Alfred, erfprins van Sakse-Koburg en Gotha
Alfred | |
---|---|
![]() | |
Huis | Sakse-Koburg en Gotha |
Gebore | Buckingham-paleis, Londen | 15 Oktober 1874
Oorlede | 06 Februarie 1899 (op 24) Merano, Oostenryk-Hongarye |
Volle naam | Alfred Alexander William Ernest Albert |
Titel | Erfprins van Sakse-Koburg en Gotha |
Vader | Alfred, Hertog van Sakse-Koburg en Gotha |
Moeder | Groothertogin Maria Aleksandrowna van Rusland |
Alfred, erfprins van Sakse-Koburg en Gotha KG (Alfred Alexander William Ernest Albert; 15 Oktober 1874 - 6 Februarie 1899), was die seun en regmatige erfgenaam van Alfred, Hertog van Sakse-Koburg en Gotha. Hy is op 24 onder omstandighede dood wat steeds nie heeltemal duidelik is nie. Hy was die neef van keiser Wilhelm II van Duitsland, koning George V van die Verenigde Koninkryk en tsaar Nikolaas II van Rusland.
Vroeë lewe
[wysig | wysig bron]Prins Alfred van Edinburg is op 15 Oktober 1874 in Buckingham-paleis, Londen, gebore. Sy pa was Alfred, Hertog van Edinburg, die tweede oudste seun van koningin Victoria en prins Albert. Sy ma was groothertogin Maria Aleksandrowna, 'n dogter van tsaar Aleksander II van Rusland en prinses Marie van Hesse en by Ryn.
In 1893 het die broer van sy oupa aan vaderskant, Ernst II, die Hertog van Sakse-Koburg en Gotha, sonder wettige erfgename gesterf. Omdat die destydse Prins van Wallis volgens die reëls van die Huis van Sakse-Koburg en Gotha hom nie kon opvolg nie omdat hy reeds die regmatige erfgenaam van 'n ander troon was,[1] het hy afstand van die titel gedoen. Alfred se pa, wat toe die Hertog van Edinburg was, het dus die titel geërf en prins Alfred het die erfprins van Sakse-Koburg en Gotha geword.
Prins Alfred het in die vroeë tydperk van sy lewe saam met sy ouers en susters in Clarence House gewoon. Nadat sy pa die troon van Sakse-Koburg en Gotha bestyg het, het hulle na Schloss Rosenau naby Koburg getrek.
Dood
[wysig | wysig bron]![](http://upload.wikimedia.org/wikipedia/commons/thumb/c/c0/Young_Alfred_majority.jpg/305px-Young_Alfred_majority.jpg)
Op 23 Januarie 1899 het Maria Aleksandrowna en haar man die 25ste herdenking van hulle huwelik gevier in Schloss Friedenstein, die hertog se ampswoning in Gotha.[2][3] Die erfprins was nie daar nie, want hy was ernstig siek.[2]
Die presiese omstadighede van Alfred se dood is nie bekend nie, en wisselende weergawes is gepubliseer. In sy suster Maria se memoires staan net sy gesondheid het "ingegee", en volgens ander skrywers het hy "longtering" gehad.[4]:62 The Times se weergawe was dat hy 'n "gewas" gehad het,[4]:62 terwyl die Complete Peerage die algemeen aanvaarde weergawe aangee dat hy "homself geskiet het".[5]
Verskeie skrywers het gegis oor waarom hy homself sou geskiet het. Een skrywer, Frank Bush, het beweer hy was die afstammeling van 'n geheime huwelik tussen Alfred en Mabel Fitzgerald, kleindogter van die 4de Hertog van Leinster, en dat wrywing tussen Alfred en sy familie oor sy "geheime huwelik" die oorsaak van die selfmoord was.[4][nota 1]
Ondanks 'n gebrek aan destydse en hedendaagse bewyse het ander skrywers Bush se bewering gepubliseer, insluitende John van der Kiste en Bee Jordaan in Dearest Affie. Dit word ook herhaal in die amptelike familiegeskiedenis (Das Haus von Sachsen-Coburg und Gotha).[1]
Volgens gerugte het Alfred homself geskiet terwyl die res van die familie byeengekom het vir die viering. Hy het oorleef en is drie dae lank in Schloss Friedenstein versorg voordat hy na 'n sanatorium in Gratsch naby Merano in die provinsie Tirool in Oostenryk-Hongarye (nou in Italië) gestuur is. Alfred is op 6 Februarie 1899 hier dood, op 24-jarige ouderdom.[1]
Titels en aanspreekvorms
[wysig | wysig bron]- 15 Oktober 1874 - 23 Augustus 1893: Sy Koninklike Hoogheid prins Alfred van Edinburg[6]
- 23 Augustus 1893 - 6 Februarie 1899: Sy Koninklike Hoogheid die erfprins van Sakse-Koburg en Gotha[7]
Nota
[wysig | wysig bron]- ↑ Ongelukkig vir dié teorie, wat in die 1940's die eerste keer gepubliseer is, en vir Bush se beweerde stamboom is daar geen bewys dat Alfred en Mabel mekaar ooit ontmoet het nie. Ten tye van hulle beweerde burgerlike en kerktroue in 1898 (waarvan geen rekord bestaan nie) was Mabel jonger as 14 jaar, en toe sy in 1910 met William Clarke Hadoke getroud is, is sy as 'n oujongnooi beskryf en nie as 'n weduwee nie.
Verwysings
[wysig | wysig bron]- ↑ 1,0 1,1 1,2 Sandner, Harold (2004). "II.4.2 Erbprinz Alfred". Das Haus von Sachsen-Coburg und Gotha 1826 bis 2001 (in Duits). Andreas, Prinz von Sachsen-Coburg und Gotha (preface). 96450 Coburg: Neue Presse GmbH. pp. 155–156. ISBN 3-00-008525-4.
{{cite book}}
: AS1-onderhoud: plek (link) - ↑ 2,0 2,1 Mandache, Dearest Missy, p. 373
- ↑ Beéche, The Coburgs of Europe, p. 83.
- ↑ 4,0 4,1 4,2 Eilers Koenig, Marlene A. (1997). Queen Victoria's Descendants. Falköping, Swede: Rosvall Royal Books. ISBN 91-630-5964-9.
- ↑ Cokayne, George Edward (April 1982). The Complete Peerage of England, Scotland, Ireland, Great Britain, and the United Kingdom, Extant, Extinct, or Dormant. Vol. 5 (Herdruk van 1982 uitg.). Gloucester, Engeland: Sutton Publishing. p. 8. ISBN 0-904387-82-8.
- ↑ "The London Gazette, Issue 26184, Page 3860". 20 Julie 1891.
- ↑ "The London Gazette, Issue 26947, Page 1609". 14 Maart 1898.
Skakels
[wysig | wysig bron]Wikimedia Commons het meer media in die kategorie Alfred, erfprins van Sakse-Koburg en Gotha.
Hierdie artikel is in sy geheel of gedeeltelik uit die Engelse Wikipedia vertaal.