الاعلان العالمى لحقوق الانسان
![](http://upload.wikimedia.org/wikipedia/commons/thumb/d/d4/EleanorRooseveltHumanRights.png/220px-EleanorRooseveltHumanRights.png)
"الاعلان العالمى لحقوق الانسان" هو الاعلان اللى إتبنّتهُ "الجمعيه العامه" للاُمم المتحده. و بيتكلم عن حقوق الانسان الاساسيه, الحقوق اللى لكل الناس عشان هما بَشَر. "الجمعيه العامه للاُمم المتحده" إعتمدت الاعلان فى 10 ديسمبر 1948.
الاعلان العالمى لحقوق الانسان (UDHR) متترجم لأكتر من 300 لغه. و ده عدد لغات أكتر من أى وثيقه تانيه بالنسبه لـ موسوعة جينيس للارقام القياسيه.
أهم الافكار
الاعلان العالمى لحقوق الانسان معمول من 30 ماده. كل ماده بتقول فكره عن حقوق الانسان. معظم الناس بيعتقدو إن دول هما أهم الافكار:
- كل الناس ليها حق الحياه و الحريه و الامن.
- كل الناس ليها حق التعليم.
- كل الناس ليها حق الحصول على شُغلانه.
- كل الناس ليها حق المشاركه فى ثقافة الحياه—يختارو الطريقه اللى يعيشو بيها.
- مافيش حد يتعذب, او يتعامل بـ طريقه متوحّشه او طريقه مش كريمه.
- كل الناس ليها حق تكوين افكار و اراء, عشان يقررو ايه الصح و ايه الغلط, و عشان يختارو دين.
- كل الناس ليها حق الكلام و الكتابه بـ حريه.
مقدمة الاعلان
اما كان الإعتراف بـ الكرامه الاصيله فى كل اعضاء العيله البشريه و بـ حقوقهم المتساويه الثابته هو اساس الحريه و العدل و السلام فى العالم.
و اما كان نسيان حقوق الانسان و إهانتها وصّلو لأعمال همجيه أذت الضمير الإنسانى.
و اما كان ضرورى ان القانون يحمى حقوق الانسان عشان ماتضطرش الناس فى النهايه إنها تتمرد على الإستبداد و الظلم.
و اما كانت شعوب الاُمم المتحده أكدت تانى فى الميثاق إيمانها بـ حقوق الانسان الاساسيه و بـ كرامه الفرد و تقديرهُ و الحقوق المتساويه بين الرجاله والستات, و أكدت على إنها تزؤ التقدم الإجتماعى لـ قدام و على إنها تعلّى مستوا الحياه, فى جو أكبر من الحريه.
و اما كانت الدول الاعضاء إتعهدت بـ التعاون مع الاُمم المتحده على ضمن مراعاة حقوق الانسان و الحريات الاساسيه و إحترامها.
و اما كان للادراك العام للحقوق و الحريات دى الأهميه الكبيره للوفاء الكامل للتعهّد ده.
فـ عشان كده "الجمعيه العامه" يتنادى بـ الاعلان العالمى ده لـ حقوق الانسان.
على إنه المستوا المشترك اللى لازم كل الشعوب و الاُمم توصللهُ, عشان كل واحد و كل هيئه فى المجتمع و هما حاطّين الاعلان ده قدام عينيهم, يبقو عايزين يشجّعو إحترام الحقوق و الحريات دى, بـ التعليم و التربيه و أخد إجراءات مضمونه, قوميه و عالميه, عشان تضمن الإعتراف بيها و حمايتها بـ صورَه عالميه مؤثّره بين الدول الاعضاء نفسها و شعوب المناطق الخاضعه لـ سلطانهم.
البنود
البند 1
كل الناس بيتولدو حرين و متساوين فى الكرامه و الحقوق. إتوهبلهم عقل و ضمير و لازم يعاملو بعض بـ روح أخويه.
البند 2
كل انسان له حق يتمتع بـ كل الحقوق و الحريات اللى موجوده فى الاعلان ده, من-غير أى تمييز, زى التمييز بـ سبب السلاله او اللون او الجنس او اللغه او الدين او الرأى السياسى او أى رأى تانى, او الاصل الوطنى او الإجتماعى او الثروه او الميلاد او أى وضع تانى, من غير أى تفرقه بين الرجاله و الستات.
البند 3
كل واحد له الحق فى الحياه و الحريه و سلامتهُ.
البند 4
ماينفعش إمتلاك او إستعباد أى شخص. و يتمنع الإمتلاك و تجارة العبيد بـ كل أشكالها.
البند 5
مايتعرّضش أى انسان للتعذيب ولا للعقوبات او المعاملات القاسيه او المتوحشه او اللى بتهين الكرامه.
البند 6
كل انسان له الحق, فى أى مكان ممكن يكون فيه, إنهُ يعترف بـ شخصيتهُ القانونيه.
البند 7
كل الناس زى بعض قدام القانون و ليهم الحق فى الإستفاده بـ حمايه متساويه ليهم من-غير أى تفرقه, زى ما كلهم ليهم الحق فى حمايه متساويه ضد أى تمييز يتحيّز بالنسبه للاعلان ده, و ضد أى تحريض على تمييز زى ده. لـ كل شخص الحق فى إنهُ يلجأ للمحاكم الوطنيه عشان تحميه من اعمال فيها إعتداء على الحقوق الاساسيه اللى إدّاهالهُ القانون.
البند 8
كل شخص له الحق فى إنهُ يلجأ للمحاكم الوطنيه عشان تحميه من اعمال فيها إعتداء على الحقوق الاساسيه اللى إدّاهالهُ القانون.
البند 9
مايجوزش القبض على أى انسان او حبسهُ او نَفيهُ بالغصب.
البند 10
الناس كلها ليها الحق بـ التساوى, فى تحديد حقوقها و اِلتزاماتها و أى تُهمَه جنائيه تتوجّهلها فى محاكمه عادله و علنيّه من محكمَه مستقلّه و مش متحيّزه.
البند 11
- كل شخص متهم بـ جريمه بيعتبر برىء لحد ما تتثبت إدانتهُ بـ القانون, فى محاكمَه علنيّه بتأمّنلهُ فيها الضمانات الضروريه للدفاع عنهُ.
- ماحدش يتدان عشان عمل حاجه او إمتنع عن إنه يعملها, إلاّ لو كان ده بيعتبر جريمه بالنسبه للقانون الوطنى او الدولى, وقت الإرتكاب. و بردو, ماتقعش عليه عقوبه أشد من اللى كان يجوز توقيعها وقت إرتكاب الجريمه.
البند 12
ماحدش يتعرض لـ تدخّل إجبارى فى حياتهُ الخاصّه او عيلتهُ او بيتهُ او مراسلاتهُ او لـ حملات على شرفهُ و سمعتهُ. و كل واحد له الحق فى حماية القانون من تدخّل زى ده او الحملات دى.
البند 13
- كل واحد له حرية النقل و إختيار مكان عيشتهُ جوّا حدود كل دوله.
- كل واحد له الحق إنهُ يسافر أى بلاد بما فيها بلدهُ, زى ما له الحق إنهُ يرجعلها.
البند 14
- كل واحد له الحق إنهُ يلجأ لـ بلاد تانيه او يحاول يهرب ليها من الإستقصاد.
- مابينتفعش بـ الحق ده اللى جه للمحاكمه فى جرايم مش سياسيه او عشان اعمال بتناقض اهداف الاُمم المتحده و مبادئها.
البند 15
- كل واحد له الحق إنهُ يتمتّع بـ جنسيه معيّنه.
- مايجوزش حرم شخص من جنسيتهُ بـ الغصب او إنكار حقهُ فى تغييرها.
البند 16
- لما الراجل و الست يوصلو لـ سن الجواز, عندهم حق الجواز و تأسيس عيله من-غير أى تقييد بـ سبب الجنس او الدين. و ليهم حقوق متساويه عند الجواز و وقت الجواز و بعد لَغيهُ.
- مايتعملش عقد الجواز إلا بـ رضا الطرفين اللى عايزين يتجوزو رضا كامل مافيش إكراه فيه.
- العيله هى الوِحده الطبيعيه الاساسيه للمجتمع و ليها حق التمتع بـ حماية المجتمع و الدوله.
البند 17
- كل شخص له حق التملّك لواحدهُ او بـ الإشتراك مع غيرهُ.
- مايجوزش حرم واحد من ملكهُ بالغصب.
البند 18
كل شخص له الحق فى حرية التفكير و الضمير و الدين. و كمان حرية تغيير ديانتهُ او عقيدتهُ, و حرية الإعتراف بيهم بـ التعليم و الممارسه و إقامة الشعائر و مراعاتها سواء كان ده سر او مع الجماعه.
البند 19
كل شخص له الحق فى حرية الرأى و التعبير; و كمان حرية إعتناق الاراء من-غير أى تدخل، و يدوّر و يستقبل و يتكلّم عن المعلومات و الافكار بأى وسيله من-غير التقييد بـ الحدود الجغرافيه.
البند 20
- كل شخص له الحق فى حرية المشاركه فى الجمعيات و الجماعات المسالمه.
- مايجوزش غصب حد على الإنضمام لـ جمعيّه معيّنه.
البند 21
- كل واحد له الحق فى المشاركه فى إدارة المسئوليات العامه لـ بلدهُ بـ طريقه مباشره ياإما عن طريق ممثلين بيختارو إختيار حُر.
- كل شخص له نفس الحق اللى عند غيرهُ انه يمسك المنصب العام فى بلدهُ.
- إرادة الشعب هى مصدر سلطة الحكومه, و بيتعبّر عن الإراده دى بإنتخابات نزيهه كل شويه, بتتعمل على اساس القُرعه السريّه و على اساس المساواه ما بين الكل او حسب أى إجراء زيّهُ بيضمن حرية التصويت.
البند 22
كل واحد, كـ فرد فى المجتمع, له الحق فى الأمانه الإجتماعيه, عن-طريق المجهودات القوميه و التعاون الدولى - بالنسبه للتنظيم و الموارد لـ كل دوله; لازم يبقى عارف الحقوق الإقتصاديه و الإجتماعيه و الثقافيه بتاعتهُ, اللى مافيش غـِنا عنها عشان كرامتهُ و عشان النمو الحُر لـ شخصيتهُ.
البند 23
- كل شخص له الحق فى الشُغل, و له حرية إختيار شُغلانتهُ, بـ شروط عادله و حقّانيّه, زى ما له حق الحمايه من البطاله (العواطلانيّه).
- كل نفر من-غير أى تمييز له الحق فى مُرتّب متساوى للشغلانَه.
- كل نفر بيشتغل, له الحق فى الحقانيّه فى مُرتّب عادل, تضمنلهُ هو و عيلتهُ عيشه بتليق بـ كرامة الانسان, و تتزوّد, عند اللزوم, عن-طريق وسائل الحمايه الإجتماعيه.
- كل شخص له الحق فى إنهُ يعمل و ينضم لـ نقابات عشان يحمى مصلحته.
البند 24
كل شخص له الحق للراحه و وقت فراغ, و بردو فى تحديد وقت معقول لـ ساعات الشغل و فى "أجازات-كل-شويه" مدفوعه.
البند 25
- كل شخص له الحق فى مستوى عيشه كافى عشان يحافظ على الصحه و الرفاهيه له و لـ عيلتهُ. و ده معاه, التغذيه و اللبس و السكن و العنايه الطبيه و بردو الخدمات الإجتماعيه اللى لازمه. و له الحق فى تأمين عيشتهُ فى حالات البطالة (العواطلانيه) و المرض (عَيَه) و العَجز و التَرَمّل (العيشه من-غير جوز) و الشيخوخه و غير الحالات دى زى خسارة وسايل العيشه نتيجة ظروف مش بإرادتهُ.
- الاُمومه و الطفوله عندها الحق فى مساعده و رعايه خاصه. و كل العيال يبقو محميين بـ نفس الحمايه الإجتماعيه, سواء كانت ولادتهم من جواز قانونى او بـ طريقه مش-قانونيه.
البند 26
- كل شخص له الحق فى التعلم. و لازم يكون التعليم فى مراحلهُ الأولانيه و الاساسيه على الاقل مجانى, و ان يكون التعليم الأساسى إجبارى و لازم يكون فيه تعليم فنى و مهنى (شغلاناتى), و ان يتسهّل القبول للتعليم العالى على اساس المساواه الكامله للكل و على اساس الكفاءه.
- التربيه لازم تهدف لـ تنمية شخصية الانسان نمو كامل, و تزييد إحترام الانسان و الحريات الاساسيه و تنمية التفاهم و التسامح و الصحوبيه بين كل الشعوب و الجماعات العنصريه او الدينيه, و تزييد مجهود الاُمم المتحده عشان تخلّى السلام.
- الأبهات عندهم الحق الأولانى فى إختيار نوع تربية ولادهم.
البند 27
- كل واحد له الحق فى إنهُ يشترك إشتراك حُر فى الحياه الثقافيه للمجتمع و فى الإستمتاع بـ الفنون و المشاركه فى التقدم العلمى و الإستفاده من نتايجهُ.
- كل واحد له الحق فى حماية المصالح الادبيه و الماديه بتاعتهُ اللى عملها.
البند 28
كل واحد له من حقهُ نظام إجتماعى دولى يحققلهُ الحقوق و الحريات اللى مكتوبه فى الاعلان ده, بـ تحقيق كامل.
البند 29
- كل واحد عليه واجبات للمجتمع اللى شخضيتهُ بتقدر تنمو فيه نمو حُر و كامل.
- الواحد فى ممارسة حقوقهُ, بيتقيد بـ قيود زى اللى موجوده فى القانون بس; عشان يضمن الإعتراف و الإحترام و الحريات لـ حقوق الباقيين, و عشان يتحقق المطلوب للعَدل للنظام العام و للمصلحه العامه و للأخلاق, فى مجتمع ديموقراطى.
- مايصحش فى أى حاله من الأحوال ان تتمارس الحقوق دى ممارسه تتناقض مع اهداف و مبادئ الاُمم المتحده.
البند 30
مافيش فى الاعلان ده نَص ينفع يتحوّر على إنهُ يدّى لـ دوله او جماعه او فرد, أى حق فى عمل نشاط او عمل, هدفهُ هَد الحقوق و الحريات اللى موجوده فيه.
النقد
نقد الاسلاميين
دول اسلاميه زى السودان وباكستان وإيران والسعوديه انتقدو الاعلان العالمى لحقوق الانسان لإنه من وجهة نظرهم مش بيتماشى مع ثقافة ودين الدول الاسلامية اللى مش بتعترف بالمساواه بين الراجل والست ولا بحرية تغيير الانسان لدينه. وفـ سنة 1982 أعلن ممثل إيران فى الأمم المتحده سعيد رجائي خراساني موقف بلاده من الاعلان العالمى لحقوق الانسان، وقال إن الاعلان العالمى لحقوق الانسان كان "فهم علمانى للمعتقدات اليهودية والمسيحية" ومش ممكن المسلمين يطبقوه من غير تعدي على الشريعه الاسلاميه. وفـ 30 يونيو سنة 2000 قرر اعضاء منظمة المؤتمر الإسلامى الموافقه على اعلان القاهرة لحقوق الانسان فى الاسلام، ويعتبر الاعلان ده وثيقة بديله للاعلان العالمى لحقوق الانسان خاصه بالدول الاسلاميه. الوثيقه بتقول إن للناس الحق فى الحرية والحق فى حياة كريمة حسب أحكام الشريعه الاسلاميه، لكن مش بتعترف بحرية تغيير الدين، ولا مساواة الست بالراجل، ولا بالحيادية عند مقارنة الأديان.
مصادر
لينكات
- ويكى-مصدر فيه نَص أصلى متعلق بـ المقاله دى (Universal Declaration of Human Rights, اعلان عالمي لحقوق الانسان)
- الشبكه العربيه لمعلومات حقوق الانسان
- منظمة مراقبة حقوق الانسان (هيومن رايتس ووتش)