الاعلان العالمى لحقوق الانسان

الاعلان العالمى لحقوق الانسان
(بالانجليزى: Universal Declaration of Human Rights)
الاسم المختصر	(بالانجليزى: UDHR)
نظام اساسى
جنب من	حقوق انسان
الموقع الرسمى	الموقع الرسمى (انجليزى )

إلينور روزڤيلت/Eleanor Roosevelt ماسكه النسخه الاسبانى من "الإعلان العالمى لحقوق الإنسان" (1949)

"الإعلان العالمى لحقوق الإنسان" هو الإعلان اللى إتبنّتهُ "الجمعيه العامه" للاُمم المتحده. و بيتكلم عن حقوق الإنسان الأساسيه, الحقوق اللى لكل الناس عشان هما بَشَر. "الجمعيه العامه للاُمم المتحده" إعتمدت الإعلان فى 10 ديسمبر 1948.

الإعلان العالمى لحقوق الإنسان (UDHR) متترجم لأكتر من 300 لغه. و ده عدد لغات أكتر من أى وثيقه تانيه بالنسبه لـ موسوعة جينيس للأرقام القياسيه.

أهم الأفكار

الإعلان العالمى لحقوق الإنسان معمول من 30 ماده. كل ماده بتقول فكره عن حقوق الإنسان. معظم الناس بيعتقدو إن دول هما أهم الأفكار:

• كل الناس ليها حق الحياه و الحريه و الأمن.
• كل الناس ليها حق التعليم.
• كل الناس ليها حق الحصول على شُغلانه.
• كل الناس ليها حق المشاركه فى ثقافة الحياه—يختارو الطريقه اللى يعيشو بيها.
• مافيش حد يتعذب, أو يتعامل بـ طريقه متوحّشه أو طريقه مش كريمه.
• كل الناس ليها حق تكوين أفكار و آراء, عشان يقررو ايه الصح و ايه الغلط, و عشان يختارو دين.
• كل الناس ليها حق الكلام و الكتابه بـ حريه.

مقدمة الإعلان

أما كان الإعتراف بـ الكرامه الأصيله فى كل أعضاء العيله البشريه و بـ حقوقهم المتساويه الثابته هو أساس الحريه و العدل و السلام فى العالم.

و أما كان نسيان حقوق الإنسان و إهانتها وصّلو لأعمال همجيه أذت الضمير الإنسانى.

و أما كان ضرورى ان القانون يحمى حقوق الإنسان عشان ماتضطرش الناس فى النهايه إنها تتمرد على الإستبداد و الظلم.

و أما كانت شعوب الاُمم المتحده أكدت تانى فى الميثاق إيمانها بـ حقوق الإنسان الأساسيه و بـ كرامه الفرد و تقديرهُ و الحقوق المتساويه بين الرجاله والستات, و أكدت على إنها تزؤ التقدم الإجتماعى لـ قدام و على إنها تعلّى مستوا الحياه, فى جو اكبر من الحريه.

و أما كانت الدول الأعضاء إتعهدت بـ التعاون مع الاُمم المتحده على ضمن مراعاة حقوق الإنسان و الحريات الأساسيه و إحترامها.

و أما كان للإدراك العام للحقوق و الحريات دى الأهميه الكبيره للوفاء الكامل للتعهّد ده.

فـ عشان كده "الجمعيه العامه" يتنادى بـ الإعلان العالمى ده لـ حقوق الإنسان.

على إنه المستوا المشترك اللى لازم كل الشعوب و الاُمم توصللهُ, عشان كل واحد و كل هيئه فى المجتمع و هما حاطّين الإعلان ده قدام عينيهم, يبقو عايزين يشجّعو إحترام الحقوق و الحريات دى, بـ التعليم و التربيه و أخد إجراءات مضمونه, قوميه و عالميه, عشان تضمن الإعتراف بيها و حمايتها بـ صورَه عالميه مؤثّره بين الدول الأعضاء نفسها و شعوب المناطق الخاضعه لـ سلطانهم.

البنود

البند 1

كل الناس بيتولدو حرين و متساوين فى الكرامه و الحقوق. إتوهبلهم عقل و ضمير و لازم يعاملو بعض بـ روح أخويه.

البند 2

كل إنسان له حق يتمتع بـ كل الحقوق و الحريات اللى موجوده فى الإعلان ده, من-غير أى تمييز, زى التمييز بـ سبب السلاله أو اللون أو الجنس أو اللغه أو الدين أو الرأى السياسى أو أى رأى تانى, أو الأصل الوطنى أو الإجتماعى أو الثروه أو الميلاد أو أى وضع تانى, من غير أى تفرقه بين الرجاله و الستات.

البند 3

كل واحد له الحق فى الحياه و الحريه و سلامتهُ.

البند 4

ماحدش ينفع يمتلك أو يستعبد أى شخص. إمتلاك و تجارة العبيد لازم يتمنعو بـ كل أشكالهم.

البند 5

ماحدش ينفع يتعرض للتعذيب ولا للعقوبات أو المعاملات القاسيه أو المتوحشه أو اللى بتهين الكرامه.

البند 6

كل إنسان له الحق إنهُ يعترف بيه كـ شخصى قدام القانون فى أى مكان ممكن يكون فيه.

البند 7

كل الناس زى بعض قدام القانون و ليهم الحق فى الإستفاده بـ حمايه متساويه ليهم من-غير أى تفرقه, زى ما كلهم ليهم الحق فى حمايه متساويه ضد أى تمييز يتحيّز بالنسبه للإعلان ده, و ضد أى تحريض على تمييز زى ده. لـ كل شخص الحق فى إنهُ يلجأ للمحاكم الوطنيه عشان تحميه من أعمال فيها إعتداء على الحقوق الأساسيه اللى القانون إدّاهالهُ.

البند 8

كل شخص له الحق فى إنهُ يلجأ للمحاكم الوطنيه عشان تحميه من أعمال فيها إعتداء على الحقوق الأساسيه اللى القانون إدّاهالهُ.

البند 9

ماحدش ينفع يتعرض للقبض, الحبس أو النَفى بالغصب.

البند 10

الناس كلها ليها الحق بـ التساوى, فى تحديد حقوقها و اِلتزاماتها و أى تُهمَه جنائيه تتوجّهلها فى محاكمه عادله و علنيّه من محكمَه مستقلّه و مش متحيّزه.

البند 11

1. كل شخص متهم بـ جريمه بيعتبر برىء لحد ما تتثبت إدانتهُ بـ القانون, فى محاكمَه علنيّه بتأمّنلهُ فيها الضمانات الضروريه للدفاع عنهُ.
2. ماحدش ينفع يتدان عشان عمل حاجه أو رفض يعملها, إلاّ لو كان ده بيعتبر جريمه بالنسبه للقانون الوطنى أو الدولى, وقت الإرتكاب. و بردو, ماتتبقش عليه عقوبه أشد من اللى كانت تنفع تتبطق عليه وقت إرتكاب الجريمه.

البند 12

ماحدش ينفع يتعرض لـ تدخّل إجبارى فى حياتهُ الخاصّه أو عيلتهُ أو بيتهُ أو مراسلاتهُ أو لـ حملات على شرفهُ و سمعتهُ. و كل واحد له الحق فى حماية القانون من تدخّل زى ده أو الحملات دى.

البند 13

1. كل واحد له حرية النقل و إختيار مكان عيشتهُ جوّا حدود كل دوله.
2. كل واحد له الحق إنهُ يسافر أى بلاد بما فيها بلدهُ, زى ما له الحق إنهُ يرجعلها.

البند 14

1. كل واحد له الحق إنهُ يلجأ لـ بلاد تانيه أو يحاول يهرب ليها من الإستقصاد.
2. الحق ده مش بينتفعش بيه اللى جه للمحاكمه فى جرايم مش سياسيه أو عشان أعمال بتناقض أهداف الامم المتحده و مبادئها.

البند 15

1. كل واحد له الحق إنهُ يتمتّع بـ جنسيه معيّنه.
2. ماينفعش يتحرم حد من جنسيتهُ بـ الغصب أو إنكار حقهُ فى تغييرها.

البند 16

1. لما الراجل و الست يوصلو لـ سن الجواز, عندهم حق الجواز و تأسيس عيله من-غير أى تقييد بـ سبب الجنس أو الدين. و ليهم حقوق متساويه عند الجواز و وقت الجواز و بعد لَغيهُ.
2. مايتعملش عقد الجواز إلا بـ رضا الطرفين اللى عايزين يتجوزو رضا كامل مافيش إكراه فيه.
3. العيله هى الوِحده الطبيعيه الأساسيه للمجتمع و ليها حق التمتع بـ حماية المجتمع و الدوله.

البند 17

1. كل شخص له حق التملّك لواحدهُ أو بـ الإشتراك مع غيرهُ.
2. ماينفعش يتحرم حد من ملكهُ بالغصب.

البند 18

كل شخص له الحق فى حرية التفكير و الضمير و الدين. و كمان حرية تغيير ديانتهُ أو عقيدتهُ, و حرية إظهارها بـ التعليم و الممارسه و العباده و الإلتزام بيها سواء كان ده سر أو مع الجماعه.

البند 19

كل شخص له الحق فى حرية الرأى و التعبير; و كمان حرية إعتناق الآراء من-غير أى تدخل، و يدوّر و يستقبل و يتكلّم عن المعلومات و الأفكار بأى وسيله من-غير التقييد بـ الحدود الجغرافيه.

البند 20

1. كل شخص له الحق فى حرية المشاركه فى الجمعيات و الجماعات المسالمه.
2. مايجوزش غصب حد على الإنضمام لـ جمعيّه معيّنه.

البند 21

1. كل واحد له الحق فى المشاركه فى إدارة المسئوليات العامه لـ بلدهُ بـ طريقه مباشره ياإما عن طريق ممثلين بيختارو إختيار حُر.
2. كل شخص له نفس الحق اللى عند غيرهُ انه يمسك المنصب العام فى بلدهُ.
3. إرادة الشعب هى مصدر سلطة الحكومه, و بيتعبّر عن الإراده دى بإنتخابات نزيهه كل شويه, بتتعمل على أساس القُرعه السريّه و على أساس المساواه ما بين الكل أو حسب أى إجراء زيّهُ بيضمن حرية التصويت.

البند 22

كل واحد, كـ فرد فى المجتمع, له الحق فى الأمانه الإجتماعيه, عن-طريق المجهودات القوميه و التعاون الدولى - بالنسبه للتنظيم و الموارد لـ كل دوله; لازم يبقى عارف الحقوق الإقتصاديه و الإجتماعيه و الثقافيه بتاعتهُ, اللى مافيش غـِنا عنها عشان كرامتهُ و عشان النمو الحُر لـ شخصيتهُ.

البند 23

1. كل شخص له الحق فى الشُغل, و له حرية إختيار شُغلانتهُ, بـ شروط عادله و حقّانيّه, زى ما له حق الحمايه من البطاله.
2. كل نفر من-غير أى تمييز له الحق فى مُرتّب متساوى للشغلانَه.
3. كل نفر بيشتغل, له الحق فى الحقانيّه فى مُرتّب عادل, تضمنلهُ هو و عيلتهُ عيشه بتليق بـ كرامة الإنسان, و تتزوّد, عند اللزوم, عن-طريق وسايل الحمايه الإجتماعيه.
4. كل شخص له الحق فى إنهُ يعمل و ينضم لـ نقابات عشان يحمى مصلحته.

البند 24

كل شخص له الحق للراحه و وقت فراغ, و بردو فى تحديد وقت معقول لـ ساعات الشغل و فى "أجازات-كل-شويه" مدفوعه.

البند 25

1. كل شخص له الحق فى مستوى عيشه كافى عشان يحافظ على الصحه و الرفاهيه له و لـ عيلتهُ. و ده معاه, التغذيه و اللبس و السكن و العنايه الطبيه و بردو الخدمات الإجتماعيه اللى لازمه. و له الحق فى تأمين عيشتهُ فى حالات البطاله و المرض و العَجز و التَرَمّل و الشيخوخه و غير الحالات دى زى خسارة وسايل العيشه نتيجة ظروف مش بإرادتهُ.
2. الاُمومه و الطفوله عندها الحق فى مساعده و رعايه خاصه. و كل العيال يبقو محميين بـ نفس الحمايه الإجتماعيه, سواء كانت ولادتهم من جواز قانونى أو بـ طريقه مش-قانونيه.

البند 26

1. كل شخص له الحق فى التعلم. و لازم يكون التعليم فى مراحلهُ الأولانيه و الأساسيه على الأقل مجانى, و ان يكون التعليم الأساسى إجبارى و لازم يكون فيه تعليم فنى و مهنى, و ان يتسهّل القبول للتعليم العالى على أساس المساواه الكامله للكل و على أساس الكفاءه.
2. التربيه لازم تهدف لـ تنمية شخصية الإنسان نمو كامل, و تزييد إحترام الإنسان و الحريات الأساسيه و تنمية التفاهم و التسامح و الصحوبيه بين كل الشعوب و الجماعات العنصريه أو الدينيه, و تزييد مجهود الاُمم المتحده عشان تخلّى السلام.
3. الأبهات عندهم الحق الأولانى فى إختيار نوع تربية ولادهم.

البند 27

1. كل واحد له الحق فى إنهُ يشترك إشتراك حُر فى الحياه الثقافيه للمجتمع و فى الإستمتاع بـ الفنون و المشاركه فى التقدم العلمى و الإستفاده من نتايجهُ.
2. كل واحد له الحق فى حماية المصالح الأدبيه و الماديه بتاعتهُ اللى عملها.

البند 28

كل واحد له من حقهُ نظام إجتماعى دولى يحققلهُ الحقوق و الحريات اللى مكتوبه فى الإعلان ده, بـ تحقيق كامل.

البند 29

1. كل واحد عليه واجبات للمجتمع اللى شخضيتهُ بتقدر تنمو فيه نمو حُر و كامل.
2. الواحد فى ممارسة حقوقهُ, بيتقيد بـ قيود زى اللى موجوده فى القانون بس; عشان يضمن الإعتراف و الإحترام و الحريات لـ حقوق الباقيين, و عشان يتحقق المطلوب للعَدل للنظام العام و للمصلحه العامه و للأخلاق, فى مجتمع ديموقراطى.
3. مايصحش فى أى حاله من الأحوال ان تتمارس الحقوق دى ممارسه تتناقض مع أهداف و مبادئ الاُمم المتحده.

البند 30

مافيش فى الإعلان ده نَص ينفع يتحوّر على إنهُ يدّى لـ دوله أو جماعه أو فرد, أى حق فى عمل نشاط أو عمل, هدفهُ هَد الحقوق و الحريات اللى موجوده فيه.

النقد

نقد الإسلاميين

دول إسلاميه زى السودان و پاكستان و إيران و السعوديه إنتقدو الإعلان العالمى لحقوق الإنسان لإنه من وجهة نظرهم مش بيتماشى مع ثقافة و دين الدول الاسلامية اللى مش بتعترف بالمساواه بين الراجل و الست ولا بحرية تغيير الإنسان لدينه. و فـ سنة 1982 أعلن سعيد رجائى خراسانى ممثل إيران فى الامم المتحده موقف بلده السياسى من الإعلان العالمى لحقوق الإنسان، و قال إن الإعلان العالمى لحقوق الإنسان كان "فهم علمانى للمعتقدات اليهودية و المسيحية" و مش ممكن المسلمين يطبقوه من غير تعدى على الشريعه الاسلاميه. و فى 30 يونيه سنة 2000, قرر أعضاء منظمة المؤتمر الإسلامى الموافقه على إعلان القاهرة لحقوق الإنسان فى الإسلام, و الإعلان ده يعتبر وثيقة بديله للإعلان العالمى لحقوق الإنسان خاصه بالدول الإسلاميه. الوثيقه بتقول إن الناس ليها الحق فى الحرية و الحق فى حياة كريمة حسب أحكام الشريعه الاسلاميه، لكن مش بتعترف بحرية تغيير الدين, ولا مساواة الست بالراجل, ولا بالحيادية عند مقارنة الأديان.

مصادر

• الإعلان العالمى لحقوق الإنسان; إنجليزى: [1] [2]; عربى: [3] [4].

لينكات برانيه

• ويكى-مصدر فيه نَص أصلى متعلق بـ المقاله دى (Universal Declaration of Human Rights, الإعلان العالمى لحقوق الإنسان)