الاعلان العالمى لحقوق الانسان
| ||||
---|---|---|---|---|
(بالانجليزى: Universal Declaration of Human Rights) | ||||
الاسم المختصر | (بالانجليزى: UDHR) | |||
![]() | ||||
نظام اساسى | ||||
جنب من | حقوق انسان | |||
الموقع الرسمى | الموقع الرسمى (انجليزى ) | |||
تعديل ![]() |
![](http://upload.wikimedia.org/wikipedia/commons/thumb/d/d4/EleanorRooseveltHumanRights.png/220px-EleanorRooseveltHumanRights.png)
"الاعلان العالمى لحقوق الانسان" هو الاعلان اللى اتبنّتهُ "الجمعيه العامه" للاُمم المتحده. و بيتكلم عن حقوق الانسان الأساسيه, الحقوق اللى لكل الناس عشان هما بَشَر. "الجمعيه العامه للاُمم المتحده" اعتمدت الاعلان فى 10 ديسمبر 1948.
الاعلان العالمى لحقوق الانسان (UDHR) متترجم لأكتر من 300 لغه. و ده عدد لغات أكتر من أى وثيقه تانيه بالنسبه لـ موسوعة جينيس للأرقام القياسيه.
أهم الأفكار
الاعلان العالمى لحقوق الانسان معمول من 30 ماده. كل ماده بتقول فكره عن حقوق الانسان. معظم الناس بيعتقدو ان دول هما أهم الأفكار:
- كل الناس ليها حق الحياه و الحريه و الأمن.
- كل الناس ليها حق التعليم.
- كل الناس ليها حق الحصول على شُغلانه.
- كل الناس ليها حق المشاركه فى ثقافة الحياه—يختارو الطريقه اللى يعيشو بيها.
- مافيش حد يتعذب, أو يتعامل بـ طريقه متوحّشه أو طريقه مش كريمه.
- كل الناس ليها حق تكوين أفكار و آراء, عشان يقررو ايه الصح و ايه الغلط, و عشان يختارو دين.
- كل الناس ليها حق الكلام و الكتابه بـ حريه.
مقدمة الاعلان
اما كان الاعتراف بـ الكرامه الأصيله فى كل أعضاء العيله البشريه و بـ حقوقهم المتساويه الثابته هو أساس الحريه و العدل و السلام فى العالم.
و اما كان نسيان حقوق الانسان و اهانتها وصّلو لأعمال همجيه أذت الضمير الانسانى.
و اما كان ضرورى ان القانون يحمى حقوق الانسان عشان ماتضطرش الناس فى النهايه انها تتمرد على الاستبداد و الظلم.
و اما كانت شعوب الاُمم المتحده أكدت تانى فى الميثاق ايمانها بـ حقوق الانسان الأساسيه و بـ كرامه الفرد و تقديرهُ و الحقوق المتساويه بين الرجاله والستات, و أكدت على انها تزؤ التقدم الاجتماعى لـ قدام و على انها تعلّى مستوا الحياه, فى جو اكبر من الحريه.
و اما كانت الدول الأعضاء اتعهدت بـ التعاون مع الاُمم المتحده على ضمن مراعاة حقوق الانسان و الحريات الأساسيه و احترامها.
و اما كان للادراك العام للحقوق و الحريات دى الأهميه الكبيره للوفاء الكامل للتعهّد ده.
فـ عشان كده "الجمعيه العامه" يتنادى بـ الاعلان العالمى ده لـ حقوق الانسان.
على انه المستوا المشترك اللى لازم كل الشعوب و الاُمم توصللهُ, عشان كل واحد و كل هيئه فى المجتمع و هما حاطّين الاعلان ده قدام عينيهم, يبقو عايزين يشجّعو احترام الحقوق و الحريات دى, بـ التعليم و التربيه و أخد اجراءات مضمونه, قوميه و عالميه, عشان تضمن الاعتراف بيها و حمايتها بـ صورَه عالميه مؤثّره بين الدول الأعضاء نفسها و شعوب المناطق الخاضعه لـ سلطانهم.
البنود
البند 1
كل الناس بيتولدو حرين و متساوين فى الكرامه و الحقوق. اتوهبلهم عقل و ضمير و لازم يعاملو بعض بـ روح أخويه.
البند 2
كل انسان له حق يتمتع بـ كل الحقوق و الحريات اللى موجوده فى الاعلان ده, من-غير أى تمييز, زى التمييز بـ سبب السلاله أو اللون أو الجنس أو اللغه أو الدين أو الرأى السياسى أو أى رأى تانى, أو الأصل الوطنى أو الاجتماعى أو الثروه أو الميلاد أو أى وضع تانى, من غير أى تفرقه بين الرجاله و الستات.
البند 3
كل واحد له الحق فى الحياه و الحريه و سلامتهُ.
البند 4
ماحدش ينفع يمتلك أو يستعبد أى شخص. امتلاك و تجارة العبيد لازم يتمنعو بـ كل أشكالهم.
البند 5
ماحدش ينفع يتعرض للتعذيب ولا للعقوبات أو المعاملات القاسيه أو المتوحشه أو اللى بتهين الكرامه.
البند 6
كل انسان له الحق انهُ يعترف بيه كـ شخصي قدام القانون فى أى مكان ممكن يكون فيه.
البند 7
كل الناس زى بعض قدام القانون و ليهم الحق فى الاستفاده بـ حمايه متساويه ليهم من-غير أى تفرقه, زى ما كلهم ليهم الحق فى حمايه متساويه ضد أى تمييز يتحيّز بالنسبه للاعلان ده, و ضد أى تحريض على تمييز زى ده. لـ كل شخص الحق فى انهُ يلجأ للمحاكم الوطنيه عشان تحميه من أعمال فيها اعتداء على الحقوق الأساسيه اللى القانون ادّاهالهُ.
البند 8
كل شخص له الحق فى انهُ يلجأ للمحاكم الوطنيه عشان تحميه من أعمال فيها اعتداء على الحقوق الأساسيه اللى القانون ادّاهالهُ.
البند 9
ماحدش ينفع يتعرض للقبض, الحبس أو النَفى بالغصب.
البند 10
الناس كلها ليها الحق بـ التساوى, فى تحديد حقوقها و اِلتزاماتها و أى تُهمَه جنائيه تتوجّهلها فى محاكمه عادله و علنيّه من محكمَه مستقلّه و مش متحيّزه.
البند 11
- كل شخص متهم بـ جريمه بيعتبر برىء لحد ما تتثبت ادانتهُ بـ القانون, فى محاكمَه علنيّه بتأمّنلهُ فيها الضمانات الضروريه للدفاع عنهُ.
- ماحدش ينفع يتدان عشان عمل حاجه أو رفض يعملها, الاّ لو كان ده بيعتبر جريمه بالنسبه للقانون الوطنى أو الدولى, وقت الارتكاب. و بردو, ماتتبقش عليه عقوبه أشد من اللى كانت تنفع تتبطق عليه وقت ارتكاب الجريمه.
البند 12
ماحدش ينفع يتعرض لـ تدخّل اجبارى فى حياتهُ الخاصّه أو عيلتهُ أو بيتهُ أو مراسلاتهُ أو لـ حملات على شرفهُ و سمعتهُ. و كل واحد له الحق فى حماية القانون من تدخّل زى ده أو الحملات دى.
البند 13
- كل واحد له حرية النقل و اختيار مكان عيشتهُ جوّا حدود كل دوله.
- كل واحد له الحق انهُ يسافر أى بلاد بما فيها بلدهُ, زى ما له الحق انهُ يرجعلها.
البند 14
- كل واحد له الحق انهُ يلجأ لـ بلاد تانيه أو يحاول يهرب ليها من الاستقصاد.
- الحق ده مش بينتفعش بيه اللى جه للمحاكمه فى جرايم مش سياسيه أو عشان أعمال بتناقض أهداف الاُمم المتحده و مبادئها.
البند 15
- كل واحد له الحق انهُ يتمتّع بـ جنسيه معيّنه.
- ماينفعش يتحرم حد من جنسيتهُ بـ الغصب أو انكار حقهُ فى تغييرها.
البند 16
- لما الراجل و الست يوصلو لـ سن الجواز, عندهم حق الجواز و تأسيس عيله من-غير أى تقييد بـ سبب الجنس أو الدين. و ليهم حقوق متساويه عند الجواز و وقت الجواز و بعد لَغيهُ.
- مايتعملش عقد الجواز الا بـ رضا الطرفين اللى عايزين يتجوزو رضا كامل مافيش اكراه فيه.
- العيله هى الوِحده الطبيعيه الأساسيه للمجتمع و ليها حق التمتع بـ حماية المجتمع و الدوله.
البند 17
- كل شخص له حق التملّك لواحدهُ أو بـ الاشتراك مع غيرهُ.
- ماينفعش يتحرم حد من ملكهُ بالغصب.
البند 18
كل شخص له الحق فى حرية التفكير و الضمير و الدين. و كمان حرية تغيير ديانتهُ أو عقيدتهُ, و حرية اظهارها بـ التعليم و الممارسه و العباده و الالتزام بيها سواء كان ده سر أو مع الجماعه.
البند 19
كل شخص له الحق فى حرية الرأى و التعبير; و كمان حرية اعتناق الآراء من-غير أى تدخل، و يدوّر و يستقبل و يتكلّم عن المعلومات و الأفكار بأى وسيله من-غير التقييد بـ الحدود الجغرافيه.
البند 20
- كل شخص له الحق فى حرية المشاركه فى الجمعيات و الجماعات المسالمه.
- مايجوزش غصب حد على الانضمام لـ جمعيّه معيّنه.
البند 21
- كل واحد له الحق فى المشاركه فى ادارة المسئوليات العامه لـ بلدهُ بـ طريقه مباشره يااما عن طريق ممثلين بيختارو اختيار حُر.
- كل شخص له نفس الحق اللى عند غيرهُ انه يمسك المنصب العام فى بلدهُ.
- ارادة الشعب هى مصدر سلطة الحكومه, و بيتعبّر عن الاراده دى بانتخابات نزيهه كل شويه, بتتعمل على أساس القُرعه السريّه و على أساس المساواه ما بين الكل أو حسب أى اجراء زيّهُ بيضمن حرية التصويت.
البند 22
كل واحد, كـ فرد فى المجتمع, له الحق فى الأمانه الاجتماعيه, عن-طريق المجهودات القوميه و التعاون الدولى - بالنسبه للتنظيم و الموارد لـ كل دوله; لازم يبقى عارف الحقوق الاقتصاديه و الاجتماعيه و الثقافيه بتاعتهُ, اللى مافيش غـِنا عنها عشان كرامتهُ و عشان النمو الحُر لـ شخصيتهُ.
البند 23
- كل شخص له الحق فى الشُغل, و له حرية اختيار شُغلانتهُ, بـ شروط عادله و حقّانيّه, زى ما له حق الحمايه من البطاله (العواطلانيّه).
- كل نفر من-غير أى تمييز له الحق فى مُرتّب متساوى للشغلانَه.
- كل نفر بيشتغل, له الحق فى الحقانيّه فى مُرتّب عادل, تضمنلهُ هو و عيلتهُ عيشه بتليق بـ كرامة الانسان, و تتزوّد, عند اللزوم, عن-طريق وسائل الحمايه الاجتماعيه.
- كل شخص له الحق فى انهُ يعمل و ينضم لـ نقابات عشان يحمى مصلحته.
البند 24
كل شخص له الحق للراحه و وقت فراغ, و بردو فى تحديد وقت معقول لـ ساعات الشغل و فى "أجازات-كل-شويه" مدفوعه.
البند 25
- كل شخص له الحق فى مستوى عيشه كافى عشان يحافظ على الصحه و الرفاهيه له و لـ عيلتهُ. و ده معاه, التغذيه و اللبس و السكن و العنايه الطبيه و بردو الخدمات الاجتماعيه اللى لازمه. و له الحق فى تأمين عيشتهُ فى حالات البطالة (العواطلانيه) و المرض (عَيَه) و العَجز و التَرَمّل (العيشه من-غير جوز) و الشيخوخه و غير الحالات دى زى خسارة وسايل العيشه نتيجة ظروف مش بارادتهُ.
- الاُمومه و الطفوله عندها الحق فى مساعده و رعايه خاصه. و كل العيال يبقو محميين بـ نفس الحمايه الاجتماعيه, سواء كانت ولادتهم من جواز قانونى أو بـ طريقه مش-قانونيه.
البند 26
- كل شخص له الحق فى التعلم. و لازم يكون التعليم فى مراحلهُ الأولانيه و الأساسيه على الأقل مجانى, و ان يكون التعليم الأساسى اجبارى و لازم يكون فيه تعليم فنى و مهنى (شغلاناتى), و ان يتسهّل القبول للتعليم العالى على أساس المساواه الكامله للكل و على أساس الكفاءه.
- التربيه لازم تهدف لـ تنمية شخصية الانسان نمو كامل, و تزييد احترام الانسان و الحريات الأساسيه و تنمية التفاهم و التسامح و الصحوبيه بين كل الشعوب و الجماعات العنصريه أو الدينيه, و تزييد مجهود الاُمم المتحده عشان تخلّى السلام.
- الأبهات عندهم الحق الأولانى فى اختيار نوع تربية ولادهم.
البند 27
- كل واحد له الحق فى انهُ يشترك اشتراك حُر فى الحياه الثقافيه للمجتمع و فى الاستمتاع بـ الفنون و المشاركه فى التقدم العلمى و الاستفاده من نتايجهُ.
- كل واحد له الحق فى حماية المصالح الأدبيه و الماديه بتاعتهُ اللى عملها.
البند 28
كل واحد له من حقهُ نظام اجتماعى دولى يحققلهُ الحقوق و الحريات اللى مكتوبه فى الاعلان ده, بـ تحقيق كامل.
البند 29
- كل واحد عليه واجبات للمجتمع اللى شخضيتهُ بتقدر تنمو فيه نمو حُر و كامل.
- الواحد فى ممارسة حقوقهُ, بيتقيد بـ قيود زى اللى موجوده فى القانون بس; عشان يضمن الاعتراف و الاحترام و الحريات لـ حقوق الباقيين, و عشان يتحقق المطلوب للعَدل للنظام العام و للمصلحه العامه و للأخلاق, فى مجتمع ديموقراطى.
- مايصحش فى أى حاله من الأحوال ان تتمارس الحقوق دى ممارسه تتناقض مع أهداف و مبادئ الاُمم المتحده.
البند 30
مافيش فى الاعلان ده نَص ينفع يتحوّر على انهُ يدّى لـ دوله أو جماعه أو فرد, أى حق فى عمل نشاط أو عمل, هدفهُ هَد الحقوق و الحريات اللى موجوده فيه.
النقد
نقد الاسلاميين
دول اسلاميه زى السودان و پاكستان وايران و السعوديه انتقدو الاعلان العالمى لحقوق الانسان لانه من وجهة نظرهم مش بيتماشى مع ثقافة و دين الدول الاسلامية اللى مش بتعترف بالمساواه بين الراجل و الست ولا بحرية تغيير الانسان لدينه. و فـ سنة 1982 أعلن سعيد رجائى خراسانى ممثل ايران فى الأمم المتحده موقف بلده السياسى من الاعلان العالمى لحقوق الانسان، و قال ان الاعلان العالمى لحقوق الانسان كان "فهم علمانى للمعتقدات اليهودية و المسيحية" و مش ممكن المسلمين يطبقوه من غير تعدى على الشريعه الاسلاميه. و فى 30 يونيه سنة 2000, قرر أعضاء منظمة المؤتمر الاسلامى الموافقه على اعلان القاهرة لحقوق الانسان فى الاسلام, و الاعلان ده يعتبر وثيقة بديله للاعلان العالمى لحقوق الانسان خاصه بالدول الاسلاميه. الوثيقه بتقول ان الناس ليها الحق فى الحرية و الحق فى حياة كريمة حسب أحكام الشريعه الاسلاميه، لكن مش بتعترف بحرية تغيير الدين, ولا مساواة الست بالراجل, ولا بالحيادية عند مقارنة الأديان.
مصادر
لينكات برانيه
- ويكى-مصدر فيه نَص أصلى متعلق بـ المقاله دى (Universal Declaration of Human Rights, الاعلان العالمى لحقوق الانسان)