Ernesto Mascheroni

Ernesto Mascheroni e 1930 (en e sav e kreiz).

Ernesto Mascheroni (lesanvet El Tío, An Eontr e brezhoneg), bet ganet d'an 21 a viz Du 1907 e Montevideo (Uruguay) hag aet da Anaon d'an 3 a viz Gouere 1984 er memes kêr, a oa ur melldroader etrebroadel uruguayat (difenner kleiz e bost dezhañ war an dachenn).

Sed amañ da-heul ar c'hleuboù m'en devoa c'hoariet enne :

• 1930 : Olimpia Montevideo,
• 1930-1933 : Peñarol Montevideo, aet da gampion e 1932,
• 1934 : Independiente (Avellaneda, Buenos Aires (proviñs)),
• 1934-1936 : Ambrosiana (Milano, Rouantelezh Italia),
• 1936-1940 : Peñarol, aet da gampion e 1937 ha 1938.

Daouzek gwech en devoa douget krez La Celeste (1930-1934 ha 1935-1939) hep merkañ pal ebet. Daou grogad en devoa kemeret perzh enne e 1935 ivez, gant skipailh broadel Rouantelezh Italia d'ar mare ma oa c'hoarier en Ambrosiana.

Kib vell-droad ar bed

Kemeret en devoa perzh Ernesto Mascheroni en un dalc'h hepken :

• Kib vell-droad ar bed 1930 bet aozet en Uruguay ma oa aet ar maout gant skipailh broadel Uruguay. C'hoariet en devoa tri eus pevar c'hrogad ar genstrivadeg ha perzh e oa eus ar skipailh – Enrique Ballestrero, Ernesto Mascheroni‎, José Nasazzi, José Leandro Andrade, Lorenzo Fernández, Álvaro Gestido, Pablo Dorado, Héctor Scarone, Héctor Castro, José Pedro Cea, Victoriano Santos Iriarte – a c'hounezas (4-2) ar gourfenn ouzh hini Arc'hantina en Estadio Centenario (Montevideo) d'an 30 a viz Gouere 1930.