[plug.in]

Dialäkt: Baseldütsch

[plug.in] isch e Mediebetriib z Baasel gsi. Er het Usstellige und Veraastaltige organisiert, het zämme mit andere Instituzione Brojekt realisiert, het Künstler bi dr internazionali Vernetzig ghulfe und het zwüsche dr Mediekunst und em bräite Publikum vermiddlet. 2011 isch s [plug.in] mit em Festiwal vo de elektronische Künst Shift zum Huus für elektronischi Künst zämmeglegt worde.

S [plug.in] isch entstande, wil mä sit em Ändi vo de 1990er Joor z Baasel gspüürt het, ass es für Videokunst und Nöiji Medie kä Blatz geb. Drzue isch cho, ass 1998 die jöörlige Baasler Videodääg iigstellt worde si. Dr Kanton Baasel-Stadt und d Christoph Meriaa stifdig häi sich zämmedoo zum die Kunstsparte z understütze. Dr Veräin Forum für neue Medien isch 1999 gründet worde as Dräägerschaft für dr blaanti Ruum mit Mediekunstbetriib, und dr Kanton und d Stiftig si für d Chöste ufchoo. Denn isch au no s Viper Festival vo Luzärn uf Baasel verlegt worde.

S Tentrum isch im Joor 2000 ufdoo worde und het d Form vom ene öffentlig zuegänglige Woonzimmer mit ere Bar und ere Bibliothek ghaa. Jedes Joor het s öbbe fümf Usstellige und vierzig Veraastaltige (Presentazione, Performances, Füerige, Vordrääg usw.) zur Mediekunst und dr digitale Kultur gee, wo 7'000 Bsuecher aazooge häi. Kooperazioone het s under Anderem mit Viper, HyperWerk, dr Hoochschuel für Gstaltig und Kunst z Baasel, em Mediewüsseschaftlige Seminar vo dr Uniwersidäät Baasel, Point-de-vue, oder xcult und kantonale Museum gee.

Lueg au

• Huus für elektronischi Künst
• Museum z Baasel

Weblingg

• plug.in

47.5547222222227.6016111111111