Elmi dərəcə

Elmi vəzifə — ali məktəblərdə və elmdə ixtisaslaşdırma sistemi olub, elmi və elmi-pedoqoji əməkdaşların sinifləşdirilməsi üşün tətbiq edilir. Hal-hazırda Azərbaycanda elmlər namizədi və elmlər doktoru dərəcələri, dosent və professor elmi vəzifələri (kafedra və ixtisasından asılı olaraq) verilir. Dosent vəzifəsini qaydaya uyğun olaraq elmlər namizədləri, professoru isə elmlər doktoru olan şəxslər almaq imkanına malikdirlər.

Elmi dərəcə – müəyyən bilik sahəsində ali təhsilli mütəxəssisə verilən ixtisas dərəcəsi. Fəlsəfə doktoru (birinci) və elmlər doktoru (ikinci) elmi dərəcələri var. Elmi dərəcə bir sıra ali məktəb və elmi-tədqiqat müəssisələrinin elmi şuraları tərəfindən verilir və Ali Attestasiya Komissiyasında təsdiq edilir.

Elmi ad – pedaqoji və elmi-tədqiqat fəaliyyətindən asılı olaraq yüksək ixtisaslı elmi işçilərə verilən ad. Azərbaycan Respublikasında assistent, dosent, kiçik elmi işçi, baş elmi işçi, aparıcı elmi işçi, professor elmi adları, habelə Azərbaycan Respublikası Milli Elmlər Akademiyasının müxbir üzvü, həqiqi üzvü (akademik) adları qəbul edilmişdir. Bəzi elmi adlar (dosent, baş elmi işçi, professor) Ali Attestasiya Komissiyası (AAK) tərəfindən təsdiq edilir. Bir sıra xarici ölkələrdə professor elmi adı, bir qayda olaraq, kafedra müdiri vəzifəsində işləyənlərə verilir.

Elmi dərəcə almaq üçün ixtisasa aid mövzuda dissertasiya elmi işi hazırlanıb elmi şurada müdafiə olunmalıdır.

Həmçinin bax

• Azərbaycan Milli Elmlər Akademiyası

Ədəbiyyat

• R.Əliquliyev, S.Şükürlü, S.Kazımova. Elmi fəaliyyətdə istifadə olunan əsas terminlər. Baki, İnformasiya Texnologiyaları, 2009, 201 s.