 'l è scrit in
Miranduléś |
La Jelena Janković, (Belgrâd, 28 ad Favràr dal 1985, ciamàda in Sèrb Јелена Јанковић, [jɛ̌lɛna jǎːnkɔv̞itɕ]) l'è na tenìsta sèrba ch'l'è stada la nùmar òṅ dal mónd in singulàr ('l 11 'd Agóst dal 2008) par daśdòt stmani in tut. L'è élta 177 cm e la péśa 59 chilo. Prufesiunìsta da 'l 2000, l'è andàda a star in Dubai.
In dla sò caréra l'à śugâ na finàl dal Gran Slam (cun anc quàtar semifinài) e vins trédas tìtui. L'à śugâ anc par na vòlta in dal dópi misć, preciśamènt a Wimbledon in dal 2007 insém a Jamie Murray, vinsénd acsè un tìtul dal Gran Slam.
A gh piàś śugàr cun i cavìi tut tirâ a 'l indrē, tgnû stric a cóa ad cavàl.
Caréra
I sò genitōr Veselin e Snežana, ad mistēr ecunumìsta, i gh'àṅ i bèsi par mandàr-la da pìcula a far-'s i òs a la scōla ad Nick Bollettieri.
La śōga al sò prim turnèo WTA in dal 2001 par via dna carta salvàdga ch'i gh'ivan dâ a Indian Wells ma la và fóra a 'l secónd tùran p'r òpra dla Silvia Farina Elia. La taca a purtàr a cà di riśultâ bòṅ in dal 2004, tacànd da gl'Australian Open in dua la bat la top 10 Elena Dement'eva par 6-1, 6-4, par pò vìnsar al sò prim tìtul in Maǵ a Budàpest. A Filderstadt la bat la Nadia Petrova e la Daniela Hantuchová e pò a Linz la céd in semifinàl a l'Amélie Mauresmo dòp avér fat fóra la Patty Schnyder e la Vera Zvonarëva. La dvénta la nùmar vint-i-òt dal mónd.
In dal 2005 la riva in finàl in Dubai, baténd la Serena Williams 6-0 4-3 bandòṅ, ma la la pèrd da la Lindsay Davenport par 6-4 3-6 6-4. A Berlîṅ l'è invéci la Nadia Petrova ch'la s mét ad travèrs in semifinàl (6-4 6-7 6-3 al puntéǵ par la rusa). In Śugn la riva in finàl in sl'èrba ad Birmingham ma a gh'à la méj la Marija Šarapova par 6–2 4–6 6–1. La Janković la finìs 'l an da nùmar darsèt.
'L inìsi dal 2006 par lē l'è un diśàstar parchè la pèrd déś incóntar ad fila. A Wimbledon però la bat a 'l tèrs tùran la campiunésa in carga Venus Williams ma pò la lasa strada a l'Anastasija Myskina 4-6 6-7. In sal cimènt ad Los Angeles l'è bòna ad far fóra l'Ana Ivanović e la Serena Williams ma pò la pèrd la finàl da l'Elena Dement'eva. A gl'US Open la gh riva dimóndi in fórma, la manda a cà la Svetlana Kuznecova in di quàrt e pò la spasa via anc l'Elena Dement'eva par 6-2 6-1. In semifinàl la s pòrta avànti 6-4 4-2 e bucìna p'r al 5-2 cóntar la Justine Henin ma pò la n è bòna ad vìnsar piò gnanc un śōg in di cunfrònt dla bélga. In Utóbar la Jelena l'è la nùmar dódas dal ranking.
In dal 2007 la vins al turnèo 'd Auckland baténd in finàl la Vera Zvonarëva par 7–6 5–7 6–3. A Sydney la fà fóra la Martina Hingis, la padróna ad cà Samantha Stosur e l'Amélie Mauresmo, rivànd in finàl cóntar la Kim Clijsters. Sèg la gh'à dū match point ma pò la và a pèrdar par 6-4 6-7 4-6. A Doha la céd in semifinàl a cl'atra bélga, la Justine Henin, ma la s pòrta a cà listés al nôn pòst in clasìfica. A Miami la pèrd a 'l tèrs tùran da la Mara Santangelo, butand anca chè a gl'urtìghi dū match point, quànd l'éra in vantàś 6-2 5-2 e servìsi. La tórna a vìnsar un tìtul in sl'èrba vérda ad Charleston, 6–2 6–2 a la Dinara Safina. Stès quèl anc a Róma: la Janković la s pòrta a cà al turnèo baténd in finàl la Svetlana Kuznecova par 7–5 6–1. In Śugn l'è anc bòna ad dar la paga a la Marija Šarapova in sl'èrba ad Birmingham, miténd-as in bisàca al sò quìnt tìtul in caréra. A Wimbledon però la pèrd a 'l quàrt tùran da la Marion Bartoli, fata fóra invéci a Róma. A Los Angeles la bat a fadìga la Viktoryja Azaranka in di quàrt ma pò la gh'à da cédar a l'Ana Ivanović par 6-4 3-6 5-7. Dòp avér pardû in di quàrt da la Venus Williams a gl'US Open, la finìs 'l an in calànd.
In dal 2008 la bat incóra la Serena Williams a gl'Australian Open ma pò la n pōl far gnint cóntar la Marija Šarapova ch'la vins 6-3 6-1. L'americàna la s tōś l'arvìnsita sèg baténd-la in dla finàla ad Miami par 6-1 5-7 6-3. A Róma la Janković l'ardópia 'l tìtul d'l an prima: la gh lasa 'l péni la francéśa Alizé Cornet par 6-2 6-2. A 'l Roland Garros la riva in semifinàl, pardénd incóra na vòlta da l'Ana Ivanović par 4-6 6-3 4-6, ma s'l'is vins lē la sarés dvintàda la nùmar òṅ dal mónd. Al surpàs in di cunfrònt dl'Ana Ivanović a gh prév èsar a Los Angeles s'la vinsìs al tìtul ma la n gh la cava minga pardénd da la Dinara Safina in semifinàl. A Montreal a gh bastarév invéci la finàl par tōr al sò pòst ma la Dominika Cibulková la s mét in mèś in di quàrt baténd-la 7-5 6-2 (la sèrba l'éra 5-1 in dal prim sét). La Jelena la dvénta finalmènt la nùmar òṅ dal mónd 'l 11 'd Agóst ma sōl par na stmana. La riva in dla sò prima finàl in un Gran Slam a Flushing Meadows, baténd via via la Caroline Wozniacki in di utàṿ, la Sybille Bammer in di quàrt e l'Elena Dement'eva in semifinàl, ma la céd pò a la Serena Williams par 4-6 5-7. A Pechîṅ la bat la Svetlana Kuznecova in finàl dòp avér pardû sèg in di quàrt a Tokyo. La pòrta a cà anc al tìtul ad Stucàrda (in dua la bat la Venus Williams e la Nadia Petrova) e qvél ad Mósca (cóntar la Vera Zvonarëva). Cun al sucès in Germâgna la sèrba la tórna in sima a 'l ranking mundiàl dal fémni. Un daspiaśēr la gh al dà la Flavia Pennetta in di utàṿ ad Śurìg e la Jelena la pèrd 'n incóntar dòp 13 sucès ad fila, armanénd però la nùmar òṅ anc a la fiṅ d'l an.
Finàli in di Gran Slam
| Turnéo | An | Vins/Pardû | Aversàri in finàl | Puntéǵ |
|---|---|---|---|---|
| US Open | 2008 | P | Serena Williams | 4-6, 5-7 |