Indie
भारत गणराज्य (Hindi) | |||||
Bhārat Gaṇarājya Republic of India (ängl.) | |||||
Republik Indie | |||||
| |||||
Wahlspruch: सत्यमेव जयते Satyameva Jayate Sanskrit, „Ellai d Wohret sigt“ | |||||
Amtsspraach | |||||
Hauptstadt | Nei-Delhi | ||||
Staatsoberhaupt | Draupadi Murmu | ||||
Regierigschef | Narendra Modi | ||||
Flächi | 3.287.469[1] km² | ||||
Iiwohnerzahl | 1.210.569.573 (Volkszellig 2011)[1] | ||||
Bevölkerigsdichti | 368 Iiwohner pro km² | ||||
Bruttoinlandsprodukt
|
2011[2]
| ||||
Human Development Index | ▲ 0,586 (135.)[3] | ||||
Währig | Indischi Rupie (INR) | ||||
Unabhängigkeit | 15. Augschte 1947 (vum Verainigte Chenigrych) | ||||
Nationalhimne | Jana Gana Mana | ||||
Nationalfiirtig | 26. Jänner (Dag vu dr Republik) 15. Augschte (Unabhängigkaitsdag) 2. Oktober (Gandhi Jayanti) | ||||
Zitzone | UTC+5:30 | ||||
Kfz-Kennzeiche | IND | ||||
ISO 3166 | IN, IND, 356 | ||||
Internet-TLD | .in | ||||
Vorwahl | +91 | ||||
![]() | |||||
![]() |
Indie (Hindi: भारत, Bhărat) isch e Staat z Sidasie, wu dr grescht Dail vum indische Subkontinänt umfasst. Indien isch e Bundesrepublik, wu vu 29 Bundesstaate bildet wird un derzue sibe bundesunmittelbari Biet umfasst. D Hauptscadt isch Nei-Delhi. Dr Himalaya bildet di natyrli Nordgränz vu Indie, im Siden umschließt dr Indisch Ozean s Staatsbiet. Indie gränzt an Pakistan, s chinesisch Autonom Biet Tibet, Nepal, Bhutan, Myanmar un Bangladesch. Nochberstatten im Indische Ozean sin Sri Lanka un d Maledive. Indien isch e multiethnische Staat un mit iber 1,2 Milliarden Yywohner (2011) no dr Volksrepublik China s bevelkerigsrychscht Land vu dr Ärd. Indie giltet, no dr Yywohnerzahl, as greschti Demokraty vu dr Wält.[4] Vu dr Landesflechi här ghert s zue dr zeh greschte Länder.
Härchumft vum Name
[ändere | Quälltäxt bearbeite]Dr Name Indien isch vum Strom Indus abglaitet. Däm sy Name goht iber Vermittlig vum Altgriechisch (Indos) un Altpersisch (Hinduš) uf s Sanskrit-Wort sindhu mit dr Bedytig „Fluss“ zrugg.. Di europäische Seefahrer hän ganz Sid- un Sidoschtasie „Indie“ gnännt, was mer no an Näme wie Inselindie („Insulinde“) un em Staatsname Indonesie cha sää. In dr Kolonialzyt isch d Bedytig allmee uf di hitige Biet vu Indie, Pakistan un Bangladesch un bi dr Grindig vum indische Staat schließli uf di hitig Bediytig yygschränkt wore. Vu dr persisch-islamische Form Hind bzw. Hindustan laite si au d Uusdruck Hindu un dr Name vu dr Sproch Hindi här. Dr amtli Name vu Indie in dr maischte Landessproche (z. B. Hindi Bhārat) stammt vu dr Sanskrit-Bezaichnig Bhārata ab, wu „(Land) vum Bharata“ maint un uf e mythische Herrscher verwyst.
Geografy
[ändere | Quälltäxt bearbeite]Landschaftsgliderig
[ändere | Quälltäxt bearbeite]![](http://upload.wikimedia.org/wikipedia/commons/thumb/b/b0/Indiahills_%28de%29.png/220px-Indiahills_%28de%29.png)
![](http://upload.wikimedia.org/wikipedia/commons/thumb/8/88/Kangchenjunga_from_Thangshing.jpg/220px-Kangchenjunga_from_Thangshing.jpg)
![](http://upload.wikimedia.org/wikipedia/commons/thumb/0/09/Thar_Khuri.jpg/220px-Thar_Khuri.jpg)
![](http://upload.wikimedia.org/wikipedia/commons/thumb/8/81/Kerala_Kuttanad1.jpg/220px-Kerala_Kuttanad1.jpg)
Indien isch mit ere Flechi vu 3.287.490 Quadratkilometer[1] dr sibtgrescht Staat vu dr Ärd. Är goht in Wescht-Oscht-Richtig vum 68. bis zum 97. eschtlige Lengegrad iber rund 3000 Kilometer un in Nord-Sid-Richtig, zwischem 8. un em 37. Grad nerdliger Braiti, rund 3200 Kilometer. Indie gränzt an sechs Staate: Pakistan (2912 Kilometer), China (Tibet; 3380 Kilometer), Nepal (1690 Kilometer), Bhutan (605 Kilometer), Myanmar (1463 Kilometer) un Bangladesch (4053 Kilometer). Insgsamt hän die Gränze ne Lengi vu 14.103 Kilometer. Wel dr nerdlig Dail vum umstrittene Kaschmir syter anne 1949 unter pakistanischer Kontroll stoht (Waffestillstand noch em Kaschmir-Konflikt), het Indie kai gmainsami Gränze me mit Afghanistan. D Kischte vum Land isch rund 7000 Kilometer lang. Di natyrli Gränzen im Norden un Nordoschte bildet dr Himalaya, s hegscht Gebirg vu dr Wält, wu im usserschte Nordweschte dur s Hochdal vum Indus vum Karakorum drännt wird. Sidli vum Himalaya schließe si di braite, fruchtbare Stromebene vu dr Fliss Ganges un Brahmaputra aa. Im Weschte goht s Stromland vum Ganges in e Wieschti Thar iber, wu im Oschte un Side vum Aravalligebirg begränzt wird. Sidli dervu lige d Simpf vum Rann vu Kachchh un d Halbinsle Kathiawar. Dr Nordoschte vu Indie, mitsamt dr Brahmaputra-Ebeni, verbindet nume ne schmale Korridor zwische Bangladesch un Nepal bzw. Bhutan mit em ibrige Land. D Nordoschtregion wird dur s bis zue 3800 Meter hoch Patkai- oder Purvachalgebirg vu Myanmar un s fascht 2000 Meter hoch Khasigebirg vu Bangladesch abgschirmt.
S Hochland vu Dekkan nimmt dr grescht Dail vu dr indische Halbinsle yy, wu chydelfermig in dr Indische Ozean firiragt, S Vindhya- un s Satpuragebirg schirme dr Dekkan von dr Gangesebeni im Norden ab. Im Weschten wird er vu dr bis zue 2700 Meter hoche Westghat, im Oschte vu dr flachere Oschtghat begränzt. Beedi Gebirgszig dräffen im Side, wu d Halbinsel spitz zum Kap Komorin zuelauft, zämme. D Weschtghat gehn gäch aabe zue dr Konkan- un Malabarkischte am Arabische Meer. D Oschtghat gehn in di braitere eschtlige Kistenebene am Gol vu Bengalen iber.
Zue Indie ghere au no drei Inselgruppe, wu em indische Subkontinänt vorglageret sin. Rund 300 Kilometer weschtli vu dr Malabarkischte lige d Korallenatoll vu Lakshadweep, wu d Inselgruppe vu dr Lakkadiven un Amindiven un d Insle Minicoy umfasst. Sideschtli vu dr Halbinsle, zwische 1000 un 1600 Kilometer vum indische Feschtland ewäg, lige d Andamanen un d Nikobare.
Dr hegscht Punkt vu Indien isch dr Bärg Kangchendzönga mit 8598 Meter Hechi. Är lyt im usserschte Weschte vu Sikkim; iber ihn verlauft d Gränze zue Nepal. Dr hegscht Bärg, wu ganz uf indischem Biet lyt, isch d Nanda Devi mit 7822 Meter. Dr diefscht Punkt isch dr Kuttanad-Sank, wu zwee Meter unter em Meer an dr Malabarküischte lyt.
Fliss un See
[ändere | Quälltäxt bearbeite]![](http://upload.wikimedia.org/wikipedia/commons/thumb/a/ae/India_Rivers_%28de%29.png/220px-India_Rivers_%28de%29.png)
Alli greßere Fliss vu Indie entspringen in aire vu dr drei Hauptwasserschaide vum Subkontinänt: im Himalaya, in dr zentralindische Vindhya- un Satpura-Bärg oder in dr Weschtghat. Dr lengscht un wichtigscht Fluss z Indien isch dr Ganges (Ganga), wu im Himalaya entspringt. Syni lengschte Näbefliss sin d Yamuna un dr Gomti; dr Chambal isch e Zuefluss vu dr Yamuna. Dr Brahmaputra, wu dur dr Nordoschte fließt, verainigt sich mit em Ganges un bildet vor dr Mindig in dr Golf vu Bengale ne gwaltig Delta. Dr Wescht vum Gangesdelta ghert zue Indie, dr grescht Dail zuem Nochberland Bangladesch. Fascht e Drittel vu dr Flechi vu Indie ghert zum Yyzugsbiet vu Ganges un Brahmaputra. Im usserschte Norde fließt dr Indus in Sidoscht-Nordwescht-Richtig dur dr Bundesstaat Jammu un Kashmir. S Hochland vu Dekkan wird vu ne baar große Fliss entwässeret. D Narmada un dr Tapti minden in s Arabisch Meer, derwylscht Godavari, Krishna, Mahanadi un Kaveri zum Golf vu Bengale fließe.
Drotz ass Indien eso groß isch, het s nume wenig natyrlig See. Fir Bewässerig un Stromgwinnig sin im ganze Land zum Dail riisigi Stausee aaglait wore. Di greschte sind dr Hirakud-Stausee (746 Quadratkilometer) z Odisha, dr Gandhi-Stausee (648 Quadratkilometer) z Madhya Pradesh un dr Govind-Ballabh-Pant-Stausee (465 Quadratkilometer) an dr Gränze zwische Uttar Pradesh un Chhattisgarh.
Geology
[ändere | Quälltäxt bearbeite]![](http://upload.wikimedia.org/wikipedia/commons/thumb/2/2f/Himalaya-formation.gif/170px-Himalaya-formation.gif)
Indie het bis am Änd vum Jura zum Sidkontinänt Gondwana ghert. In dr Chrydezyt isch vu dr Kontinäntalscholle vu dr Antarktis abgrisse un un in ere ärdgschichtli extrem churze Zyt vu 50 Millione Johr quer dur dr gsamte Tethys-Ozean gege dr Side vu dr Eurasische Platte driftet. S Uffenanderdräffe vu däne beede Ärddail isch vu gschetzt eppe 43 bis 64 Millione Johr[5] am Aafang vum Paläogen gschää. Wu di friejere Kontinäntalränder uffendandergstoße sin, sin dr Himalaya un d Nochbergebirg ufgfaltet un s Hochland vu Tibet aaglupft wore. Di Indisch Platte bewegt si bis hite no Norde, dur des wird dr Himalaya all Johr um e baar Miliimeter glupft. D Flussebene, wu em vorglageret sin, sin dur Sedimentablagerigen im Pleistozän entstande.
Vylfältiger sin d Gstaiformatione vum Dekkan. Dr Großdail nämme proterozoische Formationen im Siden un Oschten yy, dr in dr Chrydezyt entstanden vulkanisch Dekkan-Trapp im Weschten un Nordweschten un uugformti Kraton im Nordoschten un Norde, wu zue dr wältwyt elt-schte Dail vu Ärdkruschte ghere.
Klima
[ändere | Quälltäxt bearbeite]![](http://upload.wikimedia.org/wikipedia/commons/thumb/4/45/India_annual_rainfall_map_de.svg/220px-India_annual_rainfall_map_de.svg.png)
Mit Uusnahm vu dr Bärgregione herrscht z Nord- un z Zäntralindie ne subtropisch Kontinentalklima, im Siden un in dr Kischtebiet dergege ne sterker maritim bregt tropisch Klima. Im Norde het s im Johresverlauf zum Dail argi Tämperaturschwankige. In dr nerdlige Diefebene herrschen im Dezämber un Jänner 10 bis 15 °C; in dr haißeschte Zyt zwischen April un Juni cha s Hegschttämperature vu 40 bis iber 50 °C gee. Im Side dergege isch s ganz Johr relativ konschtant haiß. D Niderschlagsmängine wären im ganze Land vor allem dur dr Monsun beyyflusst. Dr Sidwescht- oder Summermonsun setzt in dr maischte Landesdail im Juni yy un bringt je no Region bis Septämber oder Oktober starki Niderschleg. Wäg dr seli unterschidlige Topografy isch d Niderschlagsverdailig arg uuglychmäßig. Dr sterkscht Rääge het s an dr Weschtkischte, in dr Weschtghat, an dr Häng vum Himalaya un z Nordoschtindie. Am druckeschte isch s in dr Thar. D Nordoscht- oder Wintermonsunwind zwische Oktober un Juni, wu us Zäntralasie chemme, bringe chuum Fychtigkait, sällewääg het s in dr maischte Gegnige 80 bis iber 90 Brozänt vum jährlige Gsamtniderschlag in dr Summermonet. Nume im Sidoschte git s au bim Nordoschtmonsun Rääge, wel d Luftstremige iber em Golf vu Bengale Fychtigkait ufnämme.
Vegetation
[ändere | Quälltäxt bearbeite]![](http://upload.wikimedia.org/wikipedia/commons/thumb/c/ca/Starr_010304-0485_Tectona_grandis.jpg/220px-Starr_010304-0485_Tectona_grandis.jpg)
Dur d Greßi vum Land un di verschidene klimatischi Bedingige in dr ainzelne Landesdail git s z Indie ne großi Landschaftsvylfalt. Doderby goht d Bflanzewält vu Indie vun ere Hochgebirgsvegetation im Himalaya bis zue tropische Räägewälder im Side. Wyti Dail vu dr urspringlige Vegetationsdecki sin hite gschlife, statt däm isch Indien in dr Hauptsach dur Kulturlandschafte bregt. Nume ne ne Fimftel vum Land isch bewaldet, offiziälli Aagobe doderzue schwanke, zum dail zelle si au degradierti Biet un uffigi Wälder derzue.
In dr diefere Lage vum Himalaya git s no greßeri Wälder. Wel d Niderschleg an dr Hänge vum Gebirg vu Oscht no Wescht abnämme, git s im Oschthimalaya immergrieni Fycht- un Räägewälder, wu em Weschte zue all liechter un druckener wäre. Laubwälder mit Aiche un Cheschtene herrsche vor; karakteristisch fir dr Oschthimalaya sin Rhododendre. In hechere Lage dominiere Nodelbaim, vor allem Zedere un Fohre. Di steppen- un wieschteartige Hochdäler z Ladakh un andere Dail vum weschtlige Innerhimalaya gehn in s drucke Hochland vu Tibet iber. D Vegetationsgränze lyt bi eppe 5000 Meter. Dr schwär zuegängli Nordoschte isch zum Dail no dicht bewaldet. Bsundersch hochi Niderschlagsmängine mache dert halbimmergrieni Fychtwälder megli.
Dr grescht Dail vu dr Gangesebeni, vum Dekkan un vu dr Randbegirg, wu do draa aagränze, isch friejer vu Monsunwälder deckit gsii: Hite git s dodervu nume no Räscht, zmaischt in Bärgregione. D Eben, wu intänsiv buurt wird, sin dergege fascht ganz waldfrei. Monsunwälder gheie s Laub in dr Druckeperidoden ab. Je no Niderschlagsmängi un Lengi vu dr Druckeperiod unterschaidet mer zwische Fycht- un Druckewälder. Wälder, wu zwische 1500 un 2000 Millimeter Johresniderschlag kriege, nännt mer in dr Regle Fychtwälder, wu s Laub abgheie. Si herrschen im nordeschtlige Dekkan, z Odisha un z Weschtbengalen un uf dr windabgwändete Syte vu dr Weschtghat vor. Bi Niderschlege zwische 1000 un 1500 Millimeter im Johr schwätzt mer vu Druckewälder, wu s Laub abgheie. Die dominiere z Indie. Wäg dr dinne Baumdolder hän Monsunwälder e dicht Unterholz. Di karakteristisch Baumart vum Norde isch dr Salbaum (Shorea robusta), im zäntralen un weschtlige Dekkanhochland isch dr Teakbaum (Tectona grandis) un im Side dr Sandelholzbaum (Santalum album). Bambusarte sin wyt verbraitet.
In dr druckenere Dail vu Indie, wie Rajasthan, Gujarat, em Weschtrand vum Gangesdiefland oder em zäntrale Dekkan, wachse di vor allem medizinisch bruuchte, endemische Niembaim. Im aride Klima hän si uffigi Dornewälder uusbildet, wu in dr Wieschti Thar in e Halbwieschtevegetation mit verainzelte Dornehecken ibergehn. In dr fychte Wälder git s no relativ großi Dail vu dr urspringlige, immergrienen oder halbimmergriene Fychtwälder. Si sin bregt dur di fir tropischi Räägewälder typisch Stockwärchgliderig. E Dail vu dr hoche Baim vum oberschte Stockwärch, gheie je no ohreszyt ihre Laub ab, Arte, wu dodrunter wachse, sin dergege immergrien. Epiphyte wie Orchidee un Farn chemmen in ere große Vylfalt vor. Mangrove, salzwasserresischtänti Gezytenwälder, sin nume an dr Oschtkischte vu Indie verbraitet. D Sundarbans im Ganges-Brahmaputra-Delta wyse di dichteschte Mangrovebständ vum Land uf. Anderi Gezytwälder gits in dr Mindigsdelta vu Mahanadi, Godavari un Krishna.
Dierwält
[ändere | Quälltäxt bearbeite]![](http://upload.wikimedia.org/wikipedia/commons/thumb/1/1c/Pfau_imponierend.jpg/220px-Pfau_imponierend.jpg)
Wäg syre Landschaftsvylfalt findet mer z Indie ne seli arterychi Dierwält vor. Mer schetzt, ass rund 350 Suuger-, 1200 Vogel-, 400 Reptilie- un 200 Amphibienarte haimisch sin. Vyl Arte chemen aber nume no in Rugzugsbiet Wäldern, Moos, Bärg- un Buckelregione vor. In indische Gwässer lääbe derzue iber 2500 Fischarte.
Di grescht Suugerart vu Indie isch dr Indisch Elifant, wu näb em Chenigsdiger au am bekannteschten isch. Dr Diger isch langi Zyt vum Uusstärbe bedrot gsii, dur d Yyrichtig vu Digerschutzbiet hän si d Bständ aber wider chenen erhole. Ainewäg git s nume wenigi döusert Exemplar in freier Wildbahn. Usser em Diger lääben au no anderi Großchatze z Indie, dodrunter Leoparden un Leebe. Di letschtere git s uusschließlig im Gir-Nationalpark z Gujarat, em letschte Ruggzugsbiet vum Asiatische Leeb. Dr sälte Schneeleopard bewohnt di hoche Gebirgsregione vum Himalaya. Di bekanntscht un wytverbraitescht vu dr chlainere Raubdierarten isch dr Mungo. S Panzernashorn läbt nume no in Sumpf- un Dschungelbiet z Assam, vor allem im Kaziranga-Nationalpark. Wyt verbraitet sin dergege Baarhuefer. Doderzue gheren unter anderem Wildsei, Muntjak, Sambar, Axishirsch, Söuhirsch, Barasingha, Wasserbiffel, Gaur un verschideni Antilopenarte. Au Affe git s z Indie vyl. Rhesusaffe gälte dr Hindu as hailig, derfen nit beläschtigt wären un hän si wäge däm sogar in Stedt uusbraitet. D Hanuman-Langure, wu in ganz Indie verbraitet sin, wären glychfalls as hailig aagluegt. Dernäbe git sno anderi Langurenarte un Makake. In dr Druckebiet vum Nordweschte lääbe no ne baar indischi Halbesel, vor allem im Dhrangadhra-Wildreservat im Chlaine Rann vu Kachchh. Im fychten Oschte vum Land lääbe dergegen Arte vum tropische Räägewald, wie dr Wysshandgiibbon un dr Nääbelparder. Anderi Suuger sin d Rothind, Straifehyäne, Bengalfichse, wu s in dr Hauptsach in Graslandschafte git, un d Lippenbäre, wu gärn dichti Wälder hän. Im Ganges un Brahmaputra un dr Nääbefliss vun ene findet mer no ab un zue dr Gangesdelfin.
D Vogelwält vu Indien isch mit iber 1200 yyhaimischen Arte – meh wie in ganz Europa – arg vylfältig. Derzue chemen im Winter e Huffe Zugvegel vu Nordasie. Dr Pfau giltet as Nationalvogel un isch wyt verbraitet. Hyfig sin au Duube, Graager, Wäbervegel, Ronebicker, Pitta, Drongo, Sittich, Nektarvegel un Pirol. In Fychtbiet lääbe Stoorche, Raigel, Kranich, Ibis un Yysvegel. Unter dr Gryfvegel sin Bengal- un Schmutzgyyr am verbraitetschte.
Rund d Helfti vu allene z Indie haimische Reptilienarte sin Schlange wie d Brilleschlang, d Chengiskobra un dr Digerpython. In Fychtbieten findet mer au Sumpfkrokodil. Seli sälten isch dr schych Gangesgavial.
Naturschutz
[ändere | Quälltäxt bearbeite]Z Indie het s 102 Nationalpark mit ere Gsamtflechi vu 39.888 km² (Stand Juni 2012), dodervu sin 85 vu dr International Union for Conservation of Nature and Natural Resources (IUCN) in d Kategory II (Nationalpark) yygstuft wore. Derzue git s 515 Wildreservat, dodervu sin 446 in d IUCN-Kategory IV yydrait un wyteri Schutzbiet, ußerdäm no speziälli Diger-Reservat.
Bevelkerig
[ändere | Quälltäxt bearbeite]Ethnischi Gruppe
[ändere | Quälltäxt bearbeite]![](http://upload.wikimedia.org/wikipedia/commons/thumb/d/d4/Indien_Sprachfamilien.svg/220px-Indien_Sprachfamilien.svg.png)
Indien isch e Vylvelkerstaat. Di ethnisch Vylfalt isch verglychbar mit däre vu Europa. Rund 72 Brozänt sin Indoarier, 25 Prozent sin Dravide, wu in dr Hauptsach im Side läbe. 3 Brozänt ghere andere Velkergruppe, vor allem tibeto-birmanischi, Munda- un Mon-Khmer-Velker im Himalayaruum un z Nordoscht- un z Oschtindie.
8,6 Brozänt vu dr Yywohner zelle zue dr indigene Stammesbevelkerig, wu si sälber „Adivasi“ nänne. Di indisch Verfassig duet iber 600 Stämm as sognännti scheduled tribes anerkänne. Si stehn zmaischt usserhalb vum hinduistische Kaschtesischtem un hän drotz dr Schutzgsetz großi soziali Noodail.[6] Hochi Bevelkerigsaadail hän d Adivasi in de Nordoschtregion (bsundersch z Mizoram, z Nagaland, z Meghalaya, z Arunachal Pradesh, z Manipur, z Tripura, z Sikkim) un in dr oscht- un zäntralindische Bundesstaate Jharkhand, Chhattisgarh, Odisha un Madhya Pradesh. Wäg dr soziale Diskriminierig hän linksradikali Gruppierige wie di maoistische Naxalite bi dail vu dr Adivasi e starke Rugghalt. Doderzue cheme separatistischi Bewegige vu verschidene Völker – zem Byschpel vu dr mongolide Naga, Mizo un Bodo, aber au vu dr indoarische Assamese – z Nordoschtindie, wu Spannige zwische dr yyhaimische Bevelkerig un zuegwanderete Bengalen, zum greschte Dail illegali Yywanderer vu Bangladesch, zuesätzli fir Konflik sorge. D Zahl vu dr illegal yygwanderete Bangladescher z Indie wird uf bis zue 20 Millione gschetzt. Di rund 100.000 Exiltibeter, wu syt dr chinesische Bsatzig vu Zibet uf Indie gflichtet sin, wäre derge offiziäll as Flichtling anerkännt. Derzue läbe rund 60.000 tamilischi Flichtling vu Sri Lanka z Indie.
Gschicht
[ändere | Quälltäxt bearbeite]Vorgschicht un klassisch Zytalter
[ändere | Quälltäxt bearbeite]D Indus-Zivilisation, zum greschte Dail im hitige Pakistan gläge, isch aini vu dr frieje Hochkulture vu dr Wält, mit ere aigene Schrift, dr bishär nit entzifferete Indus-Schrift. Um 2500 v. Chr.het dert blanti Sted wie Harappa, mit ere Kanalisation, Seehäfen un Beeder, derwylscht agnuu wird, ass es z Sidindie um des Zyt no weniger entwickleti Verhältnis gee het. Wyter eschtli het s anderi archäologischi Kompläx ghaa, wie di sognännt Chupfer-Hort-Kultur. Ab 1700 v. Chr. isch d-Indus-Kultur mit d Zyt verfalle, mer waißt nit wurum. E wichtigi Period fir di wyter Entwicklig vu Indien isch di vedisch Zyt gsii (rund 1500 bis 500 v. Chr.), wu d Grundlage vu dr hitige Kultur gschaffe wore sin. Iber di bolitisch Entwicklig waißt mer dytli weniger wie iber di religies un philosophisch Entwicklig. Geg Ändi vu dr vedische Zyt sin d Upanishade gschaffe wore, wu d Basis vu dr Religione Hinduismus, Buddhismus un Jainismus bilde, wu alli z Indie entstande sin. Um des Zyt het s au d Urbanisierig in dr Gangesebeni un dr Ufstiig vu regionale Chengirych wie Magadha gee.
Ab em 6. Johrhundert v. Chr. isch dr Buddhismus entstande, wu rund 500 Johr lang näb em Hinduismus di di wichtigscht Gaischtesstremig z Indie gsii isch. Im 4. Johrhundert v. Chr. isch mit em Maurya-Rych zum erschte Mol en indisch Großrych entatande, wu unter em Ashoka fascht iber dr ganz Subkontinent gherrscht ghaa het. Dr Ashoka het si noch e Huffe Eroberigsziig em Buddhismus zuegwändet, wun er im aigene Land un bis uf Sri Lanka, Sidoschtasie un im Mittlere Oschten het welle verbraite. Im 3. Johrhundert v. Chr. het s e Bluescht vu dr Prakrit-Literatur un vu dr tamilische Sangam-Literatur im sidligen Indie gee.[7][8] Noch em Dod vum Ashoka isch s Maurya-Rych nodisno wider in e Hufe Chlaistaate ussenandergheit, wu erscht im 4. Johrhundert n. Chr. vu dr Gupta wider zue me Großrych z Nordindien zämegfiert wore sin. Mit em Buddhismus het Indie ne große kulturällen Yyfluss ghaa uf dr ganz Zäntral- un Oschtasie. D Uusbraitig vum Hinduismus un vum Buddhismus iber Indochina bis in s hitig Indonesie het d Gschicht un d Kultur vu däne Länder bregt. As letschte große Ferderer vum Buddhismus z Indie giltet dr Harshavardhana. Däm sy Herrschaft im Nordindie vum 7. Johrhundert markiert dr Ibergang zum indische Mittelalter.
Indischs Mittelalter un Mogulzyt
[ändere | Quälltäxt bearbeite]Arabischi Eroberungszig im 8. Johrhundert hän dr Islam uf Nordweschtindie brocht. Wu d Araber versuecht hän, uf Gujarat un driber uuse fiiri z dringe, het dr indisch Chenig Vikramaditya II. vu dr weschtlige Chalukya-Dinaschty iber si gsiigt.[9][10] Vum 8. Johrhundert bis zum 10. Johrhundert hän di drei Dinaschtie Rashtrakuta, Pala un Pratihara iber e große Dail vu Indie gherrscht un hän unterenand um d Vorherrschaft z Nordindie kämpft.[11][12] Im Side vu Indie hän d Chola-Dinaschty un d Chalukya-Dinaschty gherrscht vum 10. bis zum 12. Johrhundert.[13][14] Zuen ere Dominanz vu muslimische Staaten im Norden un zuen ere Islamisierig vu greßere Dail vu dr dertige Bevelkerig isch aber erscht mit dr Invasione vu zäntralasiatische islamische Mächt ab em 12. Johrhundert chuu. S Sultanat vu Delhi het sy Macht sogar churzzytig in dr Siden uusgwytet, ainewäg isch sy kulturällen Yyfluss uf dr Norde nie arg groß sii. Dr Yyfall vu dr Mongolen anne 1398 het s Sultanat gschwecht, sodass di hinduistische Regionalrych wider sterker wore sin. Erscht mit dr Grindig vum Mogulrych im 16. Johrhundert, sin di muslimische Herrscher fir rund 200 Johr wider zue de wichtigschte bolitische Chraft im Norde wore. S Mogulrych het s bis anne 1857 gee. Wichtig Herrscher wie dr Akbar, dr Jahangir, dr Shah Jahan un dr Aurangzeb hän nit nume d Gränze vum Rych bis uf dr Dekkan uusdehnt, si hän au ne modärn Verwaltigs- un Staatswääse gschaffe un d Chinscht gferderet. Hinduistischi Chenigdimer het s in däre Zyt nume no im Side gee, zem Byschpel z Vijayanagar. Im spote 17. Johrhundert isch s hinduistisch Maratha-Rych grindet wore, wu im spote 18. Johrhundert s Mogulrych iberrännt het un e große Dail vu Nordindien eroberet het.[15]
Europäischi Kolonialherrschaft un Unabhängigkaitsbewegig
[ändere | Quälltäxt bearbeite]Wu dr Vasco da Gama anne1498 dr Seeweg uf Indien entdeckt ghaa het, het Portugal ab 1505 aagfange mit dr Eroberig vu chlaine Kischtestitzpinkt. Ab 1756 het di britisch Oschtindie-Kompany (British East India Company) vu ihre Hafestitzpinkt Calcutta (hit: Kalkutta), Madras (hit: Chennai) un Bombay (hit: Mumbai) uus wyti Dail vu Indien eroberet. Em Yyfluss vu dr europäische Kolonialmächt Portugal, Niderlande un Frankrych, wu s vorhär gee het, het si im großen un ganze ne Änd gmacht. Loyali Firschte hän ihri Staate mit ere yygränzte Suveränitet bhalte, wie Hyderabad, Bhopal, Mysore oder Kaschmir. 1857/58 sin Dail vu dr Bevelkerig vu Nordindien im Sepoy-Ufstand gege d Herrschaft vu dr Oschtindie-Kompany ufgstande. Wu dä Ufstand nidergschlaa gsii isch, isch d Kompany ufglest woren un Indien isch dr diräkte Kontroll dur Großbritannien unterstellt wore. Di britische Monarche hän ab 1877 (bis 1947) zuesätzli dr Titel Empress of India bzw. Emperor of India (Chaiser(i) vu Indie) drait.
Anne 1885 isch z Bombay dr Indian National Congress (Kongrässbartei) grindet wore. Är het aafangs nit d Unabhängigkait vu Indie gforderet, nume mee bolitischi Rächt un Mitsproch fir di aimisch Bevelkerig. Syni Mitglider sin in dr Hauptsach Hindus un Parse gsii. Di muslimisch Oberschicht isch uf Abstand blibe, wel ihre Wortfierer Sayyid Ahmad Khan gferchtet het, ass si dir Yyfierig vum Meehaitsprinzip us dr Verwaltig drängt wäre. Statt däm isch 1906 d Muslimliga as Inträsseverdrättig vu dr Muslim grindet wore. Im Lauf vum 19. un 20. Johrhundert isch d Religion fir di Hyfe Velker z Indie all wichtiger woren as Bindigsgliid
Im Erschte Wältchrieg isch di groß Meehait vu dr Bevelkerig no loyal blibe. Us Wuet, ass Großbritannie bi dr Ufdailig vum Osmanische Rych mitgmacht het, hän si dernoo au ne Hufe Muslim dr Unabhängigkaitsbewegig aagschlosse. Bim Zweete Wältchrieg het Indie aafangs mit ere 200.000 Mann starke Freiwilligenarmee uf dr Syte vu Großbritannie mitgmacht, wu im Lauf vum Chrieg uf iber zwoo Millione Soldaten aagwachsen isch. Bi Chriegsänd sin iber 24.000 indischi Soldate gfalle gsii, iber 11.000 vermisst un zwoo Millione Mänsche verhungeret.[16]
Dr gwaltfrei Widerstand gege di britisch Kolonialherrschaft, vor allem unter em Mohandas Karamchand Gandhi un em Jawaharlal Nehru, het anne 1947 zur Unabhängigkait gfiert. Glychzytig het d Kolonialmacht d Kolony Britisch-Indie, wu fascht dr ganz indi Subkontinänt umfasst het, in zwee Staate dailt, di säkular Indisch Union un di chlainer Islamische Republik Pakischtan. D Brite hän dodermit dr Forderige vu dr Muslimliga un ihrem Fierer Muhammad Ali Jinnah noch eme aigen Nationalstaat mit muslimischer Bevelkerigsmeerhait noogeee, wu syt dr 1930er Johr all luter wore sin.
Syt dr Unabhängigkait
[ändere | Quälltäxt bearbeite]D Dailig het zue aire vu dr greschte Verdrybigs- un Fluchtbewegige in dr Gschicht gfiert. Rund 10 Millione Hindu un Sikh sin us Pakischtan verdribe wore, rund 7 Millione Muslim us Indie. 750.000 bis ai Million Mänsche sin ums Lääbe chuu. Di dur Schutzverdreg an d Brite bundene Firschtestaate hän scho vor dr Unabhängigkait ihre Bydritt zue dr Indischen Union verchindet. Nume zwai sin em Yygliderigsprozäss vu dr Firschtedimer ärnschthaft im Wäg gstande. Dr muslimisch Herrscher vum fascht uusschließli hinduistische Hyderabad isch dur dr Yymarsch vu indische Druppe zum Aaschluss zwunge wore. Z Kaschmir, wu vor allem Muslim lääbe, het dr Maharadscha, wu sälber Hindu gsii isch, sy Entschaidig verzegeret. Wu muslimischi Kämpfer in sy Land yydrunge sin, het er si schließli doch zum Bydritt zue Indien entschlosse, wu dr grescht Dail vum ehmolige Firschtedum bsetzt het. Pakischtan het dr Bydritt as nit rächtmäßig aagsääne, des het zum Erschte Indisch-Pakischtanische Chrieg um Kaschmir (1947 bis 1949) gfiert. Syterhär schwält in dr Gränzregion dr Kaschmir-Konflikt, wu 1965 au zum Zweete Indisch-Pakischtanische Chrieg un 1999 zum Kargil-Chrieg gfiert het.
Am 26. Novämber 1949 isch Indien em Commonwealth of Nations bydrätte un am 26. Jänner 1950 isch d Verfassig in Chraft drätte, wu Indie derdur zuen ere Republik woren isch. Gränzstryt hän 1962 zuen eme churze Chrieg mit dr Volksrepublik China gfiert, em sognännte Indisch-Chinesische Gränzchrieg. Di indisch Unterstitzig vun ere Unabhängigkaitsbewegig im domolige Oschtpakischtan het 1971 zum dritte Chrieg zwische Indien un Pakischtan gfiert un am Änd zue dr Dailig vu Pakischtan un dr Grindig vum neie, au islamisch bregte Staat Bangladesch.
Innebolitisch het d Kongrässbartei unter em Premierminischter Jawaharlal Nehru vu 1947 bis 1964, un derno no bis aafangs 1970er Johr di jung, unabhängig Demokraty bstimmt. Oppositionsbarteie hän nume uf Bundesstaate- oder kommunaler Ebeni ne Roll gspiilt. Erscht wu em sy Nehru Dochter Indira Gandhi, wu 1966 Premierminischteri woren isch, d Bartei zäntralisiert ghaa het un ihri aige Machtposition versuecht het uuszböue, isch s dr Opposition glunge, sich uf Bundesebeni z formiere. E Gricht z Allahabad het d Indira Gandhi anne 1975 fir schuldig bfunde wäge Uureglemäßigkaite bi dr Wahle 1971. Statt zruggzdrätte het si dr Notstand uusgruefe un bis 1977 per Dekret regiert. Demokratischi Grundrächt wie d Brässe- un Versammligsfreihait sin stark yygschränkt gsii. No däm de facto diktatorische Regime het d Bartei 1977 bi dr Wahle dytli verlore. Vu 1977 bis 1979 het wäge däm e Koalition unter dr Fierig vu dr Janata Party regiert un zum erschte Mol nit d Kongrässbartei. Dur d Wahle vu 1980 isch d Indira Gandhi retuur chuu an d Macht. In ihre zwoote Amtsperiod het si dr Konflikt im Punjab zuegspitzt, wu sikhistischi Separatischte ne aigene Staat gforderet hän. Wu si militanti Sikh im Guldine Tämpel z Amritsar verschanzt ghaa hän, het d Gandhi 1984 in dr Operation Blue Star dr Tämpel dur Militer stirme loo. Im Lauf vu dr bluetige Uusschrytige, wu s derno gee het im Land, isch d Gandhi vu me Sikh-Lyybwächter umbrocht wore. Ihre Suhn Rajiv Gandhi het d Regierigsgschäft ibernuu, het aber syni blante Reforme nit chenne umsetze. E Bstächigsskandal im Zämmehang mit dr schwedische Rischtigskonzärn Bofors het schließli derzue gfiert, ass d Opposition d Wahle 1989 gwunne het. No zwai Johr het d Kongrässbartei aber wider d Barlemäntswale vu 1991 gwunne, im Wahlkampf isch dr Rajiv Gandhi umbrocht wore. D Regierig unter em P. V. Narasimha Rao het e wirtschaftligi Liberalisierig un e ussebolitischi Neioriäntierig vum syt em Nehru sozialistisch uusgrichtet Land yyglaitet. Dur des Reformprogramm sin Staatsbedriib privatisiert wore, Handelsbschränkige glupft un Styyre gsänkt wore.
Syt dr 1980er Johr het s e dytlige Ufschwung vum Hindu-Nationalismus gee. D Ussenandersetzige um d Babri-Moschee z Ayodhya (Uttar Pradesh), wu an dr Stell vun eme friejere Hindutämpel böue woren isch, isch 1992 eskaliert. Hinduistischi Extremischte hän s Gotteshuus gschlisse, was zue landeswyte bluetige Uusschrytige gfiert het. Dr bolitisch Arm vu dr Hindu-Nationalischte, d Bharatiya Janata Party (BJP), hetz wische 1998 un 2004 e Regierigskoalition mit em Atal Bihari Vajpayee as Regierigsschef aagfiert. 2004 het aber wider d Kongrässbartei d Wahle gwunne unter dr Sonia Gandhi, dr Wittfrau vum Rajiv Gandhi. No Protescht vu dr Opposition wäg ihre italienische Abstammig het si uf s Amt vu dr Premierminischteri verzichtet. Statt ihre isch dr ehmolig Finanzminischter Manmohan Singh Regierigsschef wore. Anne 2014 het di oppositionäll BJP gwunne un ihre Spitzekandidat Narendra Modi isch Minischterbresidänt wore.
Di fundamäntle Brobläm vu Indie sin hite d Iberbevelkerig, d Armuet drotz em wirtschaftlige Ufschwung, d Umwältverdräckig un di ethnische un religies Konflikt im Land, vor alle zwisch Hindu un Muslim. Derzue chunnt dr ussebolitische Konflikt mit Pakischtan um d Region Kaschmir, w uno brisanter woren isch, syter ass beedi Staaten Atommächt wore sin (Indien ab 1974, Pakischtan ab 1998).
Gliidstaaten und Territorie
[ändere | Quälltäxt bearbeite]![](http://upload.wikimedia.org/wikipedia/commons/thumb/9/9b/Indien_Verwaltungsgliederung.png/220px-Indien_Verwaltungsgliederung.png)
Indien isch in 29 Bundesstaate (ängl. States) un siben Unionsterritorie (ängl. Union Territories) glideret, wu unterdailt sin in insgsamt iber 600 Dischtrikt (ängl. Districts). Derwylscht d Unionsterritorie vu dr Zäntralregierig z Neu-Delhi verwaltet wäre, het e jede Bundesstaat en aige Barlemänt un en aigeni Regierig.
Name | ISO 3166-2 | Yywohner[17] | Flechi | Bevelkerigs- dichti |
Hauptstadt |
---|---|---|---|---|---|
Indien | 1.219.569.573 | 3.287.469 km² | 382 Ew./km² | Neu-Delhi | |
Andamanen und Nikobaren* | AN | 380.581 | 8.249 km² | 46 Ew./km² | Port Blair |
Andhra Pradesh | AP | 49.665.533 | 160.205 km² | 310 Ew./km² | Hyderabad |
Arunachal Pradesh | AR | 1.383.727 | 83.743 km² | 17 Ew./km² | Itanagar |
Assam | AS | 31.205.576 | 78.438 km² | 398 Ew./km² | Dispur |
Bihar | BR | 104.099.452 | 94.163 km² | 1.106 Ew./km² | Patna |
Chandigarh* | CH | 1.055.450 | 114 km² | 9.258 Ew./km² | Chandigarh |
Chhattisgarh | CT | 25.545.198 | 135.192 km² | 189 Ew./km² | Raipur |
Dadra und Nagar Haveli* | DN | 343.709 | 491 km² | 700 Ew./km² | Silvassa |
Daman und Diu* | DD | 243.247 | 111 km² | 2.191 Ew./km² | Daman |
Delhi* | DL | 16.787.941 | 1.483 km² | 11.320 Ew./km² | Delhi |
Goa | GA | 1.458.545 | 3.702 km² | 394 Ew./km² | Panaji |
Gujarat | GJ | 60.439.692 | 196.244 km² | 308 Ew./km² | Gandhinagar |
Haryana | HR | 25.351.462 | 44.212 km² | 573 Ew./km² | Chandigarh |
Himachal Pradesh | HP | 6.864.602 | 55.673 km² | 123 Ew./km² | Shimla |
Jammu und Kashmir** | JK | 12.541.302 | 101.387 km² | 124 Ew./km² | Srinagar / Jammu |
Jharkhand | JH | 32.988.134 | 79.716 km² | 414 Ew./km² | Jamshedpur |
Karnataka | KA | 61.095.297 | 191.791 km² | 319 Ew./km² | Bangalore |
Kerala | KL | 33.406.061 | 38.852 km² | 860 Ew./km² | Thiruvananthapuram |
Lakshadweep* | LD | 64.473 | 30 km² | 2.149 Ew./km² | Kavaratti |
Madhya Pradesh | MP | 72.626.809 | 308.252 km² | 236 Ew./km² | Bhopal |
Maharashtra | MH | 112.374.333 | 307.713 km² | 365 Ew./km² | Mumbai |
Manipur | MN | 2.570.390 | 22.327 km² | 115 Ew./km² | Imphal |
Meghalaya | ML | 2.966.889 | 22.429 km² | 132 Ew./km² | Shillong |
Mizoram | MZ | 1.097.206 | 21.081 km² | 52 Ew./km² | Aizawl |
Nagaland | NL | 1.978.502 | 16.579 km² | 119 Ew./km² | Kohima |
Orissa | OR | 41.974.218 | 155.707 km² | 270 Ew./km² | Bhubaneswar |
Puducherry* | PY | 1.247.953 | 490 km² | 2.547 Ew./km² | Puducherry |
Punjab | PB | 27.743.338 | 50.362 km² | 551 Ew./km² | Chandigarh |
Rajasthan | RJ | 68.548.437 | 342.239 km² | 200 Ew./km² | Jaipur |
Sikkim | SK | 610.577 | 7.096 km² | 86 Ew./km² | Gangtok |
Tamil Nadu | TN | 72.147.030 | 130.060 km² | 555 Ew./km² | Chennai |
Telangana | TG | 35.286.757 | 114.840 km² | 310 Ew./km² | Hyderabad |
Tripura | TR | 3.673.917 | 10.486 km² | 350 Ew./km² | Agartala |
Uttarakhand | UT | 10.086.292 | 53.483 km² | 189 Ew./km² | Dehradun |
Uttar Pradesh | UP | 199.812.341 | 240.928 km² | 829 Ew./km² | Lakhnau |
Weschtbengale | WB | 91.276.115 | 88.752 km² | 1.028 Ew./km² | Kalkutta |
*) Unionsterritorium
**) vu Indie kontrollierte Dail
Literatur
[ändere | Quälltäxt bearbeite]Iberblicksdarstellige
[ändere | Quälltäxt bearbeite]- Sven Hansen (Hrsg.): Indien. Die barfüßige Großmacht. Edition Le Monde diplomatique, Heft 7, Berlin 2010, ISBN 978-3-937683-27-0.
- Michael von Hauff (Hrsg.): Indien. Herausforderungen und Perspektiven. Marburg 2008, ISBN 978-3-89518-720-9.
- Dietmar Rothermund: Indien: Kultur, Geschichte, Politik, Wirtschaft, Umwelt - ein Handbuch, München: Verlag C.H.Beck, 1995
- Klaus Voll, Doreen Beierlein: Rising India – Europe’s partner? Weißensee Verlag, Berlin 2006, ISBN 3-89998-098-0.
Gschicht
[ändere | Quälltäxt bearbeite]- Arthur Llewellyn Basham: The wonder that was India. Band 1: A survey of the history and culture of the Indian sub-continent before the coming of the Muslims. Band 2: From the coming of the Mus-lims to the British conquest: 1200–1700. Sidgwick & Jackson, London 1954/1987, ISBN 0-283-35457-7.
- Hermann Kulke: Indische Geschichte bis 1750. (= Oldenbourg Grundriss der Geschichte. 34). München 2005, ISBN 3-486-55741-6.
- Hermann Kulke, Dietmar Rothermund: Geschichte Indiens. Von der Induskultur bis heute. Aktual. Sonderaufl., Verlag C. H. Beck, München 2006, ISBN 3-406-54997-7.
- Michael Mann: Geschichte Indiens. Vom 18. bis zum 21. Jahrhundert. (= UTB 2694). Verlag Ferdi-nand Schöningh, Paderborn u. a. 2005, ISBN 3-8252-2694-8.
- Bernd Rosenheim: Die Welt des Buddha. Frühe Stätten buddhistischer Kunst in Indien. Verlag Phi-lipp von Zabern, Mainz 2006, ISBN 3-8053-3665-9.
- Shashi Tharoor: Eine kleine Geschichte Indiens. Suhrkamp, Frankfurt am Main 2005, ISBN 3-89331-635-3.
- Michael Witzel: Das alte Indien. (= C. H. Beck Wissen). 2., durchges. Auflage. C. H. Beck Verlag, München 2010, ISBN 978-3-406-59717-6.
Bolitik
[ändere | Quälltäxt bearbeite]- Olaf Ihlau: Weltmacht Indien. Die neue Herausforderung des Westens. Siedler Verlag, München 2006, ISBN 3-88680-851-3.
- Harald Müller: Weltmacht Indien – Wie uns der rasante Aufstieg herausfordert. S. Fischer Verlag GmbH, Frankfurt am Main 2006, ISBN 3-596-17371-X.
- Clemens Six: Hindi – Hindu – Hindustan. Politik und Religion im modernen Indien. 2. Auflage. Wien 2007, ISBN 978-3-85476-212-6.
- Christian Wagner: Das politische System Indiens. Eine Einführung. Wiesbaden 2006, ISBN 3-531-90248-2.
- Klaus Voll: Globale asiatische Großmacht? Indische Außen- und Sicherheitspolitik zwischen 2000 und 2005. Weißensee Verlag, Berlin 2005, ISBN 3-89998-075-1.
Religion
[ändere | Quälltäxt bearbeite]- Paul Gäbler: Indische Religionen. In: Evangelisches Kirchenlexikon – Kirchlich-theologisches Handwörterbuch. Band: H–O. 2. unveränderte Auflage. Vandenhoeck & Ruprecht, Göttingen 1962, Spalte 298–302.
- Swami Vivekananda: The Complete Works of Swami Vivekananda. Reprint. Mayavati Memorial Edition, Advatia Ashrama, Calcutta 1991/1992.
- Christian W. Troll: Sayyid Ahmand Khan. A Reinterpretation of Muslim Theology. Vikas Publ. House, New Delhi 1978.
Gsellschaft
[ändere | Quälltäxt bearbeite]- Maren Bellwinkel-Schempp: Dalits. Religion und Menschenrechte der ehemaligen Unberührbaren in Indien. (= Studienheft Weltmission heute. Heft 67). Hamburg 2009.
- Robert Deliège: Les castes en Inde aujourd’hui. Presses Univ. de France, Paris 2005, ISBN 2-13-054034-1.
- Michael Schied: Nationalismus und Fundamentalismus in Indien: Der Ayodhya-Konflikt. VDM-Verlag, Saarbrücken 2008, ISBN 978-3-639-00541-7.
- Yves Thoraval: The Cinemas of India (1896–2000). MacMillan, 2000, ISBN 0-333-93410-5.
- Dorothee Wenner u. a. (Hrsg.): Import/Export. Wege des Kulturtransfers zwischen Indien und Deutschland/Österreich. Parthas Verlag, 2005, ISBN 3-86601-910-6.
- Surinder S. Jodhka, Aseem Prakash: Die indische Mittelschicht – aufstrebende politische und wirtschaftliche Kultur. In: KAS-Auslandsinformationen 12/2011. Berlin 2011, S. 44–59.
- Oliver Schulz: Indien zu Fuß – Eine Reise auf dem 78. Längengrad. Deutsche Verlags-Anstalt, München 2011, ISBN 978-3-421-04474-7.
Wirtschaft
[ändere | Quälltäxt bearbeite]- Jean-Joseph Boillot: L’économie de l’Inde. La Découverte, Paris 2006, ISBN 2-7071-4750-8.
- Dirk Bronger, Johannes Wamser: Indien – China. Vergleich zweier Entwicklungswege. Lit Verlag, 2005, ISBN 3-8258-9156-9.
- A. Deaton, V. Kozel: Data and Dogma: The Great Indian Poverty Debate. In: The World Bank Research Observer. Vo. 20 (2005), No. 2. (PDF-Datei; 146 kB)
- Peter Seele: Brains and Gold. Global Transformation Processes and Institutional Change in South Asia. Academia Verlag, 2007, ISBN 978-3-89665-393-2.
Raisefierer
[ändere | Quälltäxt bearbeite]- Helge Timmerberg: Im Palast der gläsernen Schwäne. Auf Umwegen nach Indien. Rowohlt Ta-schenbuch-Verlag, 1985, ISBN 3-499-17528-2.
- Ilija Trojanow: Gebrauchsanweisung für Indien. 2. Auflage. Piper, München/ Zürich 2006, ISBN 3-492-27552-4.
Weblink
[ändere | Quälltäxt bearbeite]![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Netzpräsenz der Indischen Botschaft Berlin
- Länder- und Reiseinformationen vom Uswärtige Amt
- Informatione über Land und Lüt
- india-picture.de: Über 600 Fotos über Kultur und Mänsche z Indien
- Indischi Kultur: Kunscht, Religion, Kult, Fest, Kaländer, Architektur, Gschicht, Reisebricht (vom Dr. Bernhard Peter)
- Forum für Indie-Interessierti
- Indie uff ei Blick
- Indie vo de Bundeszentrale für politischi Bildig (Navigation rächts under de Abbildig vom Titel)
- CIA World Fact Book - Indie
- Census of India, Demografischi Date
- Suedasien.net, Indisch-pakistanischer Konflikt
- Luftverschmutzig in sybe indische Metropole
- D Wält in Zahle: Indie
- Länderprofil Indie vom Statistische Bundesamt (Site cha nüme abgrüeft wärde; Suche im Webarchiv)
- Faces of India
Fueßnote
[ändere | Quälltäxt bearbeite]- ↑ 1,0 1,1 1,2 Census of India 2011: Primary Census Abstract – India. (MS Excel; 94 kB)
- ↑ World Economic Outlook Database, April 2012 vum IWF
- ↑ Human Development Report Office: India – Country Profile: Human Development Indicators, abgruefen am 24. Oktober 2014.
- ↑ Bundes-zentrale für politische Bildung
- ↑ Y.-M. Yuan, S. Wohlhauser, M. Möller, J. Klackenberg, M. W. Callmander, P. Küpfer: Phylogeny and biogeography of Exacum (Gentianaceae): a disjunctive dis-tribution in the Indian Ocean Basin resulted from long distance dispersal and extensive radiati-on. In: Systematic Biology. Band 54, 2005, S. 21–34, doi:10.1080/10635150590905867.
- ↑ Indiens Supreme Court urteilt über historisches Unrecht an den Adivasi
- ↑ G. P. Singh: Researches Into the History and Civilization of the Kirātas. S. 33
- ↑ Brajadulal Chattopadhyaya: A Social History of Early India. Pearson Education India, 2009, S. 259
- ↑ Wilhelm von Pochhammer: India's Road to Nationhood: A Political History of the Subcontinent. South Asia Books, 1993, S. 116.
- ↑ Romila Thapar: Early India: From the Origins to AD 1300. S. 333.
- ↑ Hermann Kulke, Dietmar Rothermund: A History of India. Routledge, London/ New York 2002, S. ?
- ↑ Sailendra Nath Sen: Ancient Indian History and Civilization. South Asia Books, 1988, S. 264–267.
- ↑ Kenneth Pletcher (Hrsg.): The History of India. Rosen Education Service, 2010, S. 103.
- ↑ Kamlesh Kapur: Portraits of a Nation: History of Ancient India. Sterling Publishers, 2010, S. 637.
- ↑ Radhey Shyam Chaurasia: History of Medieval India: From 1000 A.D. to 1707 A.D. Atlantic Publishers, Neu-Delhi 2002, S. 298–300.
- ↑ Johannes H. Voigt: Indien im Zweiten Weltkrieg. (= Studien zur Zeitgeschichte. Band 11. Hrsg. v. Institut für Zeitgeschichte). Deutsche Verlagsanstalt, Stuttgart 1978, ISBN 3-421-01852-9, S. 304.
- ↑ Census of India 2011: Primary Census Data Highlights – India. Chapter 1 (Population, Size and Decadal Change) (Site cha nüme abgrüeft wärde; Suche im Webarchiv) (PDF; 9,2 MB) un Census of India 2011: Primary Census Abstract – India. (PDF; 411 kB)
![]() |
Dä Artikel basiert uff ere fräie Übersetzig vu dere Version vum Artikel „Indien“ vu de dütsche Wikipedia. E Liste vu de Autore un Versione isch do z finde. |
Koordinate: 21° N, 78° O