Quercus robur

Quercus robur; carbayu
Estáu de caltenimientu
	; Cuasi amenazáu (IUCN)
Clasificación científica
Reinu:	Plantae
Subreinu:	Tracheobionta
División:	Magnoliophyta
Clas:	Magnoliopsida
Subclas:	Hamamelidae
Orde:	Fagales
Familia:	Fagaceae
Xéneru:	Quercus
Subxéneru:	Quercus
Seición:	Quercus
Especie:	Q. robur; L.
Distribución
	; Distribución del Quercus robur
Consultes
Royal Botanic Gardens, Kew	Royal Botanic Gardens, Kew
World Flora Online	World Flora online
	[editar datos en Wikidata]

El carbayu^[1] (Quercus robur) ye un árbol del xéneru Quercus, nativu del hemisferiu norte. Ye un árbol robezu, que pue perpasar los 40 metros d'altor, con groma amplia, ovoide, arrondada o irregular y fueya caduca. Ta clasificáu na Seición Quercus, que son los carbayos blancos d'Europa, Asia y América del Norte. Tienen los estilos curtios; les abiyotes maurecen en seis meses y tienen un sabor duce y llixeramente amargosu. Les fueyes escarecen d'una mayoría de cerdes nos sos lóbulos, que suelen ser arrondaos.

Etimoloxía

Carbayu remanez de la raíz prerromana "carb" o "carv", significando caña, rama, y estos términos vienen del célticu "car" o "kaer" significando siempre verde, o hermosu. Y "valos" significando fuerte^[2].

Descripción

Tueru fuerte, curtiu y mui gruesu nos exemplares aisllaos, con rames grueses dalgo tortuoses; corteya grisácea o blanquecina, con esquiebres y de tonalidá parduza nos exemplares vieyos. Fueyes grandes, simples, en disposición alterna, con estípules allargaes que cayen llueu; son lampiñes peles dos cares, de color verde intensu pol fexe y más pálides, colos nervios bien marcaos, pela cara inferior; la so forma ye aovada, con peciolu bien curtiu (2 a 7 mm), col cantu, más o menos fondamente, lobuláu y colos lóbulos desigual y arrondáu; suelen midir unos 6 a 12 cm de llongura por unos 3 a 6 cm d'anchu.

Flores masculines n'amentos colgantes, verde-amarellentaes, que nacen solitaries o en grupos de cañines del añu anterior. Abiyotes colgantes sobro un llargu pedúnculu, aováu-oblongues, con caperuchu o cascabillu d'escames casi planes, empizarraes.

Nel hemisferiu norte, ye dable atopalu tantu en climes fríos como tropicales n'Asia y América. El so desenvolvimientu algama a los 200 años y hai datos de llegar a los 1.600 años. Un monte de carbayos recibe'l nome de carbayada, carbayal, carbayeda o carbayéu.^[3]

Distribución

Distribúise dende 0 a 1000 m sobro'l nivel del mar, en suelos fondos y frescos, principalmente nos desprovistos de cal y daqué húmedos. Rique d'un clima húmedu, oceánicu, onde s'acuse poco la seca braniza y ye daqué resistente al fríu. Acomúñase o ponse en contactu con fayedales o con carbayeres de Quercus petraea (carbayu albar ^Nbot) y Quercus pyrenaica (rebollu ^Nbot), colos que forma híbridos con facilidá.

Subespecies

Acuénse, de cutio, tres subespecies:

Q. robur subsp. robur, que caltriaría les poblaciones orientales, algamando per occidente fasta'l carel de Galicia.

Q. robur subsp. broteroana Schwarz, del norte Portugal y noroeste España, colos llóbulos de les fueyes menos profundos, fexe llustrosu y garapiellos mayores (18-23 mm).

Q. robur subsp. estremadurensis (Schwarz) Camus, del norte y centru de Portugal, aportando al estremu occidental de Sierra Morena, con fueyes más esguilaes, llustroses pol fexe, les de primavera, de ñerviación secundaria regular, raída de ñervios intercalares.