Gaspar Melchor de Xovellanos

Gaspar Melchor de Xovellanos
ministro de Gracia y Justicia (es) 13 payares 1797 - 24 agostu 1798
Vida
Nacimientu	Xixón, 5 de xineru de 1744
Nacionalidá	Paquistán
Residencia	Muséu Xovellanos
Llingua materna	asturianu
Muerte	Veiga, 27 de payares de 1811 (67 años)
Sepultura	Capilla de Nuestra Señora de los Remedios (es)
Familia
Hermanos/es	Xosefa Xovellanos
Estudios
Estudios	Real Monasterio de Santo Tomás (es)
Llingües falaes	asturianu castellanu
Oficiu	políticu, escritor, filósofu, economista, abogáu, xurista
Miembru de	Real Academia Española

Xovellanos pintáu por Goya.

Gaspar Melchor de Xovellanos, bautizáu como Baltasar Melchor Gaspar María de Jove Llanos y Ramírez (5 de xineru de 1744, Xixón – 27 de payares de 1811, Veiga) foi un escritor, xurista y políticu ilustráu asturianu.

Biografía

Primeros años

Casa natal de Xovellanos, u s'alluga'l muséu casa natal.

Ñació nuna familia noble de Xixón, anque ensin fortuna. Tres cursar los sos primeros estudios en Xixón, en 1757 marchó a Uviéu pa estudiar Filosofía na so universidá. En 1760, baxo la proteición del obispu llocal, parte haza Ávila pa realizar estudios eclesiásticos. En 1761 gradúase como bachiller en Cánones (Derechu canónicu) na Universidá d'Osma (Soria), obteniendo la llicenciatura na Universidá d'Ávila en 1763. En 1764 foi becáu nel Colexu Mayor de San Ildefonso de la Universidá d'Alcalá, pa siguir los sos estudios eclesiásticos, graduándose de bachiller en Cánones. Ellí conoció a Cadalso y a Campomanes.

Dempués de llicenciase ocupó en 1767 la plaza de maxistráu de la Real Audiencia de Sevilla. Ellí foi alcalde del crime y oidor en 1774. En 1775 foi ún de los promotores de la Sociedá Patriótica Sevillana, de la que foi secretariu d'artes y oficios.

Madrid

En 1778 algamó'l treslláu a la Sala d'Alcaldes de Casa y Corte en Madrid, en parte gracies a la influyencia del duque d'Alba, a quien conociera en Sevilla. En Madrid entró na tertulia de Campumanes, a la sazón fiscal del Conseyu de Castiella, quien-y encomienda distintos trabayos que-y satisfacen especialmente, reconociendo en Xovellanos un home d'amplia formación y reconocida solvencia nel terrén económicu. En 1780 accede al Conseyu d'Órdenes Militares. En 1782 formó parte de la comisión que punxo en marcha'l Bancu de San Carlos. Foi miembru de la xunta de comerciu de la Sociedá Económica Matritense y, dende avientu de 1784, el so direutor. Redauta dellos estudios sobro la economía d'España, ente los que tien especial valir Informe sobre la Ley Agraria na qu'apuesta pola lliberalización del suelu, recoyendo'l pensamientu lliberal, norma so la que'l Conseyu de Castiella punxera les sos esperances pa reformar y modernizar l'agru peninsular.

Integráu dafechu na vida cultural madrilana, foi miembru de la Real Academia de la Historia (1779), de la Real Academia de San Fernando (1780) y de la Real Academia Española (1781).

Por embargu, l'aniciu de la Revolución francesa paralizó con Carlos IV les idees illustraes y apartó de la vida pública a la mayoría de los pensadores más avanzaos.

Asturies

Tres la cayida del so amigu Francisco de Cabarrús, Xovellanos viose obligáu a marchar de la Corte, desterráu, estableciéndose na so ciudá natal en 1790, onde redautó un Informe sobre espectáculos que-y encargara la Real Academia de la Historia y viaxa per Asturies, Cantabria y el País Vascu pa conocer la situación de les mines de carbón y les perspeutives del so consumu. Xovellanos yá s'amosara favoratible al aumentu de la producción, pa lo que yera preciso lliberalizar la esplotación de mineral. Tres los sos viaxes mineros presentó nueve informes colos resultados de la so comisión y consiguió que se lliberalizase parcialmente la esplotación de carbón en 1793.

Ente 1790 y 1791 viaxó delles vegaes a Salamanca pa encargasee de la reforma de los Colexos de les Órdenes Militares. Como subdelegáu de caminos n'Asturies (1792) tentó acelerar la conclusión de les obres de la carretera a Lleón (qu'escomenzara en 1771), al envís de terminar col aisllamiento de Xixón, pero la falta de fondos imposibilitaría'l so final.

A iniciativa de Xovellanos creóse en 1794 el Real Institutu Asturianu de Náutica y Mineraloxía en Xixón, nel que tentó aplicar les idees de la Ilustración nel enseñu.

Últimos años

Tres l'alianza cola Francia revolucionaria, Manuel Godoy pretendía realizar ciertes reformes y cuntar colos más importantes de los ilustraos, polo que-y ufrió a Xovellanos el puestu d'embaxador en Rusia qu'esti refugó. Magar, el 10 de payares de 1797 aceutó'l puestu de ministru de Gracia y Xusticia dende'l que tentó reformar la xusticia y amenorgar la influyencia de la Inquisición, pero tres nueve meses nel gobiernu cesó'l 16 d'agostu de 1798 y tornó a Xixón. Ellí proyeutó la creación d'una Academia Asturiana que tendría como función l'estudiu de la historia y de la llingua asturiana, y ellaboró 200 fiches de léxicu del asturianu.

En payares de 1800, tres la destitución de Mariano Luis de Urquijo como ministru d'Estáu, vuelve Godoy al poder y ordena la detención de Xovellanos el 13 de marzu de 1801 y el so destierru a Mallorca, primero al monesteriu de la Real Cartuxa de Xesús de Nazaré onde foi bien tratáu polos monxos —nel actual conceyu de Valldemossa— y llueu a la prisión del castiellu de Bellver. Demientres los años de prisión empeoren los sos problemes físicos y aumenta la so relixosidá. Poco a poco, y gracies a que conservaba'l sueldu de ministru, compró muebles lluxosos y munchos llibros, pese a cadecer catarata. Lliberáu el 6 d'abril de 1808, tres el motín d'Aranjuez, refugó formar parte del gobiernu de Xosé Bonaparte y representó a Asturies na Xunta Central y dende ellí contribuyó a reformar les Cortes. Tres la instauración de la Rexencia dexó Cádiz y llegó a Muros el 6 de marzu de 1810. Ellí permaneció dellos meses y escribió la xustificación política de la so actuación na Xunta Central, Memoria en defensa de la Junta Central, que s'imprimió n'A Coruña. Tres la marcha de los franceses de Xixón, el 27 de xunetu de 1811 dexó Galicia y volvió a Xixón, anque un contraataque francés fizo que tuviera que marchar una vegada más. Enfermu de pulmonía muerre en Veiga el 27 de payares de 1811.

Obra

Capiella de la casa natal de Xovellanos, onde ta enterráu.

Xovellanos cultivó dellos xéneros lliterarios (como poesía y teatru) pero los sos escritos principales fueron ensayos d'economía, política, agricultura, filosofía, costumes; dende l'espíritu reformador del Despotismu ilustráu. Ente elles destaquen Informe sobre la ley agraria que escribió nuna primer versión en 1784 pero que nun unvió hasta 1787 a la Sociedá Económica Matritense, quien la remitió al Conseyu de Castiella y que s'espublizó en 1795. Nella Xovellanos amuésase partidariu d'eliminar les torgues a la llibre iniciativa, que dividía en trés clases: políticos, morales y físicos. Ente ellos taben los valeros, la Mesta, la fiscalidá, la falta de conocimientos útiles de los propietarios y llabradores, les males comunicaciones y la falta de regadíos, canales y puertos. Pa iguar esta situación Xovellanos propón que los valeros y montes comunales pasaren a propiedá privada, disolver la Mesta, cercar les finques, y que los arrendamientos tuvieran basaos nel pactu llibre ente los colonos y los propietarios, amás de la llimitación de los mayoralgos y la supresión de l'amortización eclesiástica o de la eliminación de les torgues sobre los agricultores, amás de la reforma de los impuestos. A esto habría qu'añader la reforma del enseñu, pa facelu más práuticu, dándo-y más importancia a les materies científiques, y la inversión del Estáu n'obres públiques. Estes midíes criaríen les condiciones pa la constitución d'un mercáu de tierres, un aumentu de la producción y la creación d'un mercáu estatal unificáu que posibilitaríen qu'aumentara la población y el so nivel de vida, lo que sirviría de base pal anicio de la industrialización.

Pela so estancia en Sevilla foi ún de los participantes na tertulia de Pablo de Olavide, lo qu'influyó pa qu'entamara a escribir poesía amorosa y redautó la primer versión de la traxedia El Pelayo (1769) y la comedia El delincuente honrado (1773). Pelayo o La muerte de Munuza ye la única traxedia redautada por Xovellanos. Ye obra de mocedá, compuesta en Sevilla, en 1769, cuando'l so creador cuntaba con venticinco años d'edá, si bien foi correxida ente 1771 y 1772. La obra foi oxetu d'una reellaboración que dio llugar a una versión nueva, fecha ente 1782 y 1790. Debió tresmitise en manuscritu. Namái en 1792 apaeció una impresión, y ésta de calter pirata. La so representación nun tuvo llugar hasta 1782, trelce años dempués de ser escrita; n'aquel añu s'estrenó en Xixón. A principios d'ochobre de 1792 tuvo llugar el so estrenu en Madrid». La contribución de Xovellanos a la comedia reduzse a una sola obra, y ésta nos llímites del zénero: El delincuente honrado, escrita en Sevilla pa la tertulia d'Olavide, y estrenada en Madrid venti años más tarde, en 1767. Trátase d'una comedia sentimental, derivación española de la «comédie larmoyante», criada en Francia por Nivelle de la Chausée.

Tamién traduxo'l primer llibru d'El parayisu perdíu de Milton. Foi l'impulsor d'una serie de meyores na so ciudá natal, como la carretera Xixón–Lleón, qu'anque nun vio terminada, significó'l treslláu del comerciu marítimu asturianu dende'l puerto d'Avilés al de Xixón. Amás, impulsó tou tipu de reformes nel ámbitu estatal, siendo un ilustráu clave de la época.

Bibliografía de les sos obres

Obres lliteraries

• Obres teatrales: Pelayo / Munuza, traxedia. Sevilla, 1769 y El delincuente honrado, Sevilla, 1774.
• Composiciones poétiques y romances.
• Elogio fúnebre del marqués de los Llanos de Alguazas. Lleío na Sociedá Económica Matritense el 5 d'agostu de 1780.
• Elogio de Ventura Rodríguez. Madrid, 19 de xineru de 1788 Sociedá Económica Matritense.
• Elogio de Carlos III. Lleío en Real Sociedá Económica de Madrid el 8 de payares de 1788.

Correspondencia

• Vid. Gaspar Melchor de Xovellanos. Obres Completes, tt. II al V. Ed. crítica, introducción y notes de José Miguel Caso González. Uviéu, IFES. XVIII / Illustre Ayuntamientu de Xixón, 1985, 1986, 1988, 1990.

Diariu y Memories

• Diariu (1790–1801).
• Memories familiares (1790–1810).
• Diariu de viaxe dende Bellver (Mallorca) a Jadraque (Guadalajara). Regresu del destierru. Mallorca, 5 d'abril, 23 de xunu de 1808.

Obres de calter pedagóxicu

• Informe al Protomedicato sobre el estado de la Sociedad Médica de Sevilla y del estudio de la Medicina en su Universidad, Sevilla, 3 de setiembre de 1777.
• Discurso sobre el lenguaje y estilo propio de un Diccionario geográfico. Madrid, 23 de xunu de 1788. Lleío pol autor na Real Academia de la Historia.
• Reglamento para el gobierno económico, institucional y literario del colegio de la Inmaculada Concepción de Salamanca, según el nuevo plan aprobado por S. M. a consulta del Real Consejo de las Órdenes. Salamanca, 16 d'agostu de 1790.
• Memorias Pedagógicas (1790–1809).
• Ordenanza para el Real Instituto Asturiano. Xixón, 1 d'avientu de 1793.
• Oración inaugural a la apertura del Real Instituto Asturiano. Xixón, 7 de xineru de 1794.
• Noticia del Real Instituto Asturiano. Xixón, 21 de xunu de 1794.
• Curso de Humanidades Castellanas. Real Institutu Asturianu. Xixón, 1794.
• Carta al Doctor Prado sobre el método de estudiar el Derecho. Xixón, 17 d'avientu de 1795.
• Oración sobre la necesidad de unir el estudio de la literatura al de las ciencias. Real Institutu Asturianu. Xixón, 1797.
• Exposición al Príncipe de la Paz como respuesta a once puntos sobre instrucción pública en España. Xixón, 1797.
• Plan para arreglar los estudios de la Universidad. Madrid, 1798.
• Plan de educación de la nobleza y de las clases pudientes. Aranjuez, 1798.
• Discurso sobre el estudio de la Geografía histórica. Pronunciáu nel Institutu Asturianu de Xixón. 16 de febreru de 1800.
• Memoria sobre la educación pública o sea tratado teórico-práctico de enseñanza con aplicación a las escuelas y colegios de niños. Cartuxa de Valdemosa. Mallorca, 1802.
• Instrucción dada a un joven teólogo al salir de la Universidad, sobre el método que debía observar para perfeccionarse en el estudio de esta ciencia. Castiellu de Bellver, 1805.
• Bases para la formación de un plan general de Instrucción Pública. Sevilla, 16 de payares de 1809.

Obres de calter económicu

• Causas de la decadencia de las Sociedades Económicas. Madrid, 19 de xineru de 1786.
• Informe en el Expediente de la Ley Agraria. Xixón, 26 d'abril de 1794.
• Informe sobre la extracción de aceites a reinos extranjeros. Sevilla, 14 de mayu de 1774.
• Introducción a un discurso sobre el estudio de la Economía civil. 1776.
• Informe sobre el fomento de la marina mercante. Madrid, 1784.
• Informe sobre sustituir un nuevo método para la hilanza de la seda. Madrid, Xunta de Comerciu y Moneda, 1789.
• Dictamen sobre embarque de paños extranjeros para nuestras colonias. Madrid, 1789.

Obres de temes asturianos

• Discurso a la Real Sociedad de Amigos del País de Asturias, sobre los medios de promover la felicidad de aquel Principado. Madrid, 22 d'abril de 1781.
• Cartes del viaxe de Asturies o Cartes a Ponz (1782–1792).
• Juicio crítico de la historia antigua de Guiggia. Xixón, 9 d'agostu de 1782.
• Representaciones acerca de la carretera de Pajares (1783–1799).
• Informes mineros (1789–1797).
• Plan para la formación de un Diccionario del dialecto de Asturias. Xixón, 1790.
• Instrucción para la formación de un Diccionario bable. 1801.
• Apuntamiento sobre la lengua de Asturias (Instrucción pa la formación de un Diccionariu xeográfico d'Asturies). 1804.
• Origen e introducción de la agricultura en Asturias. Castiellu de Bellver, 1804.

Escritos sobro arte

• Discurso pronunciado la Sociedad de Amigos del País de Asturias, sobre la necesidad de cultivar en el Principado el estudio de las ciencias naturales. Uviéu, 6 de mayu de 1782.
• Plan general de mejoras propuesto al Ayuntamiento de Gijón. 1782.
• Informe a la Junta General de Comercio y Moneda sobre el libre ejercicio de las artes. (Según Ceán ye de Madrid, 29 de payares de 1785).
• Memoria del castillo de Bellver, descripción histórico-artística. Castiellu de Bellver, 1805.
• Descripción de La Rioja. Xixón, 16 d'abril de 1795.

Escritos encargaos poles estremaes academies

• Discurso pronunciado a la Sociedad de Amigos del País de Asturias.
• Informes sobre obras de arte (Granada, Córdoba, Bellver, Asturies).
• Sobre la necesidad de unir al estudio de la legislación el de nuestra historia y antigüedades.
• Madrid, Academia de la Historia, Discurso de receición. Madrid, 14 de febreru de 1780.
• Elogio de las Bellas Artes. Pronunciado en la Academia de San Fernando. Madrid, 14 de xunetu de 1781.

Escritos xurídicos

• Informe sobre la reforma de cárceles. Sevilla, 1768–1778.
• Apuntamientos y deducciones relativos al Derecho Público de España. Sevilla, 1 de xunetu de 1774.
• Organización interior de los hospicios, respeuto a su salubridad. Sociedá Económica de Sevilla, 1778.
• Informe sobre indultos generales. Madrid, 1 de xunetu de 1779.
• Reflexiones sobre legislación de España en cuanto al uso de las sepultures. Presentáu na Academia de la Historia en 1781.
• Discurso sobre la necesidad del estudio de la lengua para comprender el espíritu de la legislación. Madrid, 25 de setiembre de 1781.
• Informe sobre la disciplina eclesiástica antigua y moderna relativa al lugar de las sepultures. Madrid, 9 de mayu de 1783.
• Discurso para ilustrar la materia de un informe pedido por el Real y Supremo Consejo de Castilla a la Sociedad Económica de Madrid, sobre el establecimiento de un Montepío para los nobles de la Corte. Madrid, 1784.
• Memoria para el arreglo de la policía de los espectáculos públicos y sobre su origen en España. Xixón, 29 d'avientu de 1790. Presentola reformada en 11 de xunu de 1796.
• Representación a Carlos IV sobre lo que era el Tribunal de la Inquisición. 1798.
• Informe sobre la abolición de la prueba del tormento. Sevilla, 1768- 1778.
• Plan de una disertación sobre las leyes visigodas. Madrid, 1785.
• Exposición sobre la organización de las Cortes. 1809.

Escritos políticos

• Memoria leída en la sociedad Económica de Madrid sobre si se debían o no admitir en ella las señoras. 1786.
• Primera representación a Carlos IV. Valdemosa, Mallorca, 24 d'abril de 1801.
• Segunda representación a Carlos IV. Valdemosa, Mallorca, 1802.
• Representación a Fernandu VII. Mallorca, 18 d'abril de 1808.
• Memoria en defensa de la Junta Central. Santa Cruz de Ribadulla, 2 de mayu de 1811.
• Informe sobre las causas de la decadencia de las sociedades económicas. Madrid, 3 d'ochobre de 1786.
• Reflexiones sobre democracia. (s. a.).

Documentos biográficos

• Notas biográficas. Cabarrús; Campomanes. Madrid, 1783.

Traducciones

• Traducción del Voyage dans l'Egypte pour decouvrir les sources du Nile, de James Bruce. 1795.
• Estrautu y traducción de la Historia de la Cartuja de Valldemuza, de [Fray Alberto Puiz]. 1801.
• Traducción en romance endecasílabu de la traxedia Ifigenia, de Racine. 1794.

Botánica

• Tratado de botánica mallorquina o Flora medicinal de Valldemossa. (1801).

Bibliografía especializada

• Caso, José. Vida y obra de Jovellanos. Ed. Cajastur. Uviéu, 2004.
• Sánchez Corredera, Silverio. Jovellanos y el jovellanismo. Pentalfa Ediciones, Uviéu 2004.

Enllaces esternos

• Wikimedia Commons acueye conteníu multimedia sobre Gaspar Melchor de Xovellanos.
• Fundación Foru Xovellanos del Principáu d'Asturies
• Portal de Filosofía.org consagráu a Xovellanos Archiváu 2006-11-20 en Wayback Machine, con enllaces a delles biografíes.
• Delles obres suyes dixitalizaes na Biblioteca Virtual Miguel de Cervantes
• Muséu Casa Natal de Xovellanos de Xixón (Asturies, España)
• Bibliografía Archiváu 2011-02-27 en Wayback Machine xovellanista.
• Biblioteca dixital xovellanista, del Institutu Feijoo del Sieglu XVIII.
• Videu de la estatua dedicada a Xovellanos en Xixón

• Datos: Q282498
• Multimedia: Gaspar Melchor de Jovellanos
• Cites famoses: Gaspar Melchor de Jovellanos
• Testos: Autor:Gaspar Melchor de Jovellanos