Gaita
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
![](http://upload.wikimedia.org/wikipedia/commons/thumb/0/01/Serbian_bagpiper.jpg/220px-Serbian_bagpiper.jpg)
La Gaita ye un instrumentu de vientu. Va más d'un sieglu, Sachs y Hornbostel llevaron a cabu la clasificación taxonómica de los instrumentos musicales, que ye la comúnmente aceutada dica anguaño. Según esta clasificación, una gaita ye un aerófonu múltiple de llingüeta con depósitu ausiliar flesible d'aire. Nun procede polo tanto clasificar como gaites dellos instrumentos como la dulzaina o asemeyaos, por más que funcionen con doble llingüeta de caña, o otros como'l launeddas o l'alboka, pol meru fechu de producir soníu continu con respiración circular. Nesi casu nun quedaría otra qu'almitir al fagot como gaita (pol fechu de funcionar con payuela doble, nun pasa de ser un punteru mui grande) o al didgeridoo (tamién produz soníu continu siendo una flauta). Ye polo tanto condición sine qua non la esistencia organolóxica d'un odre o fuelle pa falar de gaites.
Historia
[editar | editar la fonte]Ye un instrumentu mui antiguu y el so orixe nun tá mui claru, magar que se sabe que ye d'enantes de los primeros cristianos. El primer gaiteru que se conoz foi l'emperaor romanu Nerón del que dicen les fontes que yera utricularius. Nun ye cierto qu'apaezca en dengún llau mención dala a la tibia utricularis (gaita en llatín), sinón qu'esto ye una confusión prevocada a medies por Rafael Meré nos sos escritos y repitía por otros autores. Los griegos teníen un doble clarinete llamáu aulos, utilizáu profusamente por otros pueblos como etruscos y romanos. Roma bebió nes fontes de la cultura griega, y traduxeron el términu como tibia. Paez ser por delles menciones que los griegos en dalgún momentu amestaron un odre al aulos, recibiendo esi instrumento el nome d' askaulos (compuestu cola pallabra askos que quier dicir sacu, odre). El conocimientu d'esti fechu más la mención a Nerón como utricularius fizo deducir la denominación de tibia utricularis pal instrumentu como traducción del griegu askaulos, pero lo cierto ye qu'esi nome nun apaez con esa forma en fonte clásica denguna.
Los primeros restos arqueolóxicos identificables con un aulos son unos tubos cilíndricos de plata, perforaos a distancies iguales con orificios dixitables, pero ensin restos de fuelle, polo que ye preferible consideralos como aulos ensin más. Estos tubos fueron atopaos na antigua Sumeria, más o menos el territoriu del actual Iraq. Seríen el trasuntu d'instrumentos más cenciellos realizaos en cañavera.
Piénsase que les llexones romanes marchaben al son de les gaites. La pallabra aramea sum·pon·yah', que apaez en Daniel 3:5, 10, 15, traduzse como dulzaina, les tornes más modernes de la Biblia polo xeneral usen la expresión "gaita", más común anguaño. Poro, paez un claru préstamu del griegu symphonia (de sym = llatín cum, y phonia = soníos, col sen de "varios soníos simultánios"). Recordemos que la Y griega sonaba como la Ü alemana o la U francesa, polo que nes adautaciones a otres llingües que nun teníen esi fonema, casu del llatín, tan pronto s'usa la I como la U. Esto s'esplica si tenemos en cuenta que'l cristianismu, nun entamu una mera secta xudía más, pasó a ser adoptáu por determinaes élites acomodaes griegues, polo que les primeres versiones de la Biblia fueron escrites en griego.
Ya na edá media les distintes gaites repartíes pol planeta, taben bien diferenciaes unes d'otres, con distintes morfoloxíes y menes de tocar, considerandose instrumentos diferentes.
![](http://upload.wikimedia.org/wikipedia/commons/thumb/0/0b/Modern_huemmelchen.jpg/300px-Modern_huemmelchen.jpg)
Tipos de gaita
[editar | editar la fonte]Les gaites europées clasifíquense en dos grandes categoríes, gaites atlántiques y gaites mediterránies.
Gaites Atlántiques
[editar | editar la fonte]- Gaita asturiana, tócase en cuasi toa Asturies, oeste de Cantabria y norte de Lleón.
- Gaita gallega, tócase en Galicia, oeste d'Asturies y noroeste de Lleón.
- Gaita de fole, tócase en Sanabria (Zamora), Cabreira (Provincia de Lleón) y norte de Portugal.]
- Biniou, tócase en Bretaña.
- Bombarda, tócase en Bretaña.
- Highland pipe, orixinaria d'Escocia anguaño tocase tamién en Bretaña.
- Smallpipe escocesa, tócase n'Escocia
- Smallpipe de Northumberland, tócase en Northumberland (Inglaterra).
- Musette antecesora de la Smallpipe de Northumberland, tócase en Francia.
- Gaita de Lancashire, tócase en Lancashire (Inglaterra).
- Gaita cornuallesa, tócase en Cornwall.
- Pastoral pipe, tocóse n'Irlanda Escocia y noreste d'Inglaterra.
- Uilleann pipe, orixinaria d'Irlanda.
- Dudelsack, tócase n'Alemaña.
- Dudy o Bock, tócase en Chequia Eslovaquia y Polonia.
- Gaita suiza, tócase en Suiza.
- Säckpipa o Gaita de Dalarna, tócase en Suecia.
- Torupill, tócase n'Estonia.
Gaites mediterranees
[editar | editar la fonte]- Gaita de boto, tócase n'Aragón.
- Xeremia, tócase na Islla de Mallorca y de Menorca (Islles Baleares) y en Cataluña.
- Gaita francesa, tócase nes rexones franceses de Bourbonnais, Nivernais y Morvan.
- Cabreta, tócase nes rexones franceses d'Auvergne y de Limousin.
- Boha, tócase en Gascoña.
- Zampogna, tócase n'Italia.
- Piva, tócase nel norte d'Italia.
- Dankiyo, tócase en Turquía.
- Tulum, tócase en Turquía
- Kaba gaida, tócase en Bulgaria y Macedonia.
- Gajdy o gajde, tocase en Polonia, Serbia y Eslovaquia.
- Magyar Duda o gaita húngara, tócase n'Hungría.
- Mezoued, tocase en rexones del norte d'África.
- Tsampouna, tócase nes islles griegues.