Wikipedia:Griaßde

Griaß di bei da Wikipedia, wo jeder mitmochn konn, a Du.

Naich bai da Dialekt-Wikipedia?

Wãnst wås zu am Artikl dazua schraim mågst, dãn druk õafåch auf werkln

Wãnst zu am Artikl mea woast, wia im Moment doat schded, dãn druk õafåch auf "werkln" und schraib dazua, wås daina Mainung nåch föd. In dém Textföd wås dãn kimd, kãnst dãn söwa wås dazua schraim oda dés wås doat schã schded endan. Schraib åwa kõan Bledsin und Såchan dé ned schdiman, auf da ãndan Saitn muast åwa a ned gschamig sâi. Es kãn nix schif gê und ois wås du glöscht oda gendat håst kãn ma laicht wida zruk dõa. Wãnst wås fåisch gmåcht håst, kimd sicha båid a ãndara User oda a Administratoa dahea und kãn dé Såch wida ausbéssan. De Wikipedia lébt dafã das fü faschidane Laid midmåchan und de Community fu da boarischn Wikipedia dad si gfrai, wãnst a du då mid dabai wast. Oiso, browia's õafåch amåi aus und drau di.

Befoast daine Endarungen schbaichast, soitast zeascht amåi auf "Vorschau zoagn" klikn und nu amåi kontrolian ob e ois basst, kõane Fela drin han und du zfridn damid bist. Wãnst liawa zeascht amåi a weng übn wüst, kãnst åwa fia's easchde a amåi auf da Spielwiesn foabai schaun und doat a weng expearimentian.

An nein Artikl oleng

Wennst an Link siegst, der rot is, dann hod da no kuana was dazuagschrim, den Artikl gibts aba scho. Wenn da was dazua eifoid fang ofach o.

Wennst an nein Artikl schreim mogst, dann suach an Artikl, wo a Link fia Dein Artikl dazuapasst. Auf dera Seitn druckst auf "werkln", suachst a Stäi wo dei neia Artikl guad dazupasst und fiagst an Link eine mit dem Nama vo deim "Wunsch-Artikl". Nachm Speichan kost auf den Link drucka und kimmst zu Deim nein, no leern Artikl und kost do was schreim. S'gibt a no de Möglichkeit, daß'd den Nama vo deim nein Artikl bei "Suach" auf da linkn Seitn eigibst, dann werd a zwar net gfundn, weisn ja no ned gibt, aba es erscheint de Aufforderung, daß ma den ja selba schreim ko.

Bevurst an nain Àrtikl schreibst, kãnnst à unta da Kategorie:Wikipedia:Kurze Artikel schaun, obst néd an intaressantn Àrtikl fir di findst, wost du wås dazua wàßt und dennst vielleicht ausbaun kunnst. Durch dés dass uns erst seid 2006 gibt, håmma no vüi Àrtikl dé néd recht informativ san und a dringende Üwaårweitung nötig hättn. Schau à unta da Kategorie:Wikipedia:Skizzen; dés san Àrtikl dé nur aus zwâ bis drei Sätz bestehngan.

Mitredn

Wennst moanst, das a Artikl so ned guad is, du aba säiba nix dro ändan mogst, dann kost Dei Meinung bei "bschprecha" hischreim. Da koast a lesn, wos andane fo dem Artikl hoidn. A Grund, warumsd säiba nix ändan mogst, kunnt sei weis'd ned den Dialekt kost, in dem da Artikl gschriebn is. In dem Foi koast aba a an eignen Absatz ofanga und driabaschreim, in welchm Dialekt dei Absatz gschriem is. Aba a do guid, drau Di, schreib wos, nua so kemma weida.

Des "bschprecha" kost a heanemma, wennst an Artikl ned ändan kost, wei a gsperrt is. Da nexte, dea de nötign Rechte hod, um dein Wunsch auszumfian, werd des prüfn und ändan, oda a ned.

No Frong?

Wennsd Frong zua Wikipedia hosd, de dohearin ned beantwort wean kost da a de Willkommens-Seitn vo da deitschn Wikipedia oschaung. Ansonstn kost a beim Wikipedia:Stammtisch mitren und a Frog stelln.

A bår wichtige Hiweis zum Schreim vo Artikl speziell in da boarischn Wikipedia stengan unta Wikipedia:Hilfe und Wikipedia:Poatal.

Untaschreim und Omeidn

S'war recht huifreich, wenn a jeda untaschreim dad, wenn a bei "bsprecha" was dazuaschreibt. Des geht recht oafach mit -- ~~~~. De Zeichnkettn werd dann automatisch mit Zeit und Nama ersetzt. S'gleiche bassiert, wenns'd obn den zwoatn Knopf vo rechts druckst, dea wia a Untaschrift ausschaugt. Genauso war's a Sach, wenn möglichst vui Mitstreita si a omeidn dadn. S' werd zwar vasuacht, de boarische Wikipedia a fia anonyme Schreibaling offenzhaltn, aba sogar a Spitznama is persönlicha ois a anonyme Ziffernfolge. Des erleichtert oafach as Mitananda.

Vü Spaß in da Wikipedia!