Mujinga Kambundji
D Mujinga Kambundji, wo am 17. Juni 1992 z Bärn uf d Wält cho isch, isch e Schwiizer Liechtathleetin.
Iri Muetter Ruth Kambundji isch vo Bärn, dr Vatter Sfuka Kambundji usm Kongo. D Familie het näbe dr Mujinga no drü anderi Döchter. D Mujinga Kambundji het s Gymi gmacht und studiert Betriibswirtschaft a dr Wirtschaftshochschuel z Bärn. Si woont z Liebefäld bi Bärn.
D Mujinga Kambundji isch bim Stadtturnveräin Bärn, so wie au iri Schwöschter Muswama Kambundji, wo Sportstudäntin isch. Si treniert i dr Schwiiz und im Ussland dr Laufsport Sprint, isch sid 2009 es paar Mol Schwiizer Meischterin woorde und het d Schwiizer Rekörd über sächzg, hundert und zwoohundert Meter.
D Bärnere rönnt sid Joore internazional ufem höchschte Nivoo. Ane 2009 het si z Tampere am Europäische Olimpische Summer-Jugendfestival d Silbermedalie gholt, und sider isch si immer wider bi grosse Rönne bi de Beschte gsi. A de Olimpische Spiili z London 2012 het si mit dr 4-mal-100-Meter-Stafle mitgmacht. A dr Europameischterschaft vo dr Liechtathletik z Amsterdam 2016 het si über hundert Meter d Bronzemedalie übercho; 2017 isch si bi dr Halleneuropameischterschaft z Belgrad über sächzg Meter ufe viert Platz gloffe; bi dr Hallewältmeischterschaft vo dr Liechtathletik 2018 z Birmingham isch si ufe dritt Platz cho, und bi dr Wältmeisterschaft 2019 z Doha, Katar, het si über zwoohundert Meter Bronze gwunne.[1][2]
Weblink
Commons: Mujinga Kambundji – Sammlig vo Multimediadateie- d Websyte von drMujinga Kambundji
- Christof Gertsch: Warte nur. Die Geschichte der schnellsten Frau der Schweiz. In: Das Magazin Nr. 26 vom 30. Juni 2018, S. 14–21.
- Micha Jegge: Olympia mit der Grossfamilie Kambundji, 18. August 2016, uf bernerzeitung.ch
Fuessnoote
- ↑ Exploit über 200 m. Kambundji holt WM-Bronze! uf srf.ch
- ↑ Rainer Sommerhalder: Mujinga Kambundji ist doch ein Glückskind, 2. Oktober 2019, uf luzernerzeitung.ch