Yvan Pestalozzi

E aglüegti Version vo derre Site, wo am 14. Septämber 2024 freige worre isch, basiert uff derre Version.

Dr Yvan „LOZZI“ Pestalozzi (* 13. Dezämber 1937 z Glaris ; † 3. Juli 2024)^[1]^[2] isch e Schwyzer Yyseblaschtiker un Objäktchinschtler gsii.

Lääben un Wäärch

Dr Yvan Pestalozzi isch e Suhn vun ere franzeesische Mueter un eme dytschschwyzer Vater gsii. Är het Meebelschryyner gleert un si autodidaktisch wyterbildet. Ab 1964 het er as freie Blaschtiker gschafft.

Syni Yyseblaschtike het er di maischte us Droot gmacht, si hän vyll verspiilti Elemänt. Beweegig un Iberraschig sin alliwyyl e Dail vun Chunschtwäärch. Unter em Laitgedanke Dänke wie ne zytige Mänsch – si fraie chenne wier ne Chind sin hunderti vu Aarbete entstande, vu filigraan, handgrooß bis e baar Tonne schwäär. Vyyl vu syne vyylmool kineetische Objäkt het er zue Woortspiil gstaltet. Är isch wäge däm au dr Kabarettischt unter dr Schwyzer Blaschtiker ghaiße woore. Im Geegesatz zue vyyl andere Schwyzer Yyseblaschtiker*ne, wu mer chännt, het dr Lozzi nit mit Schrott gschafft. Anderi Aarbetsriichtige sin syni chlaine Figuure us Waichmetall oder lääbesgrooßi Mänsche- un Dierfiguure us Zemänt, wie dr Schutzängel an dr Gotthardstrass z Oschpìdall.

Di kineetische Objäkt un anderi Wäärch vum Lozzi steen an Oort, wu effetli zuegängli sin, wie zem Byschple am Zürcher Fluughaafe. Anderi Byschpel vu Chunscht in effetlige Ruum sin d Zytmaschiin (1983, UBS, Züri-Altstette) un dr Muggeschwarm (2002, Dübedoorff). Iiber 80 Windblaschtike het s in dr Schwyz, z Europa, dr USA un Fäärnoscht, zem Byschpel s Windspiil vu 1991 am Schiffstäg z Chüsnacht oder s Windspiil Kanton Züri vu 1998 z Büüli Nord. Dr Lozzi het au Chunschtwäärch fir Vercheerschraisel entwoorfe, wie e Brojäkt Lääbesgfäärt un Lääbesbaum z Dübedoorff.

Play Station 2007
Schutzängel 2007
Windspiil 1990

Schrifte

Lozzi's Bilderbuch = Lozzi's picture book. Denken wie ein reifer Mensch, sich freuen können wie ein Kind. Werd, Zürich 1999, ISBN 3-85932-247-8.
mit dr Hilde Mischler Dalichau: Schneckenträume. Y. Pestalozzi, [8636 Wald] 2014, ISBN 978-3-03-304815-7.